Захария 13
13
13-тӥ ЛЮКЕТ
1Со нуналэ Давид выжылы, Иерусалимын улӥсьёслы сьӧлыксылэсь, кырсьсылэсь гылтӥськон понна ошмес усьтӥськоз. 2Со нуналэ тазьы луоз, – шуэ Саваоф Кузё-Инмар, – та музъем вылысь сульдэръёслэсь-идолъёслэсь нимъёссэс Мон быдто, соосты азьланяз буре вайись уз ни луы, музъем вылысь ӧрекчи пророкъёсты, сьӧдъёслэсь духсэс но улляло. 3Соку тунаськыса азьпалзэ верасьлы вордэм атаез, вордэм анаез шуозы: «Тыныд улыны уг ни яра, уго тон Кузё-Инмарлэн нимыныз ӧрекчаськыса вераськиськод». Тунаськыса азьпалзэ веран дыръяз сое вордэм атаез, вордэм анаез виёзы. 4Со нуналэ асьсэлэн ӧрекчи адӟонъёссы пыр таӵе азьпалзэ тунаськыса тодытӥсьёс возьытэ вуозы, тунаськыса, азьпалзэ вераса улӥзы-вылӥзы ке; азьланяз ӧрекчаськон понна бышкись дӥськут уз ни дӥсялэ. 5Ваньзы шуозы: «Мон пророк ӧвӧл, мон – музъем ужась, уго кин ке но монэ пичи дырысеным ляльчи кариз». 6Солы шуозы: «Малы тынад ки вылъёсад яра бервыл вурысъёс?» Со ответ сётыса шуоз: «Монэ яратӥсьёслэн юртазы жугем бере соос кылдӥзы». 7Э, тӥр-пурт! Ӝутӥськы Мынам возьмаськисе вылэ, Мынам матысе вылэ, – шуэ Саваоф Кузё-Инмар, – возьмаськисез погырты, соку ыжъёс пазьгиськозы! Соку Мон киме покчиос пала берыкто. 8Кузё-Инмар шуэ: быдэс музъем вылын тазьы луоз: отысь кык люкетэз быдтэмын луоз, кулозы, нош куинетӥ люкетэз отчы кылёз. 9Та куинетӥ люкетэз тыл пушкы пырто но ӵыжато соосты, кызьы ӵыжато азвесез, сузяло соосты, кызьы сузяло зарниез: соос Мынам нимылы вазиськыса улозы, нош Мон соослэсь вазиськемзэс кыло но шуо: «Та Мынам калыке». Соос шуозы: «Мынам Инмаре Кузё-Инмар!»
Currently Selected:
Захария 13: УДМБИБ
Highlight
Share
Copy
Want to have your highlights saved across all your devices? Sign up or sign in
(c) Библияез берыктонъя Институт, Хельсинки, 2013; 2016
