Маккавейёслэн 1-тӥ книгазы 3
3
3-тӥ ЛЮКЕТ
1Со интые пиез, Маккавей шуон Иуда, султӥз. 2Солы юрттӥзы вань агай-вынъёсыз, солэн атаезлы дурбасьтӥсьёс; соос шумпотыса Израиль понна ожмаськизы. 3Ас калыкезлэсь данлыксэ Иуда вӧлмытӥз; батыр музэн вылаз корт дӥсь дӥсяса, ожмаськон арбериосыныз куссэ думылӥз, ожмаськиз, меченыз ожгарчиоссэ утьылӥз. 4Аслэсьтыз ужъёссэ быдэсъякуз, со левлы укша вал, шедьтэм сиёнэз вылэ бурсыса тэтчись левпи музэн тушмон вылэ со урдскылӥз; 5законлы пумит улӥсьёс сьӧры уйиськылӥз, соосты утчаса шедьтылӥз, аслэсьтыз калыксэ бугыръясьёсты сутылӥз. 6Солэсь кышкаменызы законлы пумит улӥсьёс зӥбыт-востэм луылӥзы, ваньзы законлы пумит ужъёс лэсьтӥсьёс со азьын куалектӥзы, солэн киыныз лэсьтӥськись утиськон уж азинлыко мынӥз. 7Троссэ эксэйёсты ӝоже уськытылӥз, Иаковез шулдыртылӥз аслаз ужъёсыныз, сое ӟечен буре ваён пумтэм вапумозь улэ. 8Иудеялэн городъёстӥз со ортчиз но отысь сьӧлыклэсь кышкасьтэмъёсты быдтӥз, Израиль вылэ вуэм вожпотонэз палэнтӥз. 9Музъемлэн пумысеныз пумозяз со нимо-дано луиз, кулон киулэ сюроноосты со котыраз люказ.
10Соку Аполлоний, Израильлы пумит нюръяськон понна, язычникъёсты люказ, Самарияысь но трос ожгарчиосты люказ. 11Иуда та сярысь тодӥз но Аполлонийлэн пумитаз потӥз, погыртӥз, вииз сое; трос вал погыртэмъёс, нош улэп кылемъёсыз пегӟизы. 12Иуда соослэсь ваньбурзэс басьтӥз, Аполлонийлэсь мечсэ басьтӥз но вань улон нуналъёсыз ӵоже соин ожмаськиз.
13Иуда ас котыраз адямиосты, соин ӵош оже потӥсь туж трос оскиськымонэсь адямиосты люказ шуыса, Сириялэн ож ужен кивалтӥсез Сӥрон кылӥз, – 14соку со шуиз: «Аслэсьтым нимме данэ потто, аслам эксэйлыкам нимо-дано луо но Иудаен, соин ӵош мынӥсьёсын, эксэйлэсь косонзэ сантэмасьёсын, ожмасько». 15Со ожен мыноно кариськиз, соин ӵош, солы юрттӥськыны, израиль пиослы пунэм берыктыны сьӧлыклэсь кышкасьтэмъёслэн кужмо уллёзы ӝутӥськиз. 16Вефорон вырйыллы матэ вуэм беразы соослэн пумитазы туж ӧжыт гинэ ожгарчиосын Иуда потӥз, 17соослэн ваче пумитазы лыктӥсь войскоез адӟыса, соос Иудалы шуизы: «Кызьы таӵе ӧжыт лыдын таӵе кужмо, трос лыдо войскоен нюръяськыны быгатомы? Туннэ чик сиськытэк ми чылкак катьтэммимы ини». 18Нош Иуда шуиз: «Трос муртъёслы но капчи ӧжыт муртъёслэн киулазы сюрыны, Инмысь Инмар понна пӧртэмез ӧвӧл, трос муртъем-а яке ӧжыт муртъем-а войскоез утёно; 19уго ож мыныку трос ожгарчиос луэмысь вормон уг лыкты, Инмысь лыктэ кужым. 20Соос милемлы пумит туж вылтӥяськыса, сьӧлыклэсь кышкатэк милемды, милесьтым кышноосмес, нылпиосмес быдтон вылысь, милемды таланы-тарканы шуыса лыкто; 21нош ми лулъёсмы понна, законъёсмы понна нюръяськомы. 22Со Ачиз соосты погыртоз милям азямы; нош тӥ соослэсь эн кышкалэ». 23Вераса дугдэм бераз со малпамтэ шорысь соос вылэ урдскиз. Сирон но, солэн ожгарчиосыз но солэн азяз погыртэмын вал. 24Вефоронысь васькон дорысен ӵошал инты кутсконозь соос сири ожгарчиос сьӧры уйиськыса мынӥзы; ог тямыс сю воргорон бырыны сюриз, нош улэп кылемъёсыз Филистим музъеме пегӟизы. 25Иудалэсь но солэн агай-вынъёсызлэсь кышканы кутскизы, котыр ёросъёсысь вань язычникъёс доры кышкан-куалекъян вуиз. 26Солэн нимыз-даныз эксэй доры но вуиз. Иудалэн ожмаськемез сярысь вань калыкъёс вераськыны кутскизы.
