Левит 13
13
13-тӥ ЛЮКЕТ
1Кузё-Инмар Моисейлы но Ааронлы тазьы вераз, тазьы шуиз: 2«Мугор вылаз кинлэн ке потос#13:2 потос – пыктос, пӧськы; карс – ку вылэ алясь гижло чер – лишай яке карс*, яке тӧдьы вишты потӥз ке, мугорысьтыз ку вылаз гижлочерлэн яраез адӟиськыны кутскиз ке, со муртэ Аарон священник доры яке солэн кудӥз ке но пиез доры, священник доры, вайыны кулэ; 3священник учкоз солэн мугор вылысьтыз яразэ, яра улысь пигон тӧдьы луэмын ке, яраез мугор пушкы пыдло пыремын ни ке, соку та гижлочерлэн тодметэз; священник сое учкоз но та мурт кырсь шуыса ялоз. 4Нош ку вылын тӧдьы вишты вань ке, но со мугор пушкы пыдло пыремын ӧвӧл ке, со улысь пигон тӧдьы луымтэ ке, священник та муртэ сизьым нуналлы калыклэсь висъяны кулэ; 5сизьыметӥ нуналаз священник сое нош ик учке; яраез азьвыл кадь ик возиськем ке, мугор вылаз вӧлдӥськымтэ ке, соку священник сое эшшо сизьым нуналлы калыклэсь висъяны кулэ. 6Сизьыметӥ нуналаз священник нош ик яраез чаклалоз-учкоз но, яраез ӟеч-ӟеч уг ни адӟиськы ке, мугорызлэн мукет интыосаз вӧлдӥськымтэ ке, священник та мурт сярысь со чылкыт шуыса ялыны кулэ: та карс бервыл; дӥськутъёссэ мед миськоз но со чылкыт луоз. 7Нош карсэз мугор вылаз вӧлдӥськыны кутскем ке, сузяськон понна священник доры ветлэм бераз ини, соку со кыкетӥ ползэ священниклы возьматӥськыны кулэ; 8священник адӟиз ке, карсэз мугор вылаз вӧлдӥське шуыса, со та мурт сярысь со кырсь шуыса ялыны кулэ: та гижлочер (проказа).
9Кин ке вылын гижлочерлэн яраосыз адӟиськизы ке, со муртэ священник доры вайыны кулэ; 10священник сое учкоз-чаклалоз: ку вылысьтыз пыктосэз тӧдьыалэс ке, пигонэз но тӧдьы луэм ке, пыктос вылаз сӥлез адӟиське ке, 11соку та кемаласьгес алям гижлочерлэн ку вылысь тодметэз; священник та мурт сярысь со кырсь шуыса ялыны но сое калыклэсь висъяны кулэ, уго со кырсь. 12Нош гижлочер ку вылтӥз туж ӝог аля ке, висисьлэсь быдэс мугорзэ – йырысеныз пыдозяз – басьтэм ни ке, кӧня адӟыны быгатэ священниклэн синмыз, 13адямилэсь быдэс мугорзэ гижлочер басьтэм ни шуыса, священник адӟиз ке, соку со висись мурт сярысь со чылкыт шуыса ялоз, малы ке шуоно ваньмыз тӧдьы луиз: со чылкыт луиз. 14Но солэн мугор сӥль вылаз кыре потӥсь яраос кылдӥзы ке, со чылкыт ӧвӧл ни; 15улэп сӥлез священник адӟиз ке, висись муртэ кырсь шуыса ялоз; кыре потэм сӥль кырсь шуыса лыдъяське: со – гижлочерлэн тодметэз. 16Нош кыре потэм сӥль воштӥськиз ке, тӧдьы луиз ке, соку со мурт священник доры мед лыктоз; 17священник сое учкоз-чаклалоз, яраез тӧдьы луэм ке, соку священник та висем адями сярысь чылкыт шуыса ялоз; со чылкыт.
