Маккавейёслэн 1-тӥ книгазы 4
4
4-тӥ ЛЮКЕТ
1Горгий кутӥз вить сюрс ожгарчиосты, вал вылын мынӥсь сюрс усто ожгарчиосты, люкаськем калык уйин азьпала вырӟиз, 2иудей ожгарчиос вылэ урдскыны но шӧдтэк шорысь соосты погыртыны мед луоз, нош изкар пушкын улӥсь воргоронъёс солы сюрес возьматӥсьёс луизы. 3Иуда кылӥз но соку со ачиз но, кышкасьтэм ожгарчиосыз но эксэйлэсь Еммауме интыяськем ожгарчиоссэ погыртыны потӥзы, 4со вакытэ Горгийлэн ожгарчиосыз станлы кыдёкын сыло ни вал. 5Горгий Иудалэн ожгарчиосызлэн сылон интыязы уйин лыктӥз, но нокинэ но ӧз шедьты, гурезьёстӥ соосты утчаса ветлӥз, со шуэ вал: «Соос асьмелэсь пегӟо». 6Куазь ӟардыны кутскыку, Иуда куинь сюрс ожгарчиосыныз ӵош ӵошалэ вуиз, нош солэн ожгарчиосызлэн, кӧня соослы кулэ вал, сомында щитъёссы но, мечъёссы но ӧй вал. 7Кужмоесь, трос ожмаськон арбериосын сылӥсь язычникъёсты, ожмаськыны дасям буш вал вылысь ожгарчиосты адӟыса, 8Иуда бордаз сылӥсь воргоронъёслы шуиз: «Соос трос кузя шуыса эн кышкалэ, эн кышкалэ вылады урдскемзылэсь. 9Тодады вае, кызьы фараон ожгарчиосыныз уйиськыку, Горд Кам зарезьын атайёсмы утемын вал. 10Табере ваелэ Инлы вазиськоме; оло нош Со асьмеды жалялоз, атайёсынымы сӥзён-косон пыр кусып кылдытэмзэ тодаз вайыса, асьме вылэ урдскемъёсты асьме азьын туннэ пыргытоз; 11соку вань язычникъёс Израильлэн Утисез, Мозмытӥсез вань шуыса тодозы». 12Мурт выжыысь адямиос синзэс ӝутӥзы но соослы пумит лыктӥсьёс вань шуыса адӟизы. 13Станысьтызы ожмаськыны потӥзы, нош Иудаен огазьын сылӥсьёс гумыоссэс пелляны кутскизы, 14ваче вуизы но язычникъёсты пазьгизы, ӵошал пала соос бызьыса кошкыны кутскизы, 15нош ваньмыз мукетыз меч улэ быриз; Газерозь, Идумеялэн ӵошалъёсаз, Азотозь, Иамнияозь соос сьӧры уйиськыса мынӥзы, соос пӧлысь ог куинь сюрс пала воргоронъёс быризы. 16Иуда ожгарчиосыныз ӵош уйиськонысь берытскиз но 17калыклы шуиз: «Тушмонлэсь ваньбурзэ люкан борды эн басьтӥське, уго асьмеды азьпалан ожмаськонъёс возьмало на; 18Горгий ожгарчиосыныз ӵош асьмелы матысь гурезьёсын сылэ; табере тушмонъёсмылэн пумитазы султэ, соосын ожмаське, нош собере кышкатэк ваньбурзэс асьтэлы люкалэ». 19Иуда та кылъёссэ вераса улыку, гурезьысь васькись адями уллё адӟиськиз. 20Со адӟиз, соосты берлане чигнатӥзы шуыса, сылон интызэс тылын суто; уго вылэ ӝутскись ӵын возьматэ, мар отын луиз. 21Тае адӟыса, соос туж кышкатскизы; Иудалэсь ӵошалын ожмаськыны дась сылӥсь ожгарчиоссэ адӟыса, 22ваньзы соос мурт выжы калыклэн музъемаз пегӟыны кутскизы. 