Потон 35

35-тӥ ЛЮКЕТ

1Моисей вань израиль калыкез огазе люказ, соослы со тазьы шуиз: «Тани кыӵе курон-косонъёсты быдэсъяса улыны косӥз Кузё-Инмар: 2куать нунал ӵоже ужъёстэс быдэсъялэ, нош сизьыметӥез нунал тӥ понна святой мед луоз, со – суббота, Кузё-Инмарлы сӥзем шутэтскон нунал. Котькудӥз со нуналэ ужась мурт виемын луоз; 3суббота нуналэ улон интыяды тылъёс эн ӝуатъялэ. [Мон Кузё-Инмар]». 4Вань израиль калыклы Моисей шуиз: «Тани кыӵеесь косонъёс сётӥз Кузё-Инмар: 5Кузё-Инмарлы кузьымъёстэс-саламъёстэс вае: котькудӥз но сюлэмыз куремъя Кузё-Инмарлы саламъёс-кузьымъёс мед ваёз – зарни, азвесь, ыргон, 6чагыр, нап-горд, пеймыт-горд ыжгон шорт, [черсэм] етӥн шорт но кеч гон, 7такалэсь горд буям кузэ, лыз ку, сӥттимпу, 8лампадае понон вӧй, зырӟон вӧй пӧлы ческыт зын поттӥсь макеос, ӵындытыку ческыт зын поттӥсь макеос, 9оникс из, ефодэ, муресазе понон изъёс. 10Тӥ пӧлысь ваньмыз визьмо сюлэмоос мед лыктозы, мед лэсьтозы ваньзэ, мар косӥз Кузё-Инмар: 11скинияез но солэсь шобретсэ, вылысь шобретсэ, каптырнаос, вӧлэм пулъёс, сюрыос, юбоос, пыдул кутэтъёс, 12ковчег но солэсь сюрыоссэ, шобретсэ, пыран-потан пасез ворсась катанчи, [азбарлы ынъёс, юбооссэ, смарагд изъёс, фимиам, зырӟон вӧй,] 13ӝӧк но солэсь сюрыоссэ, солэн бордысьтыз вань тӥрлыкъёсты, со вылын возёно курбон няньёс, 14югдытон арбери, – со бордысь [вань] кулэ макеоссэ, солэсь лампадаоссэ, соос пушкы тырон вӧй, 15ӵындытон ортчытон курбон сётон ӝӧк, солэсь сюрыоссэ, зырӟон вӧй, ӵындытыны ческыт зын поттӥсь арбериос, скинияе пыронысь катанчи, 16тылын сутӥськись курбон сётон ӝӧк, со бордысь ыргон решётка, сюрыоссэ, со бордысь вань арбериосты, мисьтӥськон, солэсь сылон интызэ, 17азбарлэсь ынъёссэ, юбооссэ, соослэсь пыдул кутэтъёссэс, азбаре пырон дорысь катанчиез, 18скиниялэсь майыгъёссэ, азбарлэсь майыгъёссэ, соослэсь гозыоссэс, 19вӧсяськон интыын служить карон дӥськутэз, Аарон священниклэсь вӧсяськон дӥськутсэ, солэн пиосызлэсь служить карон дӥськутсэс».

20Собере израиль пиос ваньзы Моисей дорысь кошкизы. 21Ваньзы лыктӥзы, кинэ сюлмыз лыктыны косӥз, ваньмыз, кинэ духез лӧпкытӥз, Кузё-Инмарлы саламъёс-кузьымъёс вайылӥзы вӧсяськон скинияез пуктон понна, мар кулэ службаос ортчытъяны, [вань] вӧсяськон дӥськутъёс вурыны; 22картэн кышноос лыктылӥзы, вань калык сюлэмыз куремъя поскесъёс, угыос, зундэсъёс, чеберъян ошетъёс, пӧртэм пумо зарни арбериос вайылӥзы, кинлэн Кузё-Инмарлы зарни ваемез потылӥз; 23кинлэн чагыр, нап-горд, пеймыт-горд ыжгонэз, етӥн шортэз, кеч гонэз, горд буям така куосыз, лыз буёло куосыз, ваньзы соосты вайылӥзы; 24кин быгатӥз, ваньмыз азвесь яке ыргон Кузё-Инмарлы кузьымлы-саламлы вайылӥз; кинлэн сӥттимпуэз вал, со скиниялы кулэ арбериос лэсьтыны вайылӥз; 25вань сюлмынызы визьлыко вань кышномуртъёс, ас киынызы черсыса, чагыр, нап-горд, пеймыт-горд буям шорт, черсэм етӥн шорт вайылӥзы; 26вань мыло-кыдо, черсыны быгатӥсь кышномуртъёс кеч гонэз черсылӥзы; 27тӧроос оникс из, ефодэ, муресазе тыриськись из вайылӥзы, 28озьы ик ческыт зын поттӥсь макеос но лампадае тырон вӧй, зырӟон вӧез лэсьтыны, ческыт зыно ӵындытонъёс ортчытъяны; 29израиль калык пӧлысь вань пиосмуртъёс, кышномуртъёс, ӟеч уж лэсьтыны сюлэмзы ӝутскыку, Кузё-Инмарлэн Моисей пыр лэсьтыны косэм вань ужъёсызлы кулэ арбериосты вайылӥзы, ас мылкыдзыя Кузё-Инмарлы саламъёс вайылӥзы.

30Соку Моисей израиль пиослы шуиз: «Учкелэ, Кузё-Инмар Иуда выжыысь Орлэн Урий пиезлэсь Веселеил пизэ нимыныз ӧтьыса бырйиз, 31Инмарлэн Духеныз сое тыр кариз, солы пачылаз визьлык, валан, тодон, вань ужъёсты быдэсъяны быгатонлык сётӥз, 32чебересь басмаос куыны, зарнилэсь, азвесьлэсь, ыргонлэсь арбериос лэсьтылыны, 33дуно изъёсты вандылыса маке пушкы пуктылыны, пулэсь вӧлэм арбериос лэсьтыны – котькыӵе чеберлыко киужъёсты лэсьтыны быгатэ; 34солы но Дан выжыысь Ахисамахлэн Аголиав пиезлы мукетъёссэ дышетыны быгатонлык сётӥз; 35соосты визьлыкен тыр кариз, [вӧсяськон интыез чеберъян понна] лэсьтӥськыны-вӧлӥськыны, чебер куиськыны, чагыр, нап-горд, пеймыт-горд шортлэсь, етӥнлэсь куэм дэра вылэ пужыос пуктылыны кибашлыесь кариз, пӧртэм пумо басмаосты быгатыса куыны дышетӥз».

Currently Selected:

Потон 35: УДМБИБ

Highlight

Copy