Михей 7
7
7-тӥ ЛЮКЕТ
1Куректон-кайгу мыным! Гужем емышъёсты бичам бере кадь, виноград мульыосты октэм бере кадь табере мон дорын сиыны одӥг мульы но, кисьмам емыш но ӧвӧл ни, кудъёссэ мынам лулы куре. 2Музъем вылэ гажась-жалясь адямиос ӧз ни кыле, адямиос пӧлын шонерлыкез яратӥсьёс ӧвӧл ни; ваньзы вир кисьтон понна лушкем ужъёс малпало; котькудӥз аслаз агай-вынызлы сьӧлтэт пуктэ. 3Соослэн киоссы уродэз лэсьтыны быгато; кивалтӥсь кузьымъёс куре, судья, мед-кузьым бичаса, судить каре, нош кузёйыръёс лулзылэсь лекесь кулэ каронъёссэс верало, суд ужез мыдланьто. 4Соос пӧлысь самой умоез но бышкись будослы укша, шонерлыко шуыса лыдӟиськисез но тёрнпу кенерлэсь уродгес, Тынад ивортӥсьёсыдлэн нуналзы, Тынад лыктон дырыд вуэ; табере соос доры куалектон вуоз. 5Эн оске эштылы, эн оскиське тодмоды вылэ; ымыдлэсь ӧссэ чакласа возь гадь вылад кыллисьлэсь. 6Пиез атайзэ возьытэ вуттэ, нылыз анаезлы пумит султэ, кенэз анайзылы пумит кариське; адямилэн тушмонъёсыз аслаз семья пушказ уло. 7Нош мон Кузё-Инмар шоры учкыса уло, монэ утись Инмар вылэ оскиськыса уло: Инмаре монэ кылоз. 8Тушмонэ, мон пумысен эн шумпоты! Мон уси ке но, султо; мон пеймыт азьын ке но, Кузё-Инмар мынам югытэ. 9Кузё-Инмар азьын мон сьӧлыкай, соин ик Солэсь вожпотонзэ вылам нуоно луисько, мынэсьтым ужме эскерытозяз-чаклатозяз, мыным суд лэсьтытозяз; соку Со монэ югыт азе поттоз, мон Солэсь шонер лэсьтэмзэ адӟо. 10Тае мынам тушмонэ адӟоз, сое возьытлык шобыртоз, кудӥз мыным шуэ: «Инмаред Кузё-Инмар кытын?» Со шоры синъёсы учкыса улозы, кызьы со ульчаысь дэри кадь лёгамын луоз. 11Борддоръёстэ ӝутон нуналэ, со нуналэ пуктон-косон палэнскоз. 12Со нуналэ тон доры Ассирияысь, Египет городъёсысь, Египетысен Ефрат шур дорозь, зарезь дурысен зарезь дорозь, гурезь дорысен гурезь дорозь кыстӥськись шаерысь лыктозы. 13Солэн улӥсьёсызлэн сьӧлыкъёссы понна, соослэн лек ужъёссы понна музъем кыр дуннелы пӧрмоз. 14Аслэсьтыд калыктэ, люкетлы басьтэм ыжъёстэ – Кармилын, нюлэскын асьсэ понна улӥсьёсты – бодыеныд возьма; вашкала аръёсы кадь Васанысь, Галаадысь возьёс кузя мед ветлозы! 15Египет музъемысь потэм нуналад кадь Мон солы паймымон ужъёс возьмато. 16Тае калыкъёс адӟозы но, туж ке но кужмоесь соос, возьытэ вуозы; ымзэс киынызы ворсалозы, пельёссы кылэмысь дугдозы; 17кый кадь сюез нюлозы, сюй нумыръёс кадь ватӥськон интыысьтызы потозы; милям Инмармылэсь Кузё-Инмарлэсь курдатскозы, Тынэсьтыд кышкатскозы. 18Кин Тон кадь законлы пумит улонъёсты куштӥсь Инмар, кылем люкетэдлы йыружъёс лэсьтэмзы понна сьӧлыкъёс гожъясьтэм? Пумтэм вапумъёс ӵоже вожзэ поттыса уг улы, уго Со гажась-жалясь, яратӥсь. 19Со нош ик асьмеды гажалоз-жалялоз, законлы пумит улэмъёсмес ӵошкатоз. Зарезьлэн пыдэстэм гуаз Тон куштод милесьтым вань сьӧлыкъёсмес. 20Иаковлы Тон оскымон луондэ, Авраамлы гажан-жаляндэ возьматод, соосты Тон дунне кутсконысен милям атайёсмылы сётыны сӥзид.
Currently Selected:
Михей 7: УДМБИБ
Highlight
Share
Copy
Want to have your highlights saved across all your devices? Sign up or sign in
(c) Библияез берыктонъя Институт, Хельсинки, 2013; 2016
