Захария 14

14-тӥ ЛЮКЕТ

1Тани, Кузё-Инмарлэн нуналыз матэ вуэ, тынэсьтыд лушкам-таламзэс тон пушкын люкылозы. 2Вань калыкъёсты Иерусалимлы пумит ожен мыныны люкало, город киултэмын луоз, коркаосты таркалозы, нылкышноосты сантэмалозы; вань улӥсьёс пӧлысь ӝынызэ пленэ нуозы; городэ кылем калык быдтэмын уз луы. 3Соку Кузё-Инмар султоз но та калыкъёс вылэ урдскоз, кызьы Со урдскиз ожмаськон дыръя. 4Со нуналэ Солэн пыдыз Елеон гурезь вылэ султоз; со сылэ Иерусалим азьын, шундыӝужан палаз; Елеон гурезь шундыӝужанысен шундыпуксён палозь шори вайяськоз, туж бадӟым нёжал кылдоз; гурезьлэн ӝыны люкетэз уйпала кылёз, нош ӝыны люкетэз – лымшор пала. 5Нош тӥ Мынам гурезьёсы вискысь нёжалтӥ бызьыса кошкоды, уго гурезьёс вискысь нёжал Асилозь кыстӥськоз; тӥ бызёды Иудеяын Озия эксэйын пукон нуналъёсы луэм музъем зуркан дыръя кадь; соку Мынам Инмаре Кузё-Инмар вань святойёсыныз ӵош лыктоз. 6Со нуналэ тазьы луоз: югыт уз луы, югыт сётӥсь кизилиос палэнскозы. 7Со одӥг нунал гинэ, Кузё-Инмарлы гинэ со тодмо: нунал но ӧвӧл, уй но ӧвӧл; ӝыт гинэ югыт потоз. 8Со нуналэ тазьы луоз: Иерусалимысь улэп вуос бызьыны кутскозы: ӝыныез шундыӝужанпал зарезе бызёз, солэн мукет ӝыныез шундыпуксёнпал зарезе бызёз: гужем но, толалтэ но озьы луоз. 9Кузё-Инмар быдэс музъем выллы Эксэй луоз; со нуналэ одӥг Кузё-Инмар луоз, Солэн нимыз но – одӥг. 10Быдэсак та музъем нёжал выллем луоз, Гаваонысен Иерусалимлэн лымшорысьтыз Реммонозь кыстӥськись нёжал кадь, Иерусалим ас интыяз вылӥын сылоз, улыны интыяськозы Вениамин капка дорысен нырысетӥ капка дорозь, сэрегысь капка дорозь, Ананеил каланча дорысен эксэй виноград вина нюртон дорозь. 11Отын улозы, карган-юриськон уз ни луы, нош Иерусалим кышкатэк улыны быгатоз. 12Иерусалимлы пумит ожмаськись вань калыкъёс вылэ Кузё-Инмар тани кыӵе висён-курадӟон сётоз: ваньзылэн мугорзы куасьмоз, асьсэос пыд йылазы ке но сыло; синъёссы син пасязы ик сылмозы, кылзы ым пушказы куасьмоз. 13Со нуналэ тазьы луоз: соос куспын Кузё-Инмар дорысь потэм бугыръяськон ӝутскоз, огез мукетызлэсь кизэ кутоз, матысь муртэз вылэ кизэ ӝутоз. 14Ачиз Иуда но Иерусалимлы пумит ожмаськоз, котырысьтызы вань калыкъёслэн узырлыксы – туж трос зарни, азвесь, дӥськут – люкамын луоз. 15Таӵе ик висён-курадӟон вуоз станэн сылон интыысьтызы валъёс, мулъёс, верблюдъёс, ишакъёс – вань пудо-живот вылэ. 16Собере, Иерусалимлы пумит лыктылӥсьёс пӧлысь, кылемез вань калыкъёс арлы быдэ татчы лыктозы Эксэйлы, Саваоф Кузё-Инмарлы, йыбырттыны, Тылыс Пуктон праздникез ортчытыны. 17Озьы луоз: музъем вылысь кудӥз ке выжы Иерусалиме Эксэйлы, Саваоф Кузё-Инмарлы, йыбырттыны ӧз ке мыны, соос дорын куазь уз зоры. 18Египет выжы сюрес вылэ ӧз ке ӝутскы, [татчы] ӧз ке лыкты, соку со дорын но зор уз луы, висён-курадӟон со доры вуоз, – Тылыс Пуктон праздникез ортчытыны лыктымтэ калык вылэ Кузё-Инмарлэн сётэм висён-курадӟонэз со доры вуоз. 19Тӥни мар луоз Египетлэн сьӧлыкез понна, Тылыс Пуктон праздникез ортчытыны лыктымтэ вань калыкъёслэн сьӧлыксы понна! 20Со виын валлэн йыраз понэм сермет вылын но гожтэмын луоз: «Кузё-Инмарлы сӥзем святыня»; Кузё-Инмарлэн коркасьтыз пуртыос алтарь азьысь курбон чашаос кадесь луозы. 21Иерусалимысь, Иудеяысь вань пуртыос Саваоф Кузё-Инмарлы сӥзем святыняосыз луозы, курбон сётӥсьёс ваньзы лыктозы но соосты басьтозы, пӧзьтӥськозы, со нуналэ Саваоф Кузё-Инмарлэн корказ одӥг но хананей мурт уз ни луы.

Currently Selected:

Захария 14: УДМБИБ

Highlight

Copy