Иоиль 1
1
1-тӥ ЛЮКЕТ
1Вафуиллэн пиезлы Иоильлы Кузё-Инмарлэн верам кылыз. 2Кылзэ тае, пересь визьнодчиос, тае пеляды понэ, ваньды та музъем вылын улӥсьёс: тӥ улон вакытэ яке тӥляд атайёстылэн улоно нуналъёсазы луо вал-а таӵеос? 3Та сярысь асьтэлэн нылпиостылы вералэ; нош тӥляд нылпиосты асьсэлэн нылпиоссылы мед вералозы, нош соослэн нылпиоссы вуоно выжылы: 4гоно нумыр бере кылемзэ саранча сииз, саранча бере кылемзэ нумыръёс сиизы, нош нумыръёс бере кылемзэ бӧчыос-дургалиос сиыса быдтӥзы. 5Вина пӧлы выемъёс, сайкалэ, ваньды вина юисьёс, куараен бӧрдэ, викышъялэ виноград ву пумысен, уго со тӥляд ым дорысьтыды басьтэмын! 6Уго Мынам музъем вылам кужмо, лыдъянтэм трос калык лыктӥз; солэн пиньёсыз сьӧсь пӧйшурлэн кадесь, анлыосыз мумы левлэн кадесь. 7Виноград мерттосме тырттэм кельтӥз, смоквапуме тӥяз, гольык кельтытозяз, сулӥз но куштӥз; солэн вайёсыз тӧдьыесь луизы. 8Егит дырысьтыз кузпалзэ буре вайись, бышкись чурыт дӥськутэн дӥсяськем вылькен кадь викышъя! 9Кузё-Инмарлэн корказ салам нянь ваемысь, курбон-салам кисьтэмысь дугдӥзы; священникъёс – Кузё-Инмарлэн ужась-тыршисьёсыз – бӧрдо. 10Бусы тырттэм кельтэмын, музъем куректэ; уго ю-нянь быдтэмын, виноградпудлэн сокез быриз, вӧйпу куасьмиз. 11Нянь будэтӥсьёс, возьдаськыса ӵыжектэ, виноград будэтӥсьёс, чабей, йыды пумысен викышъялэ, бусыысь аранды куасьмиз-быриз уго. 12Виноградпуд куасьмиз, смоквапу шуяз; гранатпу, пальма, улмопу, бусыысь вань писпуос куасьмизы; соин ик адями пиос пӧлын шумпотон-шулдыръяськон быриз. 13Священникъёс, бышкись чурыт дӥськутэн думиськыса бӧрдэ! Алтарьын ужась-тыршисьёс, викышъялэ! Инмарелэн ужась тыршисьёсыз, пыре, бышкись чурыт дӥськутэныды кӧлэ, уго Инмардылэн корказ нянь курбонъёс уг ни сёто, кисьтоно курбон-саламъёс уг ни ваё. 14Визяны кутске, огазе люкаськыны кулэ шуыса ялэ, Инмардылэн Кузё-Инмарлэн корказ пересь визьнодчиосты ӧте, та кунысь вань улӥсьёсты но ӧте, Кузё-Инмарлы тэльмырыса вазиське. 15О, кыӵе нунал! Уго Кузё-Инмарлэн нуналыз матэ вуэ: Ваньмызлэсь Кужмо дорысь туркан-таркан кадь со лыктоз. 16Асьмелэн син азьысьтымы сиён-юон басьтэмын ӧвӧл-а, Инмармылэн коркасьтыз шумпотон, шулдыръяськон ӧз-а быры? 17Сюй комокъёс улэ сисьмиз кидыс, ю возён интыос тырттэм кылизы, ю кеносъёс куашкатэмын – ю-нянь ӧвӧл ни. 18Макем кесясько пудоос, ӝожмыт ветло ош уллёос, уго соосты возьман инты быриз! Курадӟо ыж уллёос но. 19Тыныд, Кузё-Инмаре, тэльмырыса вазиськисько: кыр дуннеысь турыно возьёсты тыл ӵушказ, бусыысь вань писпуосты гомась тыл сутӥз. 20Кыр пӧйшуръёс но Тыныд вазисько, уго бызись вуос куасьмизы, кыр дуннеысь пудо возьман интыосты тыл быдтӥз.
Currently Selected:
Иоиль 1: УДМБИБ
Highlight
Share
Copy
Want to have your highlights saved across all your devices? Sign up or sign in
(c) Библияез берыктонъя Институт, Хельсинки, 2013; 2016
