Левит 3
3
3-тӥ ЛЮКЕТ
1Солэн курбонэз тупаса улонлы сӥзем курбон ке, сюро таза пудоез ке со курбонлы вае – ошсэ яке мессэ, Кузё-Инмарлы ваем курбон пудоезлэн нокыӵе но шекез медаз луы, 2курбон пудоезлэн йыр вылаз со кизэ мед поноз, вӧсяськон скинияе пырон ӧс дорын сое мед вандоз; нош Аарон пиос, священникъёс, курбон сётон ӝӧкез котыр ласянь вирен мед пазялозы. 3Тупаса улонлы сӥзем курбон пудолэсь со вань пуш кӧйзэ, пушказ люкаськем кӧез, Кузё-Инмарлы мед ваёз, 4кыксэ ик пеклязэ, соос вылысь, саур (макес) вылысьтыз кӧез, мус бордысьтыз кӧй пуйызэ мед ваёз; тае со пекляосын валче мед ваёз; 5Ааронлэн пиосыз тае курбон сётон ӝӧк вылын тылын ӝуась пу вылын, тылын сутӥськись курбонэн ӵош, сутозы: та Кузё-Инмарлы ярамон ческыт зын поттӥсь курбон.
6Тупаса улонлы сӥзьыса, со сюро векчи пудоез, таказэ яке мессэ, Кузё-Инмарлы курбон сётэ ке, ваем курбон пудоезлэн нокыӵе но шекез медаз луы. 7Ыжъёс пӧлысь со курбонзэ вае ке, сое Кузё-Инмар азе мед султытоз, 8курбон пудоезлэн йыр вылаз кизэ мед поноз но вӧсяськон скиния азьын сое мед вандоз, соку Ааронлэн пиосыз курбон сётон ӝӧкез котыр ласянь курбон пудолэн вирыныз мед пазялозы; 9тупаса улонлы сӥзьыса ваем курбон пудолэсь кӧйзэ Кузё-Инмарлы мед ваёз, ошиськыса улӥсь быдэс кӧй пуйызэ#3:9 кӧй пуйы – курдюк, сюрлы вӧзтӥ ик вандыса, вань пуш кӧйзэ, пушказ люкаськем кӧйзэ, мед ваёз, 10кыксэ ик пеклязэ, соос вылысь кӧйзэ, саур (макес) кӧйзэ, мус бордысьтыз кӧй люкаськон пуйызэ мед ваёз; тае со пекляосыныз валче мед ваёз; 11священник тае курбон сётон ӝӧк вылын сутоз: та тыллэн сиёнэз – Кузё-Инмарлы ваем курбон.
12Нош со кечъёс пӧлысь курбон сётэ ке, сое Кузё-Инмар азе мед султытоз. 13Кечезлэн йыр вылаз кизэ мед поноз но вӧсяськон скиния азьын сое мед вандоз, Ааронлэн пиосыз солэн вирыныз курбон сётон ӝӧкез котыр ласянь мед пазялозы; 14Кузё-Инмарлы курбон карыса, солэсь пуш кӧйзэ, пушказ люкаськем вань кӧйзэ, саламлы мед ваёз; 15кыксэ ик пеклязэ, вылысьтыз кӧйыныз валче, саур (макес) бордысь кӧйзэ, мус бордысьтыз кӧй люкаськон пуйызэ; тае со пекляосыныз валче мед ваёз; 16священник соосты курбон сётон ӝӧк вылын сутоз: та тыллэн сиёнэз – [Кузё-Инмарлы] ярамон ческыт зын поттон; вань кӧез Кузё-Инмарлы сётоно. 17Та пуктон-косон тӥляд выжыостылы пумтэм вапумъёс ӵожелы, вань улон интыосады утён понна сётэмын: нокыӵе но кӧез, нокыӵе но вирез эн сие.
Currently Selected:
Левит 3: УДМБИБ
Highlight
Share
Copy
Want to have your highlights saved across all your devices? Sign up or sign in
(c) Библияез берыктонъя Институт, Хельсинки, 2013; 2016
