Левит 17
17
17-тӥ ЛЮКЕТ
1Кузё-Инмар Моисейлы тазьы вераз, тазьы шуиз: 2«Ааронлы, солэн пиосызлы, вань израиль пиослы ялыса тазьы шу: ”Тани мар карыны косэ Кузё-Инмар: 3Израиль выжыысь кин ке [яке мурт калык пӧлысь лыктыса тӥ борды лякиськемъёс пӧлысь] кин ке ошпиез яке ыжез, яке кечез стан пушкын яке стан сьӧрын вандӥз ке, 4вӧсяськон скинияе пырон доры ӧз ке вайы [тылын сутӥськись курбон сётыны яке Кузё-Инмарлы ярамон, ческыт зын поттӥсь утиськон понна курбон сётыны ӧз ке вайы, кин ке стан сьӧрын вандӥз но вӧсяськон скинияе пырон доры ӧз ке вайы,] Кузё-Инмарлэн улон интыез азе Кузё-Инмарлы курбон ӧз ке сёты, со адямилы вир сьӧлык гожтэмын луоз – со вир кисьтӥз, та адями ас калыкез пӧлысь быдтэмын луоз; 5та со понна: израиль пиос курбон пудооссэс бусыосын медаз ни вандылэ, Кузё-Инмар азе, вӧсяськон скинияе пырон ӧс азе, священник доры мед вайылозы но, тупаса улонлы сӥзьыса, Кузё-Инмар азьын мед вандылозы; 6соку священник курбон пудолэн вирыныз вӧсяськон скинияе пырон дорын сылӥсь Кузё-Инмарлэн курбон сётон ӝӧк вылаз мед пазялоз, Кузё-Инмарлы, ческыт зын поттыса, кӧй мед сутоз. 7Азьланяз соос сульдэръёслы-идолъёслы, кудъёсыз сьӧрын соос Мынэсьтым куштӥськыса ветло, курбонъёссэс медаз ни вайылэ. Та пуктон-косон соос пӧлын выжыысь-выжыосы, пумтэм вапумъёс ӵоже мед улоз. 8Соослы эшшо тазьы шу на: ”Израиль калык пӧлысь, сьӧрлось тӥ пӧлын улыны лыктэм муртъёс пӧлысь кин ке но тылын сутӥськись курбон яке мукет курбон сётэ ке, 9но со курбон пудозэ вӧсяськон скинияе пырон доры Кузё-Инмарлы сётыны уг ке вайы, соку та адями ас калыкез пӧлысь быдтэмын луоз. 10Израиль калык пӧлысь, сьӧрлось тӥ пӧлын улыны лыктэм муртъёс пӧлысь кин ке но кыӵе ке но вирез сииз ке, соку Мон ымнырме со адями луллы пумит, вирез сиисьлы пумит, берыкто, со адямиез ас калыкез пӧлысь быдто, 11малы ке шуоно мугорлэн лулыз вир пушкын улэ, тӥлесьтыд лулдэс чылкытатон-сузян понна курбон сётон ӝӧк вылэ вир мед поноды шуыса Мон сыӵе косон тӥледлы сётӥ, уго таӵе вир лулэз чылкытатэ-сузя; 12со понна ик уго Мон израиль пиослы шуи: тӥ пӧлысь одӥг лул но вирез сиыны кулэ ӧвӧл, тӥ пӧлын улыны сьӧрлось лыктэм мурт но вирез сиыны кулэ ӧвӧл. 13Израиль пиос пӧлысь, тӥ пӧлын улыны сьӧрлось лыктэм муртъёс пӧлысь кин ке но пӧйшуракуз сиыны ярамон тылобурдоез яке пӧйшурез кутӥз ке, вирзэ быдэсак мед ӟизатоз, вир виям бервылэз сюен мед шобыртоз, 14уго котькуд мугорлэн лулыз – солэн вирыз, вирыз – солэн лулыз; со понна ик Мон израиль пиослы верай: нокыӵе но мугорысь вирез эн сие, малы ке шуоно котькыӵе но мугорлэн лулыз – солэн вирыз; кин вирез сииз ке, со быдтэмын луоз. 15Кин ке но – татын пырак улӥсь-а яке сьӧрлось лыктэм мурт-а со – кулэм пудоез яке пӧйшурен кесям пудоез сииз ке, со мурт дӥськутсэ миськыны кулэ, вуэн гылтӥськыны кулэ, но кырсез ӝытозь бордаз улоз, нош собере со чылкыт луоз ини; 16нош [дӥськутсэ] ӧз ке миськы, вылтырзэ ӧз ке гылты, законлы пумит улэмзэ ас вылаз нуоз».
Currently Selected:
Левит 17: УДМБИБ
Highlight
Share
Copy
Want to have your highlights saved across all your devices? Sign up or sign in
(c) Библияез берыктонъя Институт, Хельсинки, 2013; 2016
