Михей 6

6-тӥ ЛЮКЕТ

1Кылзэлэ, мар шуэ Кузё-Инмар: «Султы, гурезьёс азе судэ султы, вырйылъёс мед кылозы тынэсьтыд куарадэ!» 2Гурезьёс, Кузё-Инмарлэсь судзэ кылзэ, тӥ но, музъемлэн юн инъетъёсыз, уго Кузё-Инмар Ас калыксэ судить кароз, Израильлэсь кылзэ юалоз. 3«Мынам калыке! Мар уродзэ Мон тыныд лэсьтӥ, маин улондэ секыт карыса вози? Вера Мыным. 4Мон тонэ Египет музъемысь поттӥ, ляльчи луон юртысь мозмытӥ, тынад азяд Моисеез, Ааронэз, Мариамез лэзи. 5Мынам калыке, тодад вай али, мар тыныд пумит лэсьтыны малпаз вал Моав кунлэн эксэез Валак, кыӵе ответ солы сётӥз Веорлэн Валаам пиез, мар луиз Сӥттимысен Галгалэ мыныкуд, Кузё-Инмарлэсь шонересь ужъёссэ тон мед тодмалод шуыса».

6«Маин мон Кузё-Инмар азе султом, Инмысь Инмар азе йыбырттыны? Со азе тылын сутӥськись курбонъёсын-а султом, одӥг аресъем ветылъёсын-а? 7Но луэ-а Кузё-Инмарлы яраны, сюрс ыжъёс сётыса яке шурысь ву мында вӧй вайыса? Солы мон нырысь вордскемме йыруж лэсьтэме понна сёто шат, мугорылэсь емышсэ лулылэн сьӧлыкез понна сёто шат?» 8Э, адями! Тыныд верамын ук, мар со ӟечлык, мар тынэсьтыд возьма Кузё-Инмар: ваньзэ шонер лэсьтоно, гажась-жалясь луонэз яратоно, Инмаред азьын зӥбыт-востэм улоно. 9Кузё-Инмарлэн куараез городлы вазиське, визьлык куалекъя Тон азьын: кылзӥське кивалтэт бодылэсь, кылзӥське Солэсь но, Кин сое пуктӥз. 10Сьӧлыклэсь кышкасьтэмлэн корказ ӧвӧл-а али но пӧяськыса поттэм ваньбур, вуззэс соос шонертэм уг мертало-а? Сыӵе уж – со юрӟым уж. 11Шонертэм мертаськонэн, алдаськон гираосын дун-чылкыт луыны быгатӥсько-а? 12Солэн узыръёсыз ялан ӧрекчаськыса уло, отын улӥсьёс но пӧяськон кылъёс верало, кылазы-ымазы соослэн ӧрекчаськон улэ. 13Соин ик сьӧлыкъёсыд понна Мон тонэ, бурмонтэмлы вӧсь карыса, тырттэм кельто. 14Тон сиськод, но кӧтыд уз тыры; кӧт пушкыд чутыръяса улоз; маид вань, сое утьыны тыршод, но сое утьыны уд быгаты, нош мае утьыны быгатод, сое тӥр-пурт улэ сёто. 15Кизёд, но уд ара; вӧйпу мульыосты нюртыса вӧй поттод, но вӧен уд зыраськы; виноград мульыостэ пызьыртыса, сок поттод, нош вина уд юы. 16Амврийлэн сямъёсыз тӥ дорын возиськизы, Ахав юртлэн вань ужъёсыз но, соослэн визь-кенешсыя тӥ лэсьтӥськоды; Мон тонэ тырттэм кельто, улӥсьёстэ серекъян-веран улэ кельто, Мынам калыке луыса вылысь тӥ сантэманэз ас вылады нуоды.

Currently Selected:

Михей 6: УДМБИБ

Highlight

Copy