Иона 3
3
3-тӥ ЛЮКЕТ
1Кузё-Инмар дорысь Ионалы кыкетӥ ползэ верамын вал: 2«Султы, мын Ниневияе – бадӟым городэ – отын тодыты, мар Мон тыныд косӥ». 3Иона султӥз но Кузё-Инмарлэн верам кылызъя Ниневияе мынӥз; Инмар азьын Ниневия город пуш туж бадӟым вал – куинь нунал пыдын мынымон. 4Иона быдэс нунал ӵоже городтӥ ветлыса тодытӥз, со тазьы шуыса ивортӥз: «Эшшо ньыльдон нунал вань на, собере Ниневия куашкатэмын луоз!» 5Ниневияын улӥсьёс Инмарлы оскизы: визяны кулэ шуыса ялӥзы, бышкись чурыт дӥськут дӥсязы – бадӟымъёс но, пичиос но. 6Та веран Ниневиялэн эксэез доры вуиз, соку со эксэй пукон вылысьтыз султӥз, эксэй дӥськутсэ кылиз но, бышкись чурыт дӥськут дӥсяса, пень вылэ пуксиз. 7Эксэйлэн но аслаз кивалтӥсьёсызлэн нимынызы косон сётӥз, Ниневияын тазьы мед вералозы шуыса: «Адямиос но, пудо но, ошъёс но, ыжъёс но номыр но медаз сие, возь вылэ медаз потталэ, ву но медаз юэ. 8Бышкись чурыт дӥськутэн дӥсяськемын мед луозы адямиос но, пудо-живот но. Тэльмырыса бадӟым куараен Инмарлы вазиськыны кулэ, ваньмыз урод-лек сюрес вылысьтыз мед кожоз, киыныз урод ужъёс лэсьтэмысь мед дугдоз. 9Кин тодэ, оло нош Инмар вожзэ поттэмысь дугдоз, ӝуатскем йыркурзэ асьме бордысь палэнтоз, соку асьмеос ум быре». 10Инмар соослэсь ужъёссэс адӟиз, адӟиз, кызьы соос урод-лек сюрес вылысьтызы кожизы, шугадӟонзы пумысен соосты жаляз, шугадӟон соос вылэ лэзё шуиз но, ӧз лэзьы.
Currently Selected:
Иона 3: УДМБИБ
Highlight
Share
Copy
Want to have your highlights saved across all your devices? Sign up or sign in
(c) Библияез берыктонъя Институт, Хельсинки, 2013; 2016
