1 Фессалоникаын улӥсьёслы 1

1-тӥ ЛЮКЕТ

1Павел, Сӥлуан но Тимофей – Инмар Атай но Кузё-Инмар Иисус Христос бордын улӥсь Фессалоникаысь черклы: Инмар Атаймылэсь но Кузё-Инмарлэсь Иисус Христослэсь дэлетсэ, каньыллыксэ тӥледлы сӥзиськомы.

2Ваньды понна ялан Инмарлы тау кариськомы, вӧсяськыкумы тӥледыз тодамы вайиськомы. 3Тӥлесьтыд осконэн ужамдэс, яратыса тыршемдэс, Кузё-Инмармы Иисус Христос вылэ оскиськыса, чидаса улэмдэс Инмар Атаймы азьын ялан тодамы вайиськомы. 4Инмарен яратэм агай-вынъёсы, ми тодӥськомы, тӥледыз Инмар бырйиз шуыса. 5Милям тодытэм Ӟеч Ивормы тӥ доры кыл вылын гинэ ӧз вуы, кужымен, Святой Духен со вуиз. Мур осконэн ми сое тодытӥмы. Тӥ асьтэос но тодӥськоды, кызьы ми тӥ дорын тӥледлы ӟеч лэсьтыны тыршыса улӥмы. 6Куректыса-кайгырыса улон дыръяды но Святой Духлэн дэлетэныз Инмар кылэз тӥ шумпотыса кабыл басьтӥды. Милесьтым но, Кузё-Инмарлэсь но адӟем карыса улыны тӥ кутскиды. 7Соин ик Македонияысь но Ахаияысь вань оскисьёс понна тӥ адӟем карымон муртъёс луиды. 8Кузё-Инмарлэн кылыз тӥ пыр Македонияе но Ахаияе гинэ ӧз вӧлмы, тӥляд Инмарлы осконды мукет интыосын но тодмо луиз. Милемлы номыр сярысь но вераны кулэ ӧвӧл ни. 9Уго соос асьсэос верало, кызьы ми тӥ доры вуимы, кызьы тӥ улэп, зэм Инмарлы ужан-тыршон понна, сульдэръёслы-идолъёслы йыбыртъянлэсь куштӥськыса, Инмар пала берытскиды 10но Инмысь Солэн Пиезлэсь лыктэмзэ возьманы кутскиды, Кудзэ Со кулэмысь улӟытыса султытӥз – Иисусэз, вуоно вожпотонлэсь асьмемыз Мозмытӥсез.

Currently Selected:

1 Фессалоникаын улӥсьёслы 1: УДМБИБ

Highlight

Copy