18Кинлэн ке мугор вылаз пыктос вал но со бурмиз ке, 19но пыктос бервылаз тӧдьы потос яке тӧдьы вишты, яке гордалэс вишты потӥз ке, со мурт священник доры лыктыны кулэ; 20священник сое учкоз-чаклалоз но, яраез ку пушкы пырем ке, пигонэз тӧдьы луэм ни ке, священник та мурт сярысь кырсь шуыса ялоз: та гижлочерлэн яраез, со пыктос вылэ ӝужам; 21нош священник адӟиз ке, пыктос вылын пигонэз тӧдьы луымтэ шуыса, яраез кулэн пушказ пырымтэ ке, яраез син шоры усьымон ӧвӧл ке, соку священник та муртэ сизьым нуналлы калыклэсь висъялоз; 22нош яраосыз туж ӝог ку вылэ вӧлдӥськыны кутскизы ке, соку священник та мурт сярысь со кырсь шуыса ялоз: та яра висён; 23нош вишты интыяз ик кылиз ке, уг ни ке вӧлдӥськы, соку со пыктосэн висёнлэн бервылыз, священник та муртэ чылкыт шуыса ялоз. 24Нош кинлэн ке мугорызлэн ку вылаз сутӥськем бервылыз луиз ке, со бурмем яра бервылын гордалэс яке тӧдьы виштыез луиз ке, 25виштыё яра бервылысь пигон тӧдьы луэм но, яраез пыдло пырем ни шуыса, священник адӟиз ке, соку та гижлочер, со сутӥськем бервылэ алям; священник та мурт сярысь со кырсь шуыса ялоз – та гижлочерлэн яраез; 26нош виштыё яра бервылысь пигон тӧдьы ӧвӧл шуыса, священник адӟиз ке, со яра ку пушкы пырымтэ ке, эшшо ке, туж ик син шоры но уг йӧты, соку священник та муртэз сизьым нуналлы адямиослэсь висъялоз; 27сизьыметӥ нуналэ священник сое учкоз-чаклалоз, виштыез мугор вылэ туж ке вӧлдӥське, соку священник со сярысь кырсь шуыса ялоз – та гижлочерлэн яраез; 28нош вишты интыяз ик кыле ке, мугор вылэ уг вӧлдӥськы, эшшо ке, туж ик син шоры но уг йӧты, соку та пыктос сутӥськемлэн бервылыз; соку священник ялоз, та адями чылкыт шуыса, уго та сутӥськем яралэн бервылыз.
29Пиосмуртлэн яке кышномуртлэн йыр вылаз яке ангес вылаз яраез луиз ке, 30священник со яраез учкоз-чаклалоз, со ку пушкы пыремын ке, висись интыысь йырсиез, пигонэз ӵужпыр, векчи луэм ке, соку священник ялоз, та адями кырсь луэмын шуыса: со парша#13:30 парша – йырысь ку вылэ алясь гижло чер висён, со йыр вылэ яке ангес вылэ потэм гижлочер; 31священник со парша бервылэз учкоз-чаклалоз, парша куэ пыдло пырымтэ ке, висись интыысь йырсиез, пигонэз сьӧд ӧвӧл ке, соку священник паршаен висись муртэ сизьым нуналлы адямиослэсь висъялоз; 32сизьыметӥ нуналэ священник яраез учкоз-чаклалоз, парша мугор вылэ уг ке вӧлдӥськы, со вылын ӵужалэс йырсиез, пигонэз ӧвӧл ке, парша куэ пыдло пырымтэ ке, 33соку висисьлэсь йырсизэ, тушсэ ӵышконо, нош паршалэсь бервылзэ ӵышконо ӧвӧл, паршаен висись муртэ священник кыкетӥ ползэ калыклэсь сизьым нунал ӵожелы висъяны кулэ; 34сизьыметӥ нуналэ священник паршаен висись муртэ учкоз-чаклалоз, паршаез ку вылаз уг ни ке вӧлдӥськы, ку пушкы пыдло уг ни ке пыры, та мурт чылкыт шуыса, священник ялоз; та мурт дӥськутсэ мед миськоз но, со чылкыт луоз. 35Сое чылкыт шуыса ялэм бере паршаез ку вылаз туж юн вӧлмыны кутскиз ке, 36священник адӟиз ке, паршаез мугор вылаз вӧлдӥське шуыса, соку священник ӵужалэс йырсиез медаз ни утча – со мурт чылкыт ӧвӧл; 37нош парша ас куеныз кыле ке, со бервылэ сьӧд йырси, пигон мычиське ке, соку паршаез быриз но, адями чылкытаз; со чылкыт луэм шуыса, священник ялоз. 38Пиосмуртлэн яке кышномуртлэн ку вылаз виштыос, тӧдьы виштыос луизы ке, 39священник адӟиз ке, та муртлэн ку вылаз бездыт-тӧдьы виштыосыз вань, соку со тодоз, та ку вылэ карс алям шуыса: со мурт палась висёнэн уг висьы, со – чылкыт.
