Romanos 4

Abraham ö̧ji̧nö̧ huȩnȩ

1Ja̧'hua̧nö̧ ja̧'a̧nä̧ ¿tta̧'a̧nö̧ pätäcua'ajä̧ttö̧ tä̧do̧ mi̧nä̧ Abrahamrö? ¿Tta̧'a̧nö̧ jȩi̧nä̧ttö̧ Diosmä ja̧u̧cu̧ ji̧nä̧ ji̧yȩtȩ ja̧ pä'ömä Abrahamrömä? 2Dios Abraham adiu jȩi̧nö̧nä̧tä̧mä̧ chutäcu ji̧nä̧ ji̧yȩtȩ hua̧ ö̧ja̧ pä'ö jȩi̧nö̧ttö̧mä̧, chutä Abraham amönätä adiu ucuocuaji. Ja̧'hua̧nö̧ ja̧'a̧nä̧ Dios ä'cattömä amönätä adiu ucuocuocö pi̧na̧ji̧. 3Huȩyu̧cuä̧ Huȩnȩ ¿tta̧'a̧nö̧ päa'ajä̧ttö̧? “Abraham Diosrö esetinö. Abraham esetiyäcu, Dios jȩi̧nä̧cu̧ ja̧u̧cu̧ ji̧nä̧ ji̧