Маккавейёслэн 1-тӥ книгазы 14
14
14-тӥ ЛЮКЕТ
1Сю сизьымдон кыкетӥ арын Димитрий эксэй, армизэ люкаса, Мидияе мынӥз Трифонлы пумит ожмаськон понна аслыз юрттэт утчаны. 2Нош Персияен Мидиялэн эксэйзы, Арсак, Димитрий солэн музъем вылаз пыриз шуыса кылӥз но соку со ожен кивалтӥсьёсыз пӧлысь одӥгзэ Димитриез улэпкын кутыны ыстӥз. 3Со мынӥз но Димитрийлэсь армизэ пазьгиз, ассэ пленэ кутӥз но Арсак доры вайиз, соиз сое пытсэтэ ворсатӥз.
4Симон кивалтон нуналъёсы Иудей музъем каньылэн улӥз; со ас калыкезлэн ӟеч улонэз сярысь сюлмаськиз, солэн вань кивалтэм нуналъёсыз, солэн данэз соослы сюлэмзыя вал. 5Вань данлыко ужъёсыз вӧзы со тае ватсаз на: Иоппияез киултӥз, отчы аслыз озон#14:5 озон – пристань; гавань; переправа лэсьтыны малпаса, зарезьёсысь шормуӵъёсы пырон усьтӥз. 6Ас калыкезлэсь улон музъемзэ паськытатӥз, быдэс кунэз киултӥз. 7Со трос пленэ сюремъёсты люказ, Газараен но Вефсураен, Иерусалимысь изкарен но кузёяськыса улӥз, саптаськемезлэсь сое сузяз; солы пумитъяськыса улӥсьёс ӧй вал. 8Иудей калык каньылэн, кышкатэк музъемзэ кизьыса-араса улӥз, музъем ю-нянь сётӥз, бусыысь писпуос емышсэс сётӥзы. 9Пересь пиосмуртъёс ульчаосын пукизы, калыклы-мерлыклы пайдаё луись ужъёс сярысь вераськыса улӥзы, егит пиос шукырес ожгарчи дӥськут дӥсяллязы. 10Городъёслы Симон запас сиён-юон вуттылӥз, соосты юн-юн утиськон интыослы пӧрмытылӥз, озьы солэн данлыко нимыз музъемлэн пумозяз тодмо луиз. 11Ас кунзэ тупаса улӥсь кариз, – Израиль туж-туж шумпотыса улӥз. 12Котькудӥз аслаз виноград улаз, смоквапу улаз пукиз, нокин но соосты ӧз кышкатъя. 13Музъем вылэ соослы пумит ожмаськись ӧз ни кыльы, со нуналъёсы эксэйёс зӥбломизы. 14Ас калыкез пушкысь вань куанеръёсты со юнматылӥз. Законэз быдэсъяса улыны косӥз, ваньзэс законлы пумит улӥсьёсты, лек муртъёсты со быдтылӥз. 15Вӧсяськон интыез чебермаз, вӧсяськон сосудъёсты трос кариз.
16Ионафан кулэм шуыса Риме, Спартае ивор вуэм бере соос туж ӝожомизы. 17Нош куке соос кылӥзы, солэн агаез, Симон, со интые архиерей луиз но ас кунэныз, отысь городъёсын кивалтэ, 18соку соос, ыргон пулъёс вылэ гожтыса, солы гожтэт ыстӥзы, соин эшъяськыса, тупаса улонэз азинтон сярысь мылкыдзэс веразы, азьвыл таӵе кусыпъёс кылдытэмын вал солэн Иуда но Ионафан вынъёсыз улон нуналъёсы. 19Та гожтэтэз Иерусалимын калык люкаськон интыын лыдӟизы. 20Тани Спартаын улӥсьёслэн ыстэм гожтэтсылэн списокез: «Спартаын кивалтӥсьёс но город Симон архиерейлы, тӧроослы, священникъёслы, вань иудей калыклы, агай-вынъёсмылы – шумпотоно. 21Асьме калык доры ыстэм муртъёс тӥляд данлыкты, сӥ-данды сярысь милемлы веразы, ми соослэн лыктэмзылы шумпотӥмы, 22калык кенеш азьын верамзэс ми тазьы гожтӥмы: ”Нуминий, Антиохлэн пиез, но Антипатр, Иасонлэн пиез – Иудеяысь ыстэм муртъёс, ми доры лыктӥзы, эшъяськонмес азинтыны мед быгатомы шуыса. 23Та пиосмуртъёсты калык сӥё-дано пумитаны но соослэсь верам кылъёссэс нимысьтыз гожъяськись калык книгаосы пыртыны мылкыд кариз, Спартаысь калыклы тодэ ваён понна гожтэт мед возиськоз. Нош та гожтэтлэсь списоксэ ми Симон архиерейлы гожтӥмы”». 24Та бӧрсьы Симон Нуминиез Рим калыкен кусып кылдытон понна сюрс мина кыскись бадӟым зарни щитэн Риме ыстӥз.
