Лыдпусъёс 2
2
2-тӥ ЛЮКЕТ
1Кузё-Инмар Моисеен Ааронлы тазьы вераз, тазьы шуиз: 2«Вань израиль пиос асьсэлэсь станзэс асьсэ выжызылэн знамязы вӧзы пуктыны кулэ, семьяоссылэн пусъёссы вӧзы; вӧсяськон скиниялэн котыраз соос станзэс пуктыны кулэ. 3Вӧсяськон скиниялэн азяз, шундыӝужан палаз, станэз пукто: Иудалэн станэзлэн знамяез полкъёссы пӧлын сылэ, Иудалэн пиосызлэн кузёйырзы Аминадавлэн Наассон пиез луэ, 4солэн лыдъян-ӵотан пӧлы пырем ожгарчиосызлэн лыдзы сизьымдон ньыль сюрс куать сю мурт; 5со бӧрсьы станзэ пуктэ Иссахар выжы, Иссахар пиослэн кузёйырзы луэ Цуарлэн Нафанаил пиез, 6солэн лыдъян-ӵотан пӧлы пырем ожгарчиосызлэн лыдзы витьтон ньыль сюрс ньыль сю мурт; 7[соос бӧрсьы станзэ пуктэ] Завулон выжы, Завулон пиослэн кузёйырзы луэ Хелонлэн Елиав пиез, 8солэн лыдъян-ӵотан пӧлы пырем ожгарчиосызлэн лыдзы витьтон сизьым сюрс ньыль сю мурт; 9Иудалэн станэз борды лыдъян-ӵотан дыръя ваньмыз-ӧвӧлэз сю тямыстон куать сюрс ньыль сю мурт пыртэмын, полкен-полкен соос интыяськемын; соос нырысь радын мыныны кулэ. 10Рувимлэн станэзлэн знамяез лымшор палан сылэ, полкъёссы пӧлын; Рувим пиослэн кузёйырзы луэ Шедеурлэн Елицур пиез, 11солэн лыдъян-ӵотан пӧлы пырем ожгарчиосызлэн лыдзы ньыльдон куать сюрс вить сю мурт; 12со вӧзы Симеон выжы станзэ пуктэ, Симеон пиослэн кузёйырзы луэ Цуришаддайлэн Шелумиил пиез, 13солэн лыдъян-ӵотан пӧлы пырем ожгарчиосызлэн лыдзы витьтон укмыс сюрс куинь сю мурт; 14со бӧрсьы Гад выжылэн станэз, Гад пиослэн кузёйырзы – Регуиллэн Елиасаф пиез, 15солэн лыдъян-ӵотан пӧлы пырем ожгарчиосызлэн лыдзы ньыльдон вить сюрс куать сю витьтон мурт; 16лыдъян-ӵотан дыръя Рувимлэн станэз борды ваньмыз-ӧвӧлэз гожтэмын сю витьтон одӥг сюрс ньыль сю витьтон мурт, полкен-полкен соос интыяськемын; кыкетӥ радын соос мыныны кулэ. 17Вӧсяськон скиния мынӥз ке, левитъёслэн станзы станъёслэн шоразы луоз. Кызьы сыло, озьы ик мыныны кулэ, котькудӥз аслаз интыяз, знамяез вӧзын мыныны кулэ. 18Ефрем станлэн знамяез шундыпуксён палан сылэ, полкъёссы пӧлын, Ефрем пиослэн кузёйырзы – Аммиудлэн Елишама пиез, 19солэн лыдъян-ӵотан пӧлы пырем ожгарчиосызлэн лыдзы ньыльдон сюрс вить сю; 20со вӧзы интыяськоз Манассиялэн выжыез, Манассия пиослэн кузёйырзы луэ Педацурлэн Гамалиил пиез, 21солэн лыдъян-ӵотан пӧлы пырем ожгарчиосызлэн лыдзы куамын кык сюрс кык сю мурт; 22со бӧрсьы мынэ Вениамин выжы, Вениамин пиослэн кузёйырзы луэ Гидеонийлэн Авидан пиез, 23солэн лыдъян-ӵотан пӧлы пырем ожгарчиосызлэн лыдзы куамын вить сюрс ньыль сю мурт; 24лыдъян-ӵотан дыръя Ефремлэн станэз борды ваньмыз-ӧвӧлэз сю тямыс сюрс сю мурт гожтэмын, полкен-полкен соос интыяськемын; куинетӥ радын соос мыныны кулэ. 25Данлэн станэзлэн знамяез сылэ уйпалан, полкъёссы пӧлын, Дан пиослэн кузёйырзы луэ Аммишаддайлэн Ахиезер пиез, 26солэн лыдъян-ӵотан пӧлы пырем ожгарчиосызлэн лыдзы куатьтон кык сюрс сизьым сю мурт; 27со вӧзы станзэ пуктэ Асир выжы, Асир пиослэн кузёйырзы луэ Охранлэн Пагиил пиез, 28солэн лыдъян-ӵотан пӧлы пырем ожгарчиосызлэн лыдзы ньыльдон одӥг сюрс вить сю мурт; 29солэн сьӧраз [станзэ пуктэ] Неффалим выжы, Неффалим пиослэн кузёйырзы луэ Енанлэн Ахира пиез, 30солэн лыдъян-ӵотан пӧлы пырем ожгарчиосызлэн лыдзы витьтон куинь сюрс ньыль сю мурт; 31лыдъян-ӵотан дыръя Данлэн станэз борды ваньмыз-ӧвӧлэз сю витьтон сизьым сюрс куать сю мурт гожтэмын; соос ваньмыз бере знамяоссы улын мыныны кулэ». 32Тани та лыдъян-ӵотанэ пырем израиль пиос асьсэ семьяосынызы валче. Станъёсысь лыдъян-ӵотан пӧлы пыремъёс ваньмыз-ӧвӧлэз куать сю куинь сюрс вить сю витьтон мурт гожтэмын. 33Нош левитъёс израиль пиосын лыдъян-ӵотанэ ӧз пыре, малы ке шуоно Кузё-Инмар Моисейлы сыӵе косон сётӥз. 34Кузё-Инмар Моисеез мар лэсьтыны косӥз, израиль пиос ваньзэ быдэстӥзы: знамяоссы улэ станэн-станэн интыяськизы, мыныкузы но котькудӥз аслаз улы-бечеосыныз, семьяосыныз ӵош мынӥз.
Currently Selected:
Лыдпусъёс 2: УДМБИБ
Highlight
Share
Copy
Want to have your highlights saved across all your devices? Sign up or sign in
(c) Библияез берыктонъя Институт, Хельсинки, 2013; 2016