Потон 36

36-тӥ ЛЮКЕТ

1Вӧсяськон интыез пуктыны Кузё-Инмарлэн визьлык, валан сётэм муртъёсыз, Веселеил, Аголиав но ваньзы визьлыко муртъёс, Кузё-Инмарлэсь вань косонъёссэ быдэсъяса ужаны кутскизы. 2Моисей ас дораз ӧтьытӥз Веселеилэз, Аголиавез, вань визьлыко кибашлы муртъёсты, кинъёслы Кузё-Инмар визьлык сётӥз, вань адямиосты, кинъёслэн сюлэмзы уж борды басьтӥськыны, ужаны куриськиз. 3Израиль пиослэсь вӧсяськон интыез пуктонлы [вань] кулэ луись ваем арбериоссэс ужаны кутскон вылысь Моисейлэсь басьтӥзы. Эшшо но эшшо ӵукналы быдэ израиль пиос ас мылкыд каремзыя саламъёс-кузьымъёс Моисей доры вайылӥзы на. 4Соку вань визьлыко кибашлы муртъёс, вӧсяськон интыын пӧртэм ужъёсты быдэсъясьёс, ужан удыссэс кельтыса, татчы лыктӥзы, 5соос Моисейлы тазьы шуизы: «Кузё-Инмарлэсь мар лэсьтыны косэмзэ санэ пононо ке, лэсьтӥськон ужлы калык мултэссэ вайыны кутскиз ини». 6Моисей косӥз но, солэн косонэз калык улон интыын ялэмын вал: пиосмуртъёс но, кышномуртъёс но вӧсяськон инты лэсьтонэ номыр но медаз ни вайылэ; калык вайылэмысь дугдӥз. 7Вань кулэ ужъёсты быдэсъян понна ваньмыз тырмыт вал ини, эшшо мултэсэз кылиз на.

8Скиния лэсьтон бордын ужасьёс пӧлысь вань визьлыко кибашлыос етӥн шортлэсь, чагыр, нап-горд, пеймыт-горд ыжгон шортлэсь дас кесэг басма куизы, соос вылэ быгатыса херувимъёслэсь тусбуйзэс пуктӥзы; 9котькудӥз кесэг кызь тямыс гырпум кузьда, котькуд кесэглэн пасьталаез ньыль гырпум пасьта; вань кесэгъёс огбыдӟаесь. 10Вить кесэгъёсты со огзы борды огзэс вуриз, мукетъёссэ но вить кесэгъёсты огзы борды огзэс вуриз. 11Одӥгезлэн кесэглэн дураз чагыр буёло шедьытэтъёс лэсьтӥз, мукет кесэглэн но дураз шедьытэтъёс лэсьтӥз – ог-огенызы герӟан понна; 12одӥгаз кесэг борды витьтон шедьытэт лэсьтӥз, мукет кесэглэн пумаз витьтон шедьытэт лэсьтӥз – соос ог-огенызы герӟасько; шедьытэтъёс ог-огзылэн ваче бериназы бырттэмын; 13витьтон зарни каптырна лэсьтӥз, одӥгзэ кесэгез мукетыныз кесэген каптырнаен шедьытъяса, одӥг огъя кесэг кариз, одӥг быдэс скиния пӧрмиз.

