Лыдпусъёс 3
3
3-тӥ ЛЮКЕТ
1Кузё-Инмар Сӥнай гурезьысен Моисеен вераськон вакытэ Ааронэн Моисейлэн таӵе ӵыжы-выжыоссы вал: 2Ааронлэн нырысь вордскем пиезлэн нимыз Надав, собере вордскизы Авиуд, Елеазар но Ифамар; 3та Ааронлэн вӧйын зырӟыса пуктэм пиосызлэн, священникъёслэн, нимъёссы; священникъёслэсь ужъёссэс быдэсъянэ соосты пуктӥз Аарон; 4нош Надавен Авиуд Сӥнай луоё кыр дуннеысен Кузё-Инмарлэн азяз мурт тылэз ваемзы бере Со азьын кулӥзы, соослэн нылпизы ӧй вал; атайзы, Аарон, вӧзы священнике кылизы Елеазарен Ифамар.
5Кузё-Инмар Моисейлы тазьы вераз, тазьы шуиз: 6«Левийлэсь выжызэ вай но Аарон священник азе пукты, со вылэ ужаса-тыршыса соос мед улозы; 7со понна соос возьмаськисьёс мед луозы, вӧсяськон скиния бордын вань калык понна возьмаськисьёс мед луозы, скинияын вӧсяськонъёс мед ортчытъялозы; 8вӧсяськон скинияысь вань тӥрлыкез мед утёзы, скинияын ужаса-тыршыса мед улозы, израиль пиос понна возьмаськисьёс мед луозы; 9левитъёсты Аарон [агаед] кие, солэн пиосыз, [священникъёс,] кие сёт: израиль пиос пӧлысь соос сётэмын мед луозы; 10Ааронлэн но солэн пиосызлэн киулазы [сӥзён-косонэн скинияез] сёт, асьсэлэсь священник ужзэс мед чаклалозы-утёзы, [озьы ик ваньзэ, мар вань курбон сётон ӝӧк котырын, мар вань катанчи сьӧрын, мед чаклалозы-утёзы]; кин ке но палэнысь мурт татчы пыриз ке, виемын луоз».
11Кузё-Инмар Моисейлы тазьы вераз, тазьы шуиз: 12«Тани, Мон израиль пиос пӧлысь анайзылэсь пушсэс усьтыса нырысь вордскемъёс интые соос пӧлысь левитъёсты басьтӥ [соос нырысь вордскем израиль пиослэн воштӥсьсы луозы]; левитъёс Мынам ужась-тыршисьёсы луыны кулэ, 13уго ваньмыз нырысь вордӥськемъёс – со Мынамъёс; Египет музъемысь ваньзэ нырысь вордскемъёсты виён нуналам Мон Израильысь нырысь вордскемъёсты Аслым дун-чылкыт кари – адямиос бордысен кутскыса пудо-живот дорозь; соос Мынамъёс луыны кулэ. Мон – Кузё-Инмар».
14Кузё-Инмар Сӥнай кыр дуннеысен Моисейлы тазьы шуиз: 15«Левийлэсь пиоссэ семьяен-семьяен, выжыен-выжыен лыдъя-ӵота, вань пиосмуртъёсты – кинлы одӥг толэзь тырмемын ни, солэсь но бадӟымъёссэ, ваньзэсты лыдъя-ӵота». 16Кузё-Инмарлэсь косонзэ быдэстыса, Моисей [Ааронэн ӵош] соосты лыдъяз-ӵотаз. 17Тани Левийлэн пиосыз, нимын-нимын вераса: Гирсон, Кааф но Мерари. 18Тани Гирсонлэн пиосыз асьсэ выжыен ӵош: Ливни но Шимей. 19Каафлэн пиосыз асьсэ выжыен: Амрам но Ицгар, Хеврон но Узиил. 20Мерарилэн пиосыз асьсэ выжыен ӵош: Махли но Муши. Тани Левийлэн пиосыз асьсэ семьяосынызы ӵош. 21Гирсон бордысь потэмын Ливнилэн выжыез, Шимейлэн выжыез: та Гирсон выжыос. 22Одӥг толэзь тырмем, солэсь но арлыдын бадӟым луэм пиосмуртъёс сизьым сюрс вить сю мурт лыдъямын-ӵотамын. 23Гирсон выжыос станзэс интыяны кулэ скиниялэн мышказ, шундыпуксён палаз; 24Гирсон пиослэн выжызылэн кивалтӥсь йырыз луэ Лаеллэн Елиасаф пиез; 25вӧсяськон скинияын Гирсон пиослы утьыны-возьманы косэмын скинияез, солэсь шобретсэ, вӧсяськон скинияе пырон дорысь катанчиез, 26скинияен курбон сётон ӝӧк котыртӥ лэсьтэм азбарысь ынъёсты, азбаре пырон дорысь катанчиез, скиниялэсь гозыоссэ, вань арбериосынызы ӵош. 27Кааф бордысь потэмын Амрамлэн выжыез, Ицгарлэн выжыез, Хевронлэн выжыез, Узииллэн выжыез: та Кааф выжыос. 28Одӥг толэзь тырмем, арлыдын солэсь но бадӟым луэм пиосмуртъёс тямыс сюрс куать сю мурт лыдъямын-ӵотамын. Соос вӧсяськон интыез утьыса возизы. 