23Соку Иуда тушмон ожгарчиослэн сылэм бервылазы ваньбур люканы вырӟиз, трос зарни, азвесь, дуно чагыр, нап-горд басмаослэсь вурем дӥськут, туж трос ваньбур киултӥзы. 24Берытскыкузы Инмысь Кузё-Инмарез данъязы, ушъязы, уго Со ӟечлыко, Солэн гажан-жалянэз пумтэм вапумъёс улэ. 25Со нуналэ Израильлы туж бадӟым утиськон сётэмын вал. 26Нош мурт калык пӧлысь улэп кылемъёс Лисий доры лыктӥзы но, мар луиз, ваньзэ солы ивортӥзы. 27Та сярысь кылэм бераз Лисийлэн мылкыдыз сӧриськиз, ӝожомиз, малы ке шуоно Израильлы мар луоз шуыса малпаз вал, со ӧз быдэсмы, мар карыны эксэй косӥз вал, со ӧз пӧрмы. 28Вуонояз аре бырйыса Лисий куатьтон сюрс дасям йыг-йыг воргоронъёсты, вал вылын вить сюрс ожмаськисьёсты люказ, – иудейёсты вормон вылысь. 29Идумеяе вуыса, соос Вефсура каре лагерьзэс пуктӥзы; но Иуда дас сюрс ожгарчиосыныз соосты пумитаз. 30Кужмо армиез адӟыса, со вӧсяськыса шуиз: «Данлыко Тон, Израильлэн Утисез, Давид ляльчиедлэн киыныз кужмо тушмонлэсь урдскемзэ пыргытӥсь, мурт выжы калыклэсь полксэ Сауллэн Ионафан пиез кие, ожмаськон тӥрлыксэ нуллӥсь кие сётӥсь. 31Та армиез израиль калыкедлэн киулаз сёт, кужыменызы, валъёсынызы валче соос возьытэ мед усёзы; 32соос вылэ кышкан лэзь, кышкасьтэм кужымзэс сузмыты; пограмзы-куашкамзы понна туж-туж мед куалектозы; 33Тонэ яратӥсьёслэн меченызы погырты соосты, ваньмыз, Тынэсьтыд нимдэ тодӥсьёс, Тонэ кырӟаса мед данъялозы». 34Ожмаськыны кутскизы, Лисийлэн армиысьтыз вить сюрс пала воргоронъёс соослэн азязы погразы. 35Лисий ас ожгарчиосызлэсь пегӟемзэс адӟиз, Иудалэн ожгарчиосызлэсь кышкасьтэм луэмзэс адӟиз, кызьы соос улыны но, кышкатэк кулыны но дасесь, соку со Антиохияе кошкиз, мурт кунысь ожгарчиосты люказ, азьвыл армиезлэсь лыдзэ будэтӥз, малпаз нош ик Иудеяе мыныны.
36Нош Иуда, солэн агай-вынъёсыз но шуизы: «Тани, тушмонъёсмы погыртэмын, тубоме вӧсяськон интымес сузяны, выльдыны». 37Ваньзы огазе люкаськизы но Сӥон гурезе тубизы. 38Адӟизы: вӧсяськон инты тырттэм кельтэмын, курбон сётон ӝӧк саптамын, капкаос сутэмын, храмлэн азбаръёсаз, нюлэсъёсы яке кыӵе ке гурезь йылъёсы кадь, будосъёс ӝужаллям, ваньбур возён кеносъёс куашкатэмын. 39Дӥськутсэс ӵажак кесязы, викышъяса бӧрдӥзы, йыр вылазы пень пызьназы. 40Ымнырынызы музъем вылэ выдылӥзы, ивор сётон гумыосын пеллязы, тэльмырыса Инлы вазиськылӥзы. 41Соку Иуда вӧсяськон интыез сузятозязылы изкар пушкы кылемъёсын ожмаськыны воргоронъёссэ келяз. 42Закон понна сюлмаськись-тыршись, дун-шектэм священникъёсты бырйиз. 43Соос вӧсяськон интыез сузязы, саптам изъёсты кырсь интые поттазы. 