25Калык ваньмыз та сярысь кылыса шуиз: «Кызьы меда быгатомы Симонлы но солэн пиосызлы тау карыны? 26Уго со юн сылӥз, солэн агай-вынъёсыз но, атаезлэн выжы-кумыосыз но юн сылӥзы, Израильлэсь тушмонъёссэ пазьгылӥзы но солы эрик вайизы». 27Та сярысь ыргон пулъёс вылэ гожтӥзы но Сӥон гурезе юбоос вылэ соосты возьматыны шедьытъязы. Тани гожтэмлэн списокез: «Елул толэзьлэн дас тямысэтӥ нуналаз, сю сизьымдон кыкетӥ арын, – со вал Симонлэн куинетӥ арзэ архиерейын пукон араз, – 28Сарамельын, священникъёслэн, калыклэн, калыкен кивалтӥсьёслэн, кун тӧроослэн быдӟым кенешазы милемлы ялэмын вал: 29”Та кунын трос ожмаськонъёс вал бере, Маттафиялэн Симон пиез, Иарив пиослэн пизы, солэн агай-вынъёсыз но, асьсэды бырон калэ вуттыса, асьсэлэсь вӧсяськон интызэс но законзэс утён вылысь ас калыксылэн тушмонъёсызлы ваче пумит султӥзы, туж бадӟым данэн калыксэс данэ поттӥзы. 30Ионафан, ас калыксэ люкаса, солы архиерей луиз, нош со ас калыкез пӧлы выдӥз.
31Нош куке соослэн тушмонъёссы соослэн музъем вылазы пырыны но вордскем шаерзэс куашкатыны, соослэн вӧсяськон интызы вылэ кизэс урдыны малпазы, 32соку Симон султӥз, ас калыкез понна со ожмаськиз, ас калыкезлэн кышкасьтэм воргоронъёсызлы ожмаськон тӥрлык октыны, соослы уждун тырыны аслэсьтыз трос уксёзэ быдтӥз. 33Иудеяысь городъёсты юнматъяз, Иудеялэн кунгож дурысьтыз Вефсураез но, азьвыл отын тушмонъёслэн ожмаськон тӥрлыкъёссы возиськизы, отчы иудей пиосты возьмаськыны пуктӥз. 34Зарезь дурысь Иоппияез но юнматӥз, Азот котырысь Газараез но, азьвыл отын тушмонъёс улӥзы вал, табере отчы иудейёсты улыны интыяз, та интыосты выльдон-юнматон понна ваньзэ тырмыт сётӥз. 35Калык Симонлэсь ужъёссэ, ас калыкезлы данлык сётыны тыршемзэ адӟиз, соин ик сое вань лэсьтэм ужъёсыз понна, шонерлыко ужъёс калыкезлы лэсьтэмез, оскиськымон луэмез понна, котькызьы но ас калыксэ ӝутыны тыршемез понна аслыз кивалтӥсе пуктӥз, архиерее бырйиз. 36Солэн кивалтон нуналъёсаз солэн киулаз ужъёс азинлыко мынӥзы, Иудеяысь язычникъёс уллямын вал, соос но, кинъёс Иерусалимысь Давидлэсь городзэ киултыса возизы, отчы изкар пуктӥзы; отысь потаса, вӧсяськон интылэсь вань котырзэ саптазы, святой интылы трос изъян вайизы. 37Отчы Симон иудейёсты улыны интыяз, Иудей кун, солэн городъёсыз кышкатэк улыны мед быгатозы шуыса, изкарез юнматӥз, Иерусалимлэсь борддоръёссэ вылэ ӝутӥз. 38Со понна ик Димитрий эксэй но сое архиерее юнматӥз, 39аслаз эшъёсыз пӧлы пыртӥз, сое туж сӥё-дано кариз. 40Со кылӥз уго: Рим калык иудейёсты эшъёс, огкылысь улоно калык, агай-вынъёс шуыса нимаз но Симонлэсь ыстэм муртъёссэ сӥё-дано пумитаз, 41иудейёс но священникъёс соглаш луизы, Симон соослы пумтэм вапумъёс ӵожелы кивалтӥсь но архиерей мед луоз, – оскиськымон Пророк потытозьлы, 42Симон ожен кивалтӥсьсы но, вӧсяськон инты понна но сюлмаськись мед луоз, быръем муртъёссэ отысь ужъёсын кивалтыны мед пуктысал, быръем муртъёссэ улосвылэн но, ожмаськон тӥрлыкен но, изкаръёсын но кивалтыны мед пуктоз, 43вӧсяськон инты понна сюлмаськись мед луоз, ваньмыз солэсь мед кылзӥськысалзы, та кунысь вань договоръёс солэн нимыныз мед гожъяськысалзы, эксэй дӥсен мед дӥсяськоз, зарнилэсь лэсьтэм чеберъянъёс мед нуллоз. 44Калык пӧлысь но, священникъёс пӧлысь но одӥг муртэз но та верам пӧлысь номырзэ воштыны лэзёно ӧвӧл, Симонлэн верам кылызлы нокин но медаз пумитъяськы, сотэк кунын кенеш люканы лэзёно ӧвӧл, эксэй дӥськут дӥсяны, зарни бычы нуллыны но лэзёно ӧвӧл. 45Нош кин ке талы пумит мар ке лэсьтӥз ке, та верамысь марзэ ке воштӥз ке, янгыше уськытэмын мед луоз”». 46Вань калык Симонлы тэрытскыса, та верам кылъёсызъя улыны соглаш луиз. 47Симон калыклэсь куронзэ санэ понӥз, архиерей луыны, ожен кивалтӥсь луыны, иудей калыклы тӧро, священикъёслы валтӥсь луыны, ваньмызлы кузё луыса кивалтыны соглаш луиз. 48Та гожтэмез ыргон пулъёс вылэ гожтыса, храмлэн кенер пушказ, адӟиськон интые ошыны кыл сётӥзы, 49нош соослэсь списоксэс ваньбур возён интые пононо, шуизы, Симонлэн но солэн пиосызлэн киулазы соос мед луозы.
Currently Selected:
Маккавейёслэн 1-тӥ книгазы 14: УДМБИБ
Highlight
Share
Copy
Want to have your highlights saved across all your devices? Sign up or sign in
(c) Библияез берыктонъя Институт, Хельсинки, 2013; 2016