Захария 9
9
9-тӥ ЛЮКЕТ
1Кузё-Инмарлэн Хадрах музъем сярысь азьпалзэ тодытыса веранэз, Дамаск вылэ со вуоз, уго Кузё-Инмарлэн синмыз адӟе вань калыкъёсты, кызьы адӟе вань Израиль выжыосты, – 2соин артысь Емаф вылэ но, Тир вылэ но, Сӥдон вылэ но, уго со туж визьмо луисько шуыса возьматыны выриз. 3Тир аслыз изкар пуктӥз, тузон мында азвесь люказ, ульчаысь дэри мында солэн зарниез. 4Кузё-Инмар Тирез куашкатоз, зарезь вылын кузёяськонзэ быдтоз, нош ассэ городэз тылын сутыса быдтоз. 5Аскалон адӟоз но куалектоз, Газа но туж кышкатскоз, Екрон но, уго солэн оскиськонэз серекъян-веранлы пӧрмоз; Газаын эксэй уз ни луы, Аскалонын улӥсез уз ни луы. 6Мурт выжы улоз Азотын, филистим калыклэсь вылтӥяськонзэ быдто. 7Вир сиёнэз ымазы поныны уг лэзьы, юрӟым сиёнэз пиньынызы уз куртче, соку соос но Мынам калыке пӧлы пырозы, Иудеяысь сюрс муртэн кивалтӥсь кузёйыръёс кадь данлыкоесь луозы, Екрон карын улӥсьёс иевусейёслы укшасесь луозы. 8Коркае вӧзы пукто Аслэсьтым станме, азьлань но, берлань но мынӥсь армиослэсь сое утён понна; азьланяз ёртыса-ӝикатыса возись калыке вылтӥ уз ни ортчы, уго табере Ас синмыным та шоры учкыса уло. 9Шумпотыса шулдыръяськы, Сӥон ныл, шумпот-шулдыръяськы, Иерусалим ныл: тани, тон доры шонер улӥсь, утись, зӥбыт-востэм Эксэед мес ишак вылэ пуксьыса лыктоз, кыткетын ветлӥсь ишаклэн пиез вылэ пуксьыса лыктоз. 10Соку Ефремлэсь ожмаськон уробооссэ быдто, Иерусалимысь валъёсты но; ожмаськон пукыӵ тӥямын луоз: Со калыкъёслы тупаса улон ялоз, кивалтоз зарезь дорысен зарезь дорозь, шур дурысен музъемлэн пумозяз. 11Тон сярысь ке верано, сӥзёнэдлэн вирыз понна вутэм гуэ пытсамъёсты Мон мозмыто. 12Юнматэм гурезе берытске тӥ, оскиськонэн улӥсь пленэ шедемъёс! Мон али ялӥсько, кык полэс карыса тыныд берыкто. 13Пукыӵез кадь Ас бордам Иудаез золто, Ефрем пукыӵелэн ньӧлэз луоз; тынэсьтыд пиостэ, Сӥон, Иониялэн пиосызлы пумит султыто, ожмаськисьлэн мечезлы тонэ пӧрмыто. 14Соос вылын Кузё-Инмар адӟиськоз, Солэн пукыӵ ньӧлэз чилектэм кадь тэтчыса потоз; Инмар Кузё-Инмар гумыен гудыртоз но лымшор палась лыктӥсь сильтӧл пушкын вамышъялоз. 15Саваоф Кузё-Инмар соосты возьмалоз, нош соос виылозы, зӥръян изъёсты лёгалозы, юозы, вина юэм бере кадь куаш поттозы, тыр луозы курбон чашаос кадь, курбон сётон ӝӧклэн сэрегъёсыз кадь. 16Инмар Кузё-Инмар со нуналэ Ас калыксэ ыжъёсты кадь утёз; уго венец изьыысьтыз дуно изъёс кадь соос пиштозы Солэн музъем вылаз. 17Э, макем быдӟым со нуналлэн ӟечлыкез, макем чебер со! Егит пиослэсь кылзэс нянь улӟытоз, нош егит нылъёслэсь – вина.
Currently Selected:
Захария 9: УДМБИБ
Highlight
Share
Copy
Want to have your highlights saved across all your devices? Sign up or sign in
(c) Библияез берыктонъя Институт, Хельсинки, 2013; 2016