44Собере соос тылын сутӥськись курбон сётон саптам ӝӧкен мар карон пумысен куспазы малпаськыса вераськыны кутскизы. 45Соослы ӟеч малпан лыктӥз: куашкатоно сое, куке но соку та понна соосты пыкылоно медаз луэ, уго язычникъёс сое саптазы; курбон сётон ӝӧкез соос куашкатӥзы; 46изъёсты храмлэн гурезь йылаз чылкыт интые тыризы, соос пумысен пророк лыктыса ответ сётытозьлы; 47законлэн курон-косонэзъя, быдэсъёссэ изъёсты кутӥзы но, вужезлы укшатыса, соослэсь выль курбон сётон ӝӧк лэсьтӥзы; 48собере вӧсяськон интыез выльдӥзы-тупатъязы, храм пушкысь люкетъёссэ, бӧльмыосты вӧсязы; 49выль вӧсяськон тӥрлыкъёс лэсьтӥзы, храм пушкы лампада пуктылон интыез, тылын сутӥськись курбон сётон ӝӧкез, ческыт зыно ӵындытон курбон сётон ӝӧкез, курбон нянь тырон ӝӧкез пыртӥзы; 50курбон сётон ӝӧкез ладанэн ӵындытӥзы, сизьымзэ ик лампадаосты ӝуатӥзы, храмез югыт каризы; 51курбон нянь тырон ӝӧк вылэ няньёс понӥзы, катанчиос ошизы, вань кутскем ужъёссэс йылпумъязы.
52Укмысэтӥ толэзьлэн, Хаслевлэн, кызь витетӥ нуналаз, сю ньыльдон тямысэтӥ аре, вазь ик султӥзы но, 53законэз чакласа, выль пуктэм тылын сутӥськись курбон сётон ӝӧк вылын курбон сётӥзы. 54Со виын, ӵапак со нуналэ, язычникъёслэн курбон сётон ӝӧкез саптан нуналазы, сое кырӟаса, цитраосын, крезьёсын, кимвалъёсын шудыса выльдӥзы. 55Вань калык пыдесъяськыса йыбырттылӥз, вӧсяськизы, Инмысь соослы ӟеч юрттэт Сётӥсьлы тау карон кылъёс ыстылӥзы. 56Тазьы шулдыръяськыса, тямыс нунал ӵоже курбон сётон ӝӧкез выльдӥзы, тылын сутӥськись курбонъёс сётылӥзы, утиськон понна курбонъёс, ушъян-данъян курбонъёс сётылӥзы. 57Храмлэсь азьпалзэ зарни венецъёсын, щитъёсын чеберъязы, капкаосты, ваньбур возён кеносъёсты но выльдӥзы, соослы ӧсъёс лэсьтылӥзы. 58Калык пӧлын туж бадӟым шумпотон улӥз, язычникъёслэн ултӥянзы быдтэмын вал. 59Иуда но солэн агай-вынъёсыз, вань люкаськем израиль калык таӵе пуктон кутӥзы: курбон сётон ӝӧкез выльдон праздникез ас дыраз шумпотыса, шулдырен ортчытъяно, арлы быдэ, Хаслев толэзьлэн кызетӥ нуналысеныз кутскыса тямыс нунал ӵоже сое ортчытоно. 60Со дыре ик Сӥон гурезь котыре ӝужыт борддор ӝутӥзы, юнэсь каланчаос пуктылӥзы, куке но соку язычникъёс лыктыса сое пыд улазы медаз лёгалэ, кызьы соос азьвыл лэсьто вал. 61Иуда со интые гурезез возьманы ожгарчиоссэ пуктӥз, сое утён понна, Идумеялы пумит ожмаськыны калыклэн изкарез мед луоз шуыса, Вефсура карез юнматӥз.
Currently Selected:
Маккавейёслэн 1-тӥ книгазы 4: УДМБИБ
Highlight
Share
Copy
Want to have your highlights saved across all your devices? Sign up or sign in
(c) Библияез берыктонъя Институт, Хельсинки, 2013; 2016