Левит 19
19
19-тӥ ЛЮКЕТ
1Кузё-Инмар Моисейлы тазьы вераз, тазьы шуиз: 2«Вань израиль калыклы тазьы ялыса шу: ”Дун-чылкытэсь луэлэ, уго Мон Кузё-Инмар, тӥляд Инмарды, дун-чылкыт. 3Ваньды ас анайдылэсь, ас атайдылэсь кышкалэ, Мынэсьтым субботаосме утьыса улэ. Мон Кузё-Инмар, тӥляд Инмарды. 4Сульдэръёслы-идолъёслы эн йыбыртъялэ, ӵыжатыса-дурыса асьтэлы инмаръёс эн лэсьтэ. Мон Кузё-Инмар, тӥляд Инмарды. 5Кузё-Инмарлы тупаса улонлы сӥзем курбон сётӥськоды ке, со курбонэз Инмар дорысь асьтэлы ӟеч эрик басьтон понна сётэ: 6курбон сётон нуналады, ӵуказеяз но сое сие, нош куинетӥ нуналлы кылем курбон сӥльдэс тылын сутэ; 7куинетӥ нуналаз но сое сииды на ке, со юрӟым уж, со Инмарлы ярамон уз луы; 8кин со сӥлез сииз, со мурт ас вылаз сьӧлыкез нуоз, уго Кузё-Инмарлэсь святынязэ саптаз, со адями ас калыкез пӧлысь быдтэмын луоз. 9Ас музъем вылысьтыды юдэс аракуды, анадылэн пумозяз ик юдэс эн аралэ, арам бервылад усьылэм шепъёсты эн бича, 10виноград пурыостэ но одӥгтэм эн бича, виям виноград мульыостэ но эн бича – соосты куанер муртлы, сьӧрлось лыктэм муртлы кельты. Мон Кузё-Инмар, тӥляд Инмарды. 11Эн лушкаське, эн ӧрекчаське, огдэс огды эн пӧялэ. 12Ӧрекчаськыса Мынам нимыным кыл эн сётэ, аслад Инмаредлэсь нимзэ эн сантэма. Мон Кузё-Инмар, [тӥляд Инмарды]. 13Матысьтэ эн ултӥя, солэсь ваньбурзэ эн тала. Медъям муртэдлы дун тырондэ вуоно ӵукнаозьлы эн кельты. 14Пельтэм муртэ лек кылын эн куареты, синтэм мурт мед канжаськоз шуыса, солэн азяз номыр но эн поны – Инмаредлэсь [Кузё-Инмарлэсь] кышкаса ул. Мон Кузё-Инмар, [тӥляд Инмарды]. 15Судын ужъёсты сэрттыкуды-пертчыкуды, шонертэм эн лэсьтэ; куанер адями азьын эн чеберъяськы, сӥё-дано муртлы кельшыны эн тыршы; матысьтэ судить кариськод ке, шонер судить кар. 16Ас калыкед пӧлтӥ кыл нуллыса эн ветлы, матыседлэсь улонзэ быдтыны эн малпа. Мон Кузё-Инмар, [тӥляд Инмарды]. 17Сюлмыныд агай-выныныд тушмонъяськыса эн улы; матысь муртэдлэсь шексэ солэн азяз ик вера, соку со понна сьӧлык уд басьты. 18Ас калыкед пӧлысь нокин вылэ но йыркуръяськыса эн улы, уродлы пумит уродэн пунэмзэ эн берыкты; астэ кызьы яратӥськод, матысьтэ но озьы ик яраты. Мон Кузё-Инмар, [тӥляд Инмарды]. 