29Кааф пиослэн выжыоссы станзэс скиниялэн лымшор палаз пуктыны кулэ; 30Кааф пиослэн выжызылэн кивалтӥсь йырыз луэ Узииллэн Елицафан пиез; 31соослы ковчегез, ӝӧкез, югыт сётӥсь арбериез, курбон сётон ӝӧкъёсты, вӧсяськонын кутӥськись сосудъёсты, катанчиез бордысьтыз вань арбериосын возьманы-утьыны косэмын. 32Левитъёслэн кивалтӥсь йыръёссылэн кивалтӥсьсы луэ Аарон священниклэн Елеазар пиез; со кивалтэ вӧсяськон интыез утьыны-возьманы пуктэм муртъёсын. 33Мерари бордысь потэмын Махли выжы, Муши выжы: та Мерари выжыос; 34одӥг толэзь тырмем, арлыдын солэсь но бадӟымгес пиосмуртъёс куать сюрс кык сю мурт лыдъямын-ӵотамын; 35Мерари пиослэн выжызылэн кивалтӥсь йырыз луэ Авихаиллэн Цуриил пиез; соос станзэс интыяны кулэ скиниялэн уйпалаз; 36Мерари пиослы утьыны-возьманы косэмын скиниялэсь вӧлэм пулъёссэ, сюрыоссэ, юбооссэ, пыдул кутэтъёссэ, солэсь вань тӥрлыкъёссэ, вань пуктэтъёсынызы ӵош, 37азбарлэн котькуд палъёсысьтыз юбоосты, соослэсь пыдул кутэтъёссэс, майыгъёссэс, гозыоссэс. 38Нош скиниялэн азьпалаз, вӧсяськон скиниялэн шундыӝужан палаз, станзэс пуктыны кулэ Моисеен Аарон но солэн пиосыз, кинъёслы израиль пиос понна вӧсяськон интыез утьыны-возьманы косэмын; нош кин ке палэнысь мурт та уже пыриськиз ке, виемын луоз. 39Кузё-Инмарлэн косэмезъя ваньзэ-ӧвӧлзэ, выжыен-выжыен, вань пиосмуртъёсты – одӥг толэзьысен кутскыса солэсь но бадӟымъёссэгес Моисеен Аарон лыдъязы-ӵотазы – кызь кык сюрс левитъёсты.
40Кузё-Инмар Моисейлы тазьы шуиз: «Израиль пиос пӧлысь нырысь вордскем вань пиосты лыдъя, кинлы одӥг толэзь тырмемын ни, ваньзэ солэсь бадӟымъёссэ, ваньзэ нимын-нимын лыдъя; 41левитъёсты Мон понна басьты, – Мон Кузё-Инмар, – израиль пиос пӧлысь нырысь вордскем пиос интые левитъёсты басьты, нош левитъёслэсь пудозэс израиль пиослэн вань нырысь вордскем пудозы интые басьты». 42Кузё-Инмарлэн косэмезъя Моисей израиль пиослэсь вань нырысь вордскем пиоссэс лыдъяз-ӵотаз, 43одӥг толэзьлэсь но солэсь бадӟымъёсыз нырысь вордскем пиос, нимын-нимын вераса, кызь кык сюрс кык сю сизьымдон куинь мурт вал.
44Кузё-Инмар Моисейлы тазьы вераз, тазьы шуиз: 45«Израиль пиос пӧлысь нырысь вордскем пиос интые левитъёсты басьты, левитъёслэсь пудозэс но соослэн пудозы интые басьты; левитъёс Мынам мед луозы. Мон Кузё-Инмар. 46Нош израиль пиослэн нырысь вордскем пиоссы пӧлысь, кудъёсыз левитъёс сярысь лыдзыя мултэсгес луо, дун тырыса, кык сю сизьымдон куиньзэ мозмытоно: 47котькуд адями понна вить сӥкль басьты, вӧсяськон скинияысь сӥкльлэн секталаеныз мертаса басьты, одӥг сӥкльын кызь гера мед луоз, 48та азвесез Ааронлы, солэн пиосызлы сёт, левитъёслэн лыдынызы ӵошатыса, нырысь вордскем мултэс луэм пиосты дун тырыса мозмытон понна». 49Левитъёсын воштэм бере мултэс кылем йыръёсты дун тырыса мозмытыны сётэм азвесез Моисей бичаз, 50Израильлэн нырысь вордскем пиосызлэсь, вӧсяськон скинияысь сӥкльлэн секталаеныз мертаса, сюрс куинь сю куатьтон вить азвесь [сӥкль] басьтӥз. 51Кузё-Инмарлэн верам кылызъя [мултэс луэмъёсты] дунэн мозмытон понна сётэм азвесез Моисей Ааронлы, солэн пиосызлы сётӥз, кызьы Кузё-Инмар Моисеез лэсьтыны косӥз.
Currently Selected:
Лыдпусъёс 3: УДМБИБ
Highlight
Share
Copy
Want to have your highlights saved across all your devices? Sign up or sign in
(c) Библияез берыктонъя Институт, Хельсинки, 2013; 2016