40Кинлэн ке йырысьтыз йырсиосыз потыны кутскиллям ке, соку та пилеш мурт – чылкыт; 41нош йырызлэн азьпал люкетаз йырсиез потэм ке, та йырситэк кылем мурт – чылкыт. 42Нош пилеш интыяз, гольык интыяз, тӧдьы яке гордалэс вишты потӥз ке, соку пилеш интые, гольык интые, гижлочер алям; 43священник сое учкоз-чаклалоз но адӟиз ке, та муртлэн пилеш интыяз, гольык йыр вылаз, яралэн пыктосэз тӧдьы яке гордалэс луэм ке, мугорысь гижлочерлэн пыктосъёсыз кадь ик, 44со мурт гижлочерен висись – кырсь со; священник со сярысь со кырсь шуыса ялыны кулэ, солэн йыр вылаз яраез вань. 45Гижлочерен висисьлэн яраосыз вань ке, солэн дӥськутэз кесямын луыны кулэ; йырыз шобыртэмын медаз луы, ым дорозяз со ворсамын луыны кулэ, со тазьы кесяськыны кулэ: ”Кырсь! Кырсь!” 46Вань улон нуналъёсаз, со вылын яраос вань на дыръя, сое кырсь шуыса мед лыдъялозы; кырсь со, со станлэн сьӧраз мукет интыын нимаз мед улоз.
47Гижлочерлэн яраез дӥськут вылын, ыжгон дӥськут вылын яке етӥн дӥськут вылын луиз ке, 48етӥнлэсь яке ыжгонлэсь пумем шорт бордын яке вамен шорт бордын, ку вылын яке кулэсь лэсьтэм кыӵе ке но арбериос бордын гижлочерлэн яраез луиз ке, 49дӥськут вылын, ку вылын яке вырт, вамен шорт вылын, яке кыӵе ке но ку арбери вылын вожпыръем яке гордпыръем виштыез луиз ке, – со гижлочерлэн яраез: священниклы сое возьматоно; 50священник яра интыез учкоз-чаклалоз, яраё луэм мае ке сое сизьым нуналлы адямиослэсь висъяса возёз. 51Сизьыметӥ нуналэ священник учкоз-чаклалоз яраё бервылэз, яра дӥськут вылтӥ, пумем шорт вылтӥ, вамен шорт вылтӥ, ку вылтӥ яке кулэсь лэсьтэм кыӵе ке арбери вылтӥ вӧлмем ке, соку та курыт, кырсь гижлочер; 52дӥськут вылын яке ыжгон, яке етӥн шортлэсь куэм пумем шорт вылын, вамен шорт вылын яке кулэсь лэсьтэм кыӵе ке тӥрлык вылын яраосыз вань ке, сое сутыны кулэ, уго та курыт гижлочер, сое тылын сутоно. 53Нош священник адӟиз ке, гижлочер дӥськут вылэ, пумем шорт вылэ, вамен шорт вылэ, кулэсь лэсьтэм тӥрлык вылэ вӧлдӥськымтэ шуыса, 54соку священник яраё тӥрлыкез миськыны но кыкетӥ ползэ, калыклэсь висъяса, сизьым нунал ӵоже ворсаса возьыны косоз; 55яраё луэм тӥрлыкез миськем бере яра туссэ воштымтэ, тӥрлык вылэ вӧлдӥськымтэ шуыса, священник адӟиз ке, соку та тӥрлык кырсь, сое тылын сут; кыр палтӥз яке пуш палтӥз яра сиыса пась сое карем; 56но священник адӟиз ке миськем бере яра бервыл ӟеч-ӟеч уг ни адӟиськы шуыса, соку священник со интыез дӥськут бордысь яке ку арбери бордысь, яке пумем шорт бордысь, вамен шорт бордысь ӟезьыса мед басьтоз. 57Нош яра нош ик дӥськут вылын, пумем шорт вылын, вамен шорт вылын яке кулэсь лэсьтэм арбери вылын адӟиськиз ке, соку та алясь яра – яраё тӥрлыкез тыл вылын сут. 58Нош дӥськутэз, выртэз, вамен шортэз яке кулэсь лэсьтэм арбериез миськид но, соос вылысь яраез быриз ке, соку та тӥрлыкъёсты кыкетӥ ползэ миськоно но, соос чылкытэсь луозы». 59Тани ыжгон яке етӥн дӥськут вылысь, пумем шорт вылысь, вамен шорт вылысь яке кыӵе ке но ку тӥрлык вылысь гижлочерлэн яраез сярысь гожтэм закон: кыӵе учыре соосты чылкытэсь яке кырсесь шуыса ялыны кулэ.
Currently Selected:
Левит 13: УДМБИБ
Highlight
Share
Copy
Want to have your highlights saved across all your devices? Sign up or sign in
(c) Библияез берыктонъя Институт, Хельсинки, 2013; 2016
