Захария 8
8
8-тӥ ЛЮКЕТ
1Саваоф Кузё-Инмар дорысь верамын вал: 2«Тазьы шуэ Саваоф Кузё-Инмар: Сӥон пумысен туж зол сюлмаськыны кутски, со пумысен Мынам туж зол воже потыны кутскиз. 3Тазьы шуэ Кузё-Инмар: Сӥон пала берытско но Иерусалимын уло; Иерусалим зэмлыклэн городэз шуыса нимаськоз, Саваоф Кузё-Инмарлэн гурезез святой гурезь шуыса нимаськоз. 4Тазьы шуэ Саваоф Кузё-Инмар: Иерусалимлэн падвожъёсаз нош ик бадӟым арлыдэ вуэм пересь пиосмуртъёс, пересь кышномуртъёс киязы пыкъяськон бодызэс кутыса пукозы. 5Та городлэн ульчаосаз тросаз шудӥсь пинал пиос, пинал нылъёс луозы. 6Тазьы шуэ Саваоф Кузё-Инмар: та нуналъёсы кылем калыклэн син азяз оскыны луонтэм кадь адӟиськиз ке, Мон таосты лэсьтыны уг быгаты шуыса малпаськоды-а, оло? – шуэ Саваоф Кузё-Инмар. 7Тазьы шуэ Саваоф Кузё-Инмар: тани, Мон шундыӝужанпал кунысь но, шундыпуксёнпал кунысь но Ас калыкме утё; 8берен соосты ваё, Иерусалимын соос улозы, Мынам калыке луозы, Мон соослэн Инмарзы луо, зэмлыко, шонерлыко лэсьтӥсь Инмар луо. 9Тазьы шуэ Саваоф Кузё-Инмар: киостэс юнматэ, та кылъёсты пророкъёслэн ымысьтызы али кылэмъёс, соос Саваоф Кузё-Инмарлэн коркаезлы, храмезлы, инъет пуктыку, отын вал. 10Уго со нуналъёслэсь азьвыл адямиослы ужамзы понна пунэм тырон ӧй вал, пудо-животлэн ужамез понна но пунэм тырон ӧй вал; кошкисьёс но, лыктӥсьёс но тушмонъёсын сэрен каньылэн улыны ӧз быгатэ; вань адямиосыз ог-огенызы тушмонъяськыса улыны лэзисько вал. 11Нош али та кылем калык понна Мон сыӵе ӧвӧл, кыӵе вал азьвыл нуналъёсы, – шуэ Саваоф Кузё-Инмар. 12Кизён луоз тупаса улон дыръя; виноградпуд емышсэ сётоз, музъем будосъёссэ кисьматоз, инбам лысвузэ сётоз. Та калыклэн кылем люкетэзлы ваньзэ тае киулаз сёто. 13Тазьы луоз: кызьы тӥ, Иуда выжы, Израиль выжы, мукет калыкъёс пӧлын каргам калык вал, табере Мон тӥледыз утё, тӥ бакель карем калык луоды; эн кышкалэ, киосты мед юнмалозы! 14Уго тазьы шуэ Саваоф Кузё-Инмар: атайёсты Мынэсьтым вожме поттыса улыку, Мон малпай тӥледыз вӧсь карыны, со малпанме ӧй вошты, – шуэ Саваоф Кузё-Инмар. 15Тани Иерусалимлы, Иуда выжылы та виын нош ик ӟеч карыны малпай; эн кышкалэ! 16Тани кыӵе ужъёс лэсьтыса улыны тӥ кулэ: ог-огеныды ӧрекчаськытэк вераське; капка дорады ог-огдэс гажаса, шонерлыко судить каре. 17Одӥгдылэн но сюлмады матысьтылы пумит урод малпан медаз улы, ӧрекчи кыл сётонъёсты эн яратэ, уго ваньзэ сое Мон адӟонтэм карисько», – шуэ Кузё-Инмар.
18Саваоф Кузё-Инмар дорысь мыным верамын вал: 19«Тазьы шуэ Саваоф Кузё-Инмар: ньылетӥ толэзе визян (кӧс утён), витетӥ толэзе визян, сизьыметӥ толэзе визян, дасэтӥ толэзе визян Иуда выжылы шумпотон ваёз, шумпотон-шулдыръяськонлы пӧрмоз; только зэмлыкез, тупаса улонэз яратэ. 20Тазьы шуэ Саваоф Кузё-Инмар: трос калыкъёс, трос городъёсын улӥсьёс эшшо татчы лыктылозы; 21одӥгаз городын улӥсьёс мынозы мукетаз городын улӥсьёс доры но шуозы: ”Ойдолэ, Кузё-Инмар азе вӧсяськыны мыноме, Саваоф Кузё-Инмарез утчаломе”; ваньзы шуозы: ”Мон но мыно”. 22Трос выжыос, кужмоесь калыкъёс Иерусалиме Саваоф Кузё-Инмарез утчаны, Кузё-Инмар азьын вӧсяськыны лыктозы. 23Тазьы шуэ Саваоф Кузё-Инмар: со нуналъёсы тазьы луоз: вань кылъёсын вераськись калыкъёс пӧлысь дас мурт басьтӥськоз, иудей пилэн дӥсянэзлэн сӧзы бордаз кутӥськозы но шуозы: ”Ми тон сьӧры мыномы, уго кылӥмы, Инмар тӥ пӧлын улэ шуыса”».
Currently Selected:
Захария 8: УДМБИБ
Highlight
Share
Copy
Want to have your highlights saved across all your devices? Sign up or sign in
(c) Библияез берыктонъя Институт, Хельсинки, 2013; 2016