19Мынэсьтым пуктон-косонъёсме быдэсъяса улэ; аслэсьтыд пудодэ мукет выжыысь пудоен эн ворттылыты; бусыдэ кык пумо будос кидысэн эн кизьы; кык пумо шортъёслэсь – ыжгонэн етӥнлэсь – куэм дӥсянэз эн дӥся. 20Кышнолы курам ляльчи нылмуртэн пиосмурт изиз ке, нош со нылмурт понна йырдон тыремын ӧвӧл на яке солы эрик сётэмын ӧвӧл на ке, соосты вӧсь карыны кулэ, но виыны кулэ ӧвӧл, малы ке шуоно со ляльчи ныл эрике лэземын ӧй вал на; 21со пиосмурт янгыш ужез понна Кузё-Инмарлы вӧсяськон скинияе пырон доры курбон сётыны така мед ваёз; 22янгыш уж понна курбонлы ваем така вирын священник сое Кузё-Инмар азьын лэсьтэм сьӧлыкезлэсь чылкытатоз-сузялоз, лэсьтэм сьӧлыкез куштӥськоз. 23[Инмарлэн Кузё-Инмарлэн тӥледлы сётоно] музъемаз вуиды ке, отчы емыш сётӥсь кыӵе ке но писпу мерттӥды ке, солэсь емышъёссэ кырсесь, сиыны ярантэмесь шуыса лыдъялэ: куинь ар ӵоже солэсь емышъёссэ кырсесь шуыса лыдъялэ, соосты сиыны уг яра; 24нош ньылетӥ араз солэн вань емышъёсыз Кузё-Инмарлэн праздникъёсызлы сӥземын луыны кулэ; 25нош витетӥ араз солэсь емышъёссэ сиыны быгатӥськоды ини, солэсь будэтэм вань емышъёссэ асьтэлы бичаны быгатӥськоды. Мон Кузё-Инмар, тӥляд Инмарды. 26Виро сиёнэз эн сие; эн тунаське, эн пелляське. 27Котыр ласянь йырдэс эн ӵышке, тушедлэсь дуръёссэ эн сӧры. 28Кинды ке кулӥз ке, мугордэс эн вандылэ, мугор вылады номыр но эн гожъялэ. Мон Кузё-Инмар, [тӥляд Инмарды]. 29Юмшаны-калгыны лэзьыса, нылдэ эн сапта, музъем азыса-калгыса медаз улы, юрӟым-кырсь ужъёсын музъем медаз пачылмы. 30Мынэсьтым субботаосме уте, вӧсяськон интыме но сӥлы карыса возе. Мон Кузё-Инмар. 31Кулэмъёслэн лулъёссылы ӧтьыса вазиськисьёслы тӥ эн вазиське, туноос доры эн ветлэ, соосын асьтэдыз эн сапталэ. Мон Кузё-Инмар, тӥляд Инмарды. 32Пурысьтам мурт пыриз ке, султы, пересь муртэ сӥлы кар, Инмаредлэсь [Кузё-Инмарлэсь] кышка. Мон Кузё-Инмар, [тӥляд Инмарды]. 33Сьӧрлось лыктэм мурт тӥляд музъемады улыны интыяськиз ке, сое ӝикатыса-ёртыса эн возе; 34сьӧрлось лыктыса тӥ доры улыны интыяськем мурт тӥ понна та музъемын пырак улӥсь муртэн одӥг радын мед сылоз; сое астэ кадь ик яраты, уго тӥ но вазен Египет музъемын сьӧрлось лыктэм калык вал. Мон Кузё-Инмар, тӥляд Инмарды. 35Судын шонертэм ужез эн лэсьтэ, – кузьдалаез-ӝуждалаез, секталаез, быдӟалаез мертакуды, эн ӧрекчаське. 36Весъёсты шонер мед мерталозы, гираосты ярамонэсь-шонересь мед луозы, ефа шонер, гин оскиськымон мед луозы. Мон тӥляд Инмарды Кузё-Инмар, Египет музъемысь тӥледыз поттӥсь. 37Мынэсьтым вань пуктон-косонъёсме быдэсъялэ, вань законъёсме но быдэсъялэ. Мон Кузё-Инмар, [тӥляд Инмарды]”».
Currently Selected:
Левит 19: УДМБИБ
Highlight
Share
Copy
Want to have your highlights saved across all your devices? Sign up or sign in
(c) Библияез берыктонъя Институт, Хельсинки, 2013; 2016