14Собере кеч гонлэсь скинияез шобыртыны кесэгъёс лэсьтӥз: дас одӥг огкадесь кесэгъёс лэсьтӥз; 15со кесэглэн кузьдалаез куамын гырпум кузьда, пасьталаез ньыль гырпум кузьда: дас одӥгез ик кесэгъёс огбыдӟаесь. 16Витьсэ кесэгез со нимысьтыз шедьытъяз, куатьсэ кесэгез нош нимаз шедьытъяз. 17Дурысь кесэглэн дураз, мукет кесэген герӟаськоно интыяз, витьтон шедьытэт лэсьтӥз, соин герӟаськись кесэглэн но дураз витьтон шедьытэт лэсьтӥз; 18витьтон ыргон каптырнаос лэсьтӥз шобретэз огазеян понна – одӥг быдэс шобрет мед луоз шуыса. 19Скиниялэсь шобретсэ горд буям така куослэсь лэсьтӥз, нош сое шобыртыны лыз куослэсь шобрет дасяз. 20Скиниялы сӥттимпулэсь шонер сылӥсь вӧлэм пулъёс дасяз: 21пуллэн кузьдалаез дас гырпум кузьда, котькудӥзлэн пуллэн пасьталаез одӥг но ӝыны гырпум кузьда; 22котькудӥзлэн пуллэн кык шипез вань, соос ог-огзылы ваче беринэ лэсьтэмын; скинияысь вань пулъёсты со тазьы дасяз. 23Скиниялэн лымшорпал люкетаз кызь таӵе пулъёс со дасяз, 24кызь сылӥсь пулъёс улэ ньыльдон азвесь пыдул кутэтъёс лэсьтӥз: одӥг сылӥсь пуллэн кык шипезлы кык пыдул кутэт, мукет сылӥсь пуллэн кык шипезлы кык пыдул кутэт; 25скиниялэн мукет, уйпал, люкетаз, кызь пулъёс дасяз, 26соослы азвесьлэсь ньыльдон пыдул кутэтъёс дасяз: одӥг сылӥсь пуллы кык пыдул кутэт, кык пыдул кутэт мукет сылӥсь пул улэ лэсьтӥз; 27скиниялэн мышпалтӥз, шундыпуксён палтӥз, куать сылӥсь пулъёс дасяз; 28скиниялэн мышпалась сэрегезлы кык сылӥсь пулъёс лэсьтӥз; 29улласянь соос герӟамын вал, вылласянь герӟамын вал одӥг кульчо борды: тазьы со огазеяз кыксэс ик, кык сэрегысь ик; 30тямыс сылӥсь пулъёс вал, дас куать азвесь пыдул кутэтъёс, котькуд сылӥсь пул улэ быдэн кык пыдул кутэтъёс лэсьтэмын.

31Сӥттимпулэсь сюрыос лэсьтӥз: витьсэ скиниялэн огпалысьтыз сылӥсь пулъёс борды шедьытыны, 32вить сюры скиниялэн мукет палысьтыз сылӥсь пулъёс борды шедьытыны, вить сюры скиниялэн мышпалаз сылӥсь пулъёс борды шедьытыны; 33шорысез сюры ортче сылӥсь пулъёслэн шортӥзы – одӥг пал пумысеныз мукет пал пумозяз; 34сылӥсь пулъёсты зарниен шобыртӥз, сюрыосты шедьытъян кульчоосты зарнилэсь лэсьтӥз, сюрыосты но зарниен шобыртӥз.

35Катанчиез чагыр, нап-горд, пеймыт-горд буям ыжгонлэсь, етӥн шортлэсь куиз, катанчи вылэ быгатыса херувимъёслэсь тусбуйзэс куиз. 36Катанчиез возьыны сӥттимпулэсь ньыль юбо лэсьтӥз но соосты зарниен шобыртӥз, зарни шедьытъянъёс дасяз, юбоослы азвесьлэсь ньыль пыдул кутэтъёс ӵыжатыса лэсьтӥз. 37Скинияе пырон доры катанчиез чагыр, нап-горд, пеймыт-горд ыжгон шортлэсь, етӥн шортлэсь пужыятыса лэсьтӥз, 38катанчиез ошыса возьыны вить юбо шедьытъянъёсынызы лэсьтӥз; юбоослэсь йылъёссэс но, герӟетъёссэс но зарниен шобыртӥз, соослы ыргонлэсь вить пыдул кутэтъёс лэсьтӥз.

Currently Selected:

Потон 36: УДМБИБ

Highlight

Copy