27Антиох эксэй та кылъёсты кылэм бераз йыркурен ӝуатскиз, кун-эксэйлыкысьтыз кужым люканы ыстӥз, туж кужмо войско люкаськиз; 28ваньбур возён шыкысъёссэ усьтыса, ожгарчиослы арлы тыриськись уждун сётъяз, косон сётӥз: котькыӵе кулэ ужлы дась мед луозы. 29Но адӟиз: ваньбур возён шыкысъёсы азвесь ӧжыт кылем, уго бугыръяськонъёс, таласьконъёс-лушкаськонъёс луэмен сэрен кунысь выт ӧжыт люкамын, та урод ужъёслэн ас куназ-эксэйлыказ вӧлмемзылы со ачиз янгыш, уго вашкала дауръёс дырысен кылдэм законъёсты со кулэтэм кариз. 30Мар кулэ сое-тае октыны, кузьымъёс, саламъёс сётъяны солэн азвесез одӥг поллы яке кык поллы сяна уз тырмы шуыса, со кышканы кутскиз. Кузьымъёс, саламъёс со азьвыл жалятэк сётъялляз, та ласянь со азьвыл эксэйёсты ортчиз. 31Сюлмыныз-лулыныз туж сюлэмшугъяськыса, со Персияе, сопал улосвылъёсысь выт бичаны мыныны, тросгес азвесь люканы малпаз. 32Нош Евфрат шур дурысен кутскыса Египетозь эксэй ужез нуыны Лисий кие сётӥз – нимо-дано адямилы, эксэй выжыысь потэм муртлы. 33Озьы ик Антиохез, аслэсьтыз пизэ, вордон-будэтон ужез ачиз берытскытозьлы со кие сётӥз; 34ожгарчиосызлэсь ӝыны люкетсэ, слонъёссэ со кие сётӥз, Иудеяын но Иерусалимын улӥсьёс пумысен, ваньмыз пумысен, мар солы кулэ вал, со Лисийлы косон сётӥз. 35Соослы пумит Израильлэсь кужымзэ, Иерусалимлэсь улэп кылем люкетсэ куашкатыны, быдтыны ожгарчиосты ыстыны косӥз, та интыысен кутскыса соосты тодэ ваён мед быроз, шуиз, 36соослэн вань улон ёросазы мурт выжыысь пиосты улыны интыяны, пус чӧлтыса музъемзэс люкылыны косӥз. 37Нош эксэй ожгарчиослэсь кылем ӝыны люкетсэ басьтыса, со Антиохияысь, аслаз кун-эксэйлыкезлэн шоркарысьтыз, сю ньыльдон сизьыметӥ арын потӥз, Евфрат шур вамен выжыса, вылӥ пал улосвылъёстӥ ортчиз. 38Лисий Птоломеез, Дорименлэсь пизэ, эксэйлэсь эшъёссэ, кужмоесь воргоронъёсты, Никанорен Горгиез, бырйиз, 39соосын ӵош мыныны ньыльдон сюрс воргоронъёсты ыстӥз, сизьым сюрс буш вал вылын мынӥсьёсты, эксэйлэн верам кылызъя, Иудей музъеме мыныса, сое тарканы со ыстӥз. 40Вань ожгарчиосынызы ӵош азьлане вырӟизы, Еммаум вӧзысь ӵошалэ вуыса, отчы интыяськизы. 41Та кунысь вузчиос соос сярысь ивор кылӥзы но, туж трос азвесь, зарни басьтыса, медооссэс кутыса, ожгарчиослэн сылон интыязы израиль пиосты ляльчие басьтылыны лыктӥзы; соос борды итӥськизы на Сириялэн ожгарчиосыз, мурт выжы калыклэн музъемысьтыз ожгарчиос но.
