Павелонь сёрмац Филиппав 2

Уледа Христость лаца

1Тяфта, сяс мес Христосса кемокставихть тинь ваймонте, сяс мес Сонь кельгомац канды тейнть седиень петема, сяс мес тинь ули Ваймопожфонц мархта корхтаманте-ладяманте, ули фкя-фкянди кельгозь ужяльдеманте и фкя-фкянь сярятьфонь маряманте, 2пяшкодесть монь кенярдемазень: улеза ётксонт фкя мяль, сотовода фкя-фкянь мархта фкя кельгомаса, ладяда фкя-фкянь мархта и мяленте-арьсеманте улест фкат. 3Мезевок тяда тиенде эсь прянь кельгоманкса али стакащемда прянь няфтеманкса. Катк эрсь сятявста лувсы омбоцеть эстедонза оцюкс. 4Катк эрсь эздонт арьси аф аньцек эсь колганза, а тяфта жа лиятнень колганга.

5Катк тинь мяленте-арьсеманте улихть Христос Иисусть мялензон-арьсеманзон лаца:

6Сон фалу Шкай, и Сон сембе ширде кода Шкай,

но ашезе кирде Эсь прянц Шкайть мархта фкаксшиса,

7меколанкт, Сон шамдозе Эсь прянц.

Сон арась уре лаца и шачсь ломанькс,

и эрясь кода ломань ломаттнень ёткса.

8Сон нинге сядонга ёмлалгофтозе прянц,

улемок кулхцондыкс куломозонза,

мянь крёз лангса куломозонза.

9Тянкса Шкайсь кеподезе Сонь сембодонга вяри

и максозе Тейнза инь оцю лемть сембе лепнень коряс.

10Сяс Иисусть лемонц шнаманкса

комафтсазь плманжаснон сембе,

кит менельсот, модать лангсот и модать потмосот,

11и эрь кяльсь, Шкай Алять шнаманкса, азсы:

«Иисус Христос – Азорсь».

Катк тинь эряфонте валдоптыхть кода тяштть

12Кельгома ялгат, мзярда мон улень тинь ётксонт, тинь фалу уледе кулхцондыкс. А тяни, мзярда мон ашан мархтонт, уледа сядонга кулхцондыкс. Сяс пелезь-трнатозь тиесть семботь эсь идемантень инкса. 13Вдь тинь эсонт оцю вийса покоди Сонць Шкайсь, кона вятьсыне тинь мялентень и тевонтень: топафтовольхть Сонь пара арьсеманза тинь эряфсонт. 14Семботь тиендесть аф кропцязь и шава кизефксонь аф макссезь. 15Эста тинь ульхтяда аф муворукс и арукс, Шкаень афсатыксфтома идькс, конат эряйхть тяниень пингонь гастяф и виде киста шарфтф ломаттнень ёткса. Тинь валдопттада синь ётксост кода менелень тяштть, 16мзярда тиенттяда эряфонь максы валть коряс#2:16 али: «мзярда кандсасть эряфонь максы валть лия ломаттненди».. Эста, Христость сама шистонза, мон шнафтса прязень тинь мархтонт: аф стак мон ласьконь, аф стак покодень. 17Но кда тейне сави максомс эсь прязень озксказнекс тинь озксказнентень мархта, конань тинь кандсасть Шкайти эсь кемамантень вельде, эстонга карман кеняртькшнема и кеняртькшнема тинь сембонь мархтонт. 18Тянди тиньге кеняртькшнеда, кеняртькшнеда марса монь мархтон!

Тимофей и Епафродит

19Мон, надиямок Иисус Азорть лангс, курок кучса тейнть Тимофеень. Мрдамстонза сон азондсы тейне кода молихть тинь тевонте, и эста монга кенярдян. 20Вдь монь аш лия тяфтама лацон арьси ялгазе, кона тяшкава виде ваймот пичедель инксонт, 21сяс мес сембе вешендихть аньцек эстейст пара, а аф сянь, мезе Иисус Христость мяленц коряс. 22Тинь тинць содасасть сянь, кода Тимофей тевса няфтезе эсь прянц валонь кирдикс: сон лезнекшнесь тейне Пара кулянь пачфнемаса, кода цёрась алянцты. 23Тяфта, мон надиян кучемс сонь, кодак содаса, мезе кармай улема мархтон. 24Мон Азорса пяк кеман: курок монцьке саян тейнть.

25Но тяни мон лувса эрявиксоск меки кучемс тейнть Епафродит кемай ялгазень, кона мархтон покоди фкя тевса и мархтон вяти тюрема Пара кулянь тевть инкса. Тя тинь кучсесть сонь тейне лездоманди, мзярда тя эрявкшнесь тейне. 26Сонь пяк оцю мялец няемс тинь сембонь и аф мушенды эстейнза васта, сяс мес тейнть пачкодсь куля сонь сярядеманц колга. 27Тя виде, сон сярядсь и ульсь кулома лангса, но Шкайсь кельгозь ужяльдезе сонь, и аф аньцек сонь, но и моньге. Шкайть ашель мялец касфтомс монь ризфозень. 28Сяс мон куроконе кучса тейнть Епафродитонь. Вдь мзярда тинь тага васеттяда мархтонза, тинь пяк кенярттяда и эста монь седистон валги ризфсь. 29Сяс васьфтесть сонь оцю кеняртькс мархта и Азорть кельгомаса. Тяфтама ломаттнень кирдесть пара лувксса. 30Сяс мес Сон Христости покодемать инкса ульсь кулома лангса и эсь эряфонц аф ужяльдезь тиезе тейне сянь, мезе тинь ашеде машта тиемс.

Currently Selected:

Павелонь сёрмац Филиппав 2: ОС16

Highlight

Copy