Михей 5

5-тӥ ЛЮКЕТ

1Ожмаськись уллёлэн нылыз, табере ожмаськыны ӝутскы; асьмемыз котыртӥзы, Израильысь судьялэн бамаз ньӧрен жугозы.

2Тон но, Вифлеем-Ефрафа, Иудалэн сюрсъёсыз пӧлын тон пичи-а? Тон дорысь Мон понна потоз Со, Кин Израильлы Кузё луыны кулэ, Со пумтэм вапумъёслэн кутсконазы ик вал, бырисьтэм нуналъёслэн кутсконысенызы ик Со вал ини. 3Соин ик Со соосты дыр вуытозьлы кельтоз – нуны ваёно мурт нунызэ вайытозьлы кельтоз; соку Израиль пиос доры кылемез агай-вынъёссы но берытскозы. 4Соку Со султоз но Кузё-Инмарлэн кужыменыз, Ас Инмарезлэн Кузё-Инмарлэн нимызлэн быдӟымлыкеныз уллёзэ возьмалоз, соку соос кышкатэк улыны быгатозы, уго соку Со музъемлэн пумысеныз пумозяз быдӟым луоз. 5Со луоз тупаса улон. Ассур, милям музъеммы вылэ лыктыса, юртъеръёсамы пырыны турттӥз ке, солы пумит ми сизьым ыж возьмасьёсты, тямыс кивалтӥсьёсты султытомы. 6Ассурлэсь музъемзэ соос мечен возьмалозы, Немвродлэсь музъемзэ капка выжыозяз возьмалозы; Ассур музъемамы лыктӥз ке, улон интыямы пыриз ке, Со асьмемыз Ассурлэсь мозмытоз. 7Иаковлэн кылем люкетэз трос-трос калыкъёс пӧлын Кузё-Инмар дорысь потэм лысву кадь луоз, турын вылысь зор ву кадь, адямиослы тэрытскыса улоно уз луы, адями пиос вылэ оскиськыса улоно уз луы. 8Иаковлэн кылем люкетэз калыкъёс пӧлын, трос выжыос пӧлын улоз, кызьы лев нюлэскысь пӧйшуръёс пӧлын улэ, кызьы левпи ыж уллё пушкын улэ: со султэ ке, погыртэ но кеся, нокин но солэсь утьыны уз быгаты. 9Киыд тушмонъёсыд йылэ ӝутӥськоз, вань пумитъяськись муртъёсыд быдтэмын луозы. 10Со нуналэ тазьы луоз, – шуэ Кузё-Инмар, – пӧлысьтыд валъёстэ быдто, ожмаськон уробоостэ быдто; 11музъем вылысьтыд городъёстэ быдто, вань юнматэм изкаръёстэ куашкато; 12киысьтыд веднаськонъёстэ сэрпалто, пилемъёс шоры учкыса тунаськисьёсыд тынад уз ни луэ; 13тон дорысь йыбыртъян юбоостэ, сульдэръёстэ-идолъёстэ быдто, – азьланяз киыныд лэсьтэм арбериослы уд ни йыбыртъя; 14вӧсяськон тыпы сурдъёстэ быдто, городъёстэ тырттэм кельто. 15Мынэсьтым кылзӥськисьтэм калыкъёслы вожме поттыса, йыркурен пунэмзэ берыкто.

Currently Selected:

Михей 5: УДМБИБ

Highlight

Copy