42Иуда, солэн агай-вынъёсыз адӟизы, кызьы куректон-кайгуос йылӥзы, кызьы соослэн улон музъем вылазы ожмаськыны ожгарчиос интыяськизы; эксэйлэн калыкез виылыны, быдтыны косонэз потэм сярысь но тодӥзы. 43Котькудӥз ас матысезлы шуиз: «Погыртэм калыкмес ӝутоме, асьме калык понна, вӧсяськон интымы понна ожмаськоме». 44Ожмаськыны дась луон понна, вӧсяськыны, Кузё-Инмарлэсь гажан-жалянзэ курыны, соосты Со мед жалялоз шуыса куриськыны туж трос калык люкаськиз. 45Иерусалимын, кыр дуннеын кадь, улӥсез ӧй вал; азьвыл отын улӥсьёс пӧлысь пырисьёсыз но, потӥсьёсыз но ӧй вал; вӧсяськон инты саптамын-таркамын вал, солэн изкар пушказ мурт калыкъёслэн пиоссы интыяськизы; со язычникъёслы улон интылы пӧрмиз. Иаков дорын шулдыръяськыса улон быдтэмын вал, чипчирган, цитра гуръёсты кылыны ӧз ни луы. 46Озьы соос люкаськизы но Иерусалимлы ваче пумитэ интыяськем Массифа каре мынӥзы, уго израиль калык азьвыл Массифа карын вӧсяськиз. 47Та нуналэ визязы (кӧс утизы) но вылазы бышкись чурыт дӥськут дӥсязы, йыр вылазы пень пызьназы, вылысьтызы дӥськутсэс кесязы, 48язычникъёслэн асьсэлэсь сульдэръёссэс-идолъёссэс суредан понна утчаса шедьтэм закон книгаоссы пӧлысь одӥгзэ усьтӥзы, 49священникъёслэсь дӥськутсэс вайизы, пудооссылэсь нырысь пол ваем пиоссэс, музъемазы будэм ю-нянь-емышсы пӧлысь дасэтӥ люкетсэ вайизы; сӥзиськонъёссэс быдэстэм назорейёсты ӧтчазы, 50Инлы бадӟым куараен вазиськизы: «Мар милемлы соосын кароно, кытчы соосты нуоно? 51Вӧсяськон интыед саптамын, священникъёсыд ултӥямын, ӝожлык пӧлын уло. 52Тани, милемыз быдтон вылысь язычникъёс люкаськизы. Тон тодӥськод, милемлы пумит мар лэсьтыны соос ӧдъяло. 53Тон милемлы ӧд ке юртты, соослы пумит сылыны кызьы ми быгатомы?» 54Гумыос куараоссэс поттӥзы но соос бадӟым куараен вазиськизы.
55Та бере Иуда калыклы азьвалтӥсьёс пуктӥз – сюрс ожгарчиосын кивалтӥсьёсты, сю ожгарчиосын кивалтӥсьёсты, витьтон ожгарчиосын кивалтӥсьёсты, дас ожгарчиосын кивалтӥсьёсты. 56Корка пуктӥсьёслы, нылэз кышнолы басьтыны вераськемъёслы, виноград бакчаос мерттӥсьёслы, кышкась адямиослы но законлэн косонэзъя#3:56 2Зак. 20:1-8. ваньзы ас корказы мед берытскозы, шуизы. 57Соку огазе люкаськем ожгарчиос вырӟизы, Еммаумлэн лымшор палаз интыяськизы. 58Соку Иуда шуиз: «Кусъёстэс думе, кышкасьтэмесь луэ, та язычникъёсын ожмаськыны ӵукналы дась луэ, соос асьмеды, асьмелэсь вӧсяськон интымес быдтон вылысь огазе люкаськизы. 59Асьме калыклэсь, вӧсяськон интылэсь курадӟемзэс адӟыса улытозь, эсьмаса ожмаськон мыныку мед куломы. 60Нош Инмын кыӵе эрик луоз, озьы ик мед лэсьтоз!»
Currently Selected:
Маккавейёслэн 1-тӥ книгазы 3: УДМБИБ
Highlight
Share
Copy
Want to have your highlights saved across all your devices? Sign up or sign in
(c) Библияез берыктонъя Институт, Хельсинки, 2013; 2016