Маккавейёслэн 1-тӥ книгазы 15
15
15-тӥ ЛЮКЕТ
1Димитрий эксэйлэн Антиох пиез зарезь шормуӵъёсысь Симонлы, быдӟым священниклы, иудей калыклэн кивалтӥсезлы, вань калыклы гожтэтъёс ыстӥз. 2Соослэн таӵе вал пуштроссы: «Антиох эксэй Симонлы, архиерейлы, калыклэн кивалтӥсезлы, иудей калыклы – шумпотоно. 3Лек сямо адямиос атайёсмылэсь кун-эксэйлыксэс киултӥзы бере, кун-эксэйлыкез выльдыны-юнматыны вылысь, мон сое асьмелы берыктыны ӧдъясько, кыӵе вал со азьвыл, али но сыӵе ик мед луоз шуыса. Мон трос ожгарчиосты люкай, ожмаськон корабльёсты дасяй; 4асьмелэсь улосвылмес тырттэм кельтӥсь, кун-эксэйлыкысьтымы трос городъёсмес куашкатъясь муртъёсты вӧсь карон понна улосвылтӥмы ортчеме потэ. 5Мынэсьтым азьвыл улэм эксэйёс кыӵе вытъёслэсь но мукет тыронъёслэсь тонэ мозмытылӥзы, ваньмызлэсь соослэсь мон но тонэ табере мозмытӥсько; 6тонэ ас кунад коньдон дурыны лэзисько. 7Иерусалим но отысь вӧсяськон инты эрикоесь мед луозы; тынад дасям вань ожмаськон тӥрлыкъёсыд, тынад пуктэм изкаръёсыд, кудъёсыз тынад киулад возисько, тон кие ик мед кылёзы. 8Эксэйлы вань пунэм тыронъёсыд, азьпалась эксэйлы пунэм тыронъёсыд туннэ но, пырак ӵожелы но тынэсьтыд куштэмын мед луозы. 9Асьмелэсь кун-эксэйлыкмес киуламы басьтӥмы ке, соку тонэ но, тынэсьтыд калыктэ но, храмез но туж сӥё-дано каромы, тӥляд данлыкты быдэс музъем вылэ мед вӧлмоз».
10Сю сизьымдон ньылетӥ арын Антиох атайёсызлэн музъем вылазы пыриз, вань ожгарчиос со котыре люкаськизы, Трифон борды ӧжытэз гинэ кылиз. 11Антиох эксэй со сьӧрын уйиськыса ветлӥз но, Трифон зарезь дурысь Дорае ватӥськиз; 12уго со адӟиз: со вылэ шугадӟонъёс вуизы, ожгарчиос со дорысь кошкизы. 13Сю кызь сюрс ожгарчиосын, тямыс сюрс ожмаськон валъёсын Антиох Дора доры вуиз но 14городэз котыртӥз, нош корабльёс зарезь ву вылтӥ вуизы, городэз со музъем вылысен но, зарезь вылысен но ӝикатӥз, пырыны но, потыны но нокинэ но ӧз лэзьы.
15Соку Римысь Нуминий но сое келяса ветлӥсьёс эксэйёслы но кунъёслы гожтэтъёс вайыса лыктӥзы, со гожтэтъёсын тазьы гожтэмын вал: 16«Римысь Левкий консул Птоломей эксэйлы – шумпотоно. 17Иудеяысь ыстэм муртъёс ми доры вуылӥзы, соос милям эшъёсмы, огкылысь улоно муртъёсмы, соосты Симон архиерей но иудей калык кемалась дырысен эшъяськыса, огкылысь улонмес азинтон вылысь ыстӥзы, 18сюрс мина кыскись зарни щит вайизы. 19Озьы ми малпамы эксэйёслы, кунъёслы гожтэтъёс ыстыны соос иудей калыклы номыр но уродзэ медаз лэсьтэ, соослы пумит медаз ожмаське, городъёссэс, кунзэс медаз таркалэ, соослы пумит ожмаськисьёслы медаз юрттӥське. 20Соослэсь щитсэс кутыны мылкыд каримы. 21Озьыен, соослэн кунысьтызы тӥ доры пегӟем лек сямо муртъёсты Симон архиерей кие сётэ, асьсэ законъя соосты со вӧсь мед кароз». 22Таӵе кылъёс вераса ик гожтэт гожтӥз Димитрий эксэйлы, Атталлы, Ариарафлы, Арсаклы, 23вань улосвылъёсы но: Сампсамее, Спартаын улӥсьёслы, Делосэ, Миндэ, Сикионэ, Карияе, Самосэ, Памфилияе, Ликияе, Галикарнассэ, Родосэ, Фасилидае, Косэ, Сидае, Арадэ, Гортинае, Книдае, Кипре, Киринияе. 24Та гожтэтъёслэсь списоксэс Симон архиерейлы гожтӥзы.
25Нош Антиох эксэй Дораез кыкетӥ ползэ котыртӥз, котыр ласянь со вылэ урдскылӥз, зӥръян борддор куашкатъян машинаос лэсьтылӥз, Трифонэз озьы ворсаз – пырыны но, потыны но уг ни луы вал. 26Солы юрттӥськыны Симон кык сюрс быръем ожгарчиосты ыстӥз, азвесь но, зарни но, кулэ тӥрлыкъёс но тырмыт келяз. 27Нош талэн номыр но басьтэмез ӧз поты, мар сярысь азьвыл Симонэн огкылысь вераськиз вал, ваньзэ кулэтэм кариз, Симон бордысь палэнскиз. 28Антиох со доры ыстӥз Афиновиез, эшъёсыз пӧлысь одӥгзэ, соин вераськыны но тазьы шуыны: «Тӥляд киулады сюремын Иоппияен Газара, Иерусалимысь изкар – мынам кун-эксэйлыкелэн городъёсыз. 29Тӥ тырттэм кельтӥды соослэсь ёросъёссэс, музъем вылэ туж бадӟым куашкан вайиды, мынам кун-эксэйлыкелэсь трос интыоссэ тӥ киултӥды. 30Нош табере киултэм городъёсмес берыктэ, выт тыронэз но, кудзэ тӥ Иудеялэн кунгож сьӧрысь киулады басьтэм интыосысь люкаськоды, берыктэ. 31Озьы ӧд ке лэсьтэ, соку соос понна вить сю талант азвесь сётэ, куашкатонъёс лэсьтэмды понна но, городъёсысь выт бичамды понна эшшо вить сю талант сётэ; нош ӧд ке сётэ, ми лыктомы но тӥледын ожмаськыны кутскомы». 32Антиох эксэйлэн эшез Афиновий Иерусалиме вуэм бераз Симонлэсь данлыксэ адӟыса, узырлык возён шыкысысьтыз зарни, азвесь сосудъёсты, котырысьтыз шукрес чеберлыкез-узырлыкез адӟыса, со туж паймиз но эксэйлэсь верам кылъёссэ солы ялӥз. 33Симон солэн пумитаз шуиз: «Мурт музъемез ми ӧм киултэ, муртлэнэн кузёяськыса ӧм улэ, одӥг дыре тушмонъёсмылэсь шонертэм талам атыкай люкетмес гинэ киуламы басьтӥмы. 34Ӟеч дыр шедьтыса, ми нош ик атайёсмылэсь люкетсэс асьмелы берыктӥмы. 35Иоппияен Газара сярысь верано ке, кудъёссэ тон асьтэлы берыктыны куриськод, соос асьсэос милям кунамы улӥсьёслы трос изъян лэсьтӥзы; соос понна ми тӥледлы сю талант сётомы». Та веранлы Афиновий номыр но ӧз вера; 36но пушказ вожпотонэн эксэй доры бертыса, со та кылъёсты, Симонлэн данлыкез сярысь, ваньзэ, мае адӟиз, эксэйлы вераз, эксэй туж вожзэ поттӥз. 37Нош Трифон, корабле пуксьыса, Орфосиадае пегӟиз. 38Соку эксэй зарезь дурысь кунлы ож ужъёсъя кивалтӥсе Кендевеез пуктӥз, со кие пыдын но валъёс вылын ожмаськись ожгарчиосты сётӥз, 39Иудеялы пумит ожен мыныны косон сётӥз, Кедронэз пуктыны, капкаоссэ юнматыны косӥз но кызьы калыкен ожмаськыны кулэ валэктӥз, нош ачиз Трифон сьӧры уйиськыса мынӥз. 40Кендевей Иамнияе вуиз но калыкез ваче ожмаськонэ ӝутканы кутскиз, Иудеяе пырыса, калыкез пленэ басьтыны, виылыны кутскиз; 41Кедронэз пуктыса вуттӥз но отчы вал вылын ожмаськисьёсты, ожгарчиосты интыяз, отысь потаса, Иудеялэн сюрес вылъёстӥз мед ветлозы – озьы косӥз эксэй.
Currently Selected:
Маккавейёслэн 1-тӥ книгазы 15: УДМБИБ
Highlight
Share
Copy
Want to have your highlights saved across all your devices? Sign up or sign in
(c) Библияез берыктонъя Институт, Хельсинки, 2013; 2016