Аввакум 1
1
1-тӥ ЛЮКЕТ
1Аввакум пророклэн азьпалзэ адӟонэз.
2Кузё-Инмаре, трос пол-а Тыныд вазиськоно на – Тон монэ уд кылӥськы, ӝикатыса-ёртыса воземзы сярысь Тыныд мон викышъяса верало – Тон уд утьы-а? 3Сьӧсь ужъёсты адӟыны, курадӟонъёс шоры учкыны малы мыным эрик сётӥськод? Талан-лушкаськон, ӝикатыса-ёртыса возён мынам азям уло, тупатэк улон ӝутӥське, керетыса-ёртыса улон султэ. 4Таин сэрен закон кужымзэ ыштӥз, шонер судить карон но ӧвӧл ни: сьӧлыклэсь кышкасьтэм шонер улӥсез вормыса улэ бере, соин ик суд но мыдлань ортче. 5Калыкъёс пушкы учке, сак-сак кариськыса учке, соку тӥ туж паймоды; Мон уго тӥляд улоно нуналъёсады сыӵе уж лэсьто, – тӥледлы верасалзы ке со сярысь, тӥ солы ӧй оскысалды. 6Тани, Мон тӥледлы пумит халдейёсты ӝуто – лек сюлэмо, кутыса возьыны луонтэм калыкез, соос музъем вылтӥ пасьтана ветло, соослы сюрымтэ гуртъёсты киултон понна. 7Кышкыт, шурдыт со; солэн судэз ас кияз, кужымез но. 8Барслэсь шаплыесь солэн валъёсыз, ӝыт ветлӥсь кионъёслэсь но шаплыесьгес; пӧртэм пала вортто валъёсыз, кыдёкысь лыкто вал вылын ветлӥсьёсыз, шедьтэм сиёнэз вылэ тэтчись ӧрӟи кадь лобӟыса вуо. 9Тушмон калык таласькыны-лушкаськыны мынэ; ымнырзэ азьлань урдыса со, луоез кадь, адямиосты пленэ нуэ. 10Эксэйёсты со мыскыл каре, кивалтӥсьёсты унь-мань каре; вань юнматэм изкаръёсты серем гинэ каре: ӝикатэм кар котыре сюй ӝутэ но сое киултэ. 11Соку солэн духез эрказме но, со мылкыдыныз вылтӥяськыса ветлэ; со ас кужымезлы инмарлы кадь оскиське. 12Но Тон кутсконысеныз ик ӧвӧл-а мынам Инмаре Кузё-Инмар, Святое? Ми ум быре! Тон, Кузё-Инмаре, сое суд лэсьтыны гинэ лэзид! Мынам изгурезе! Вӧсь карон понна Тон сое пуктӥд. 13Тынад чылкыт синъёсыд сьӧсь ужъёс шоры учкыса улыны уг быгато, ӝикатыса-ёртыса возён шоры но учкыса улэмед уг луы. Малы тон сьӧсь муртъёс шоры учкыса улӥськод но номыр но уд кариськы, куке сьӧлыклэсь кышкасьтэм аслэсьтыз шонер улӥсез сыскыса ньылэ? 14Малы адямиосты зарезе чорыгез кадь кельтӥськод, кузётэм нюж кыстӥськыса ветлӥсьёсты кадь кулэтэм кариськод? 15Ваньзэс соосты тушмон визнанэн потта, аслаз казяз пыртэ, калтонэныз кутэ, соин ик шумпотэ, данъяське. 16Со понна казезлы курбон вае, калтонэзлы фимиам ӵындытэ, уго соосын со кӧй-вӧй пӧлын кадь улэ, шукрес сиён поттэ соосын. 17Со понна шат со казьзэ бушатылыны кулэ, дугдылытэк, жалятэк калыкъёсты жугыны кулэ?
Currently Selected:
Аввакум 1: УДМБИБ
Highlight
Share
Copy
Want to have your highlights saved across all your devices? Sign up or sign in
(c) Библияез берыктонъя Институт, Хельсинки, 2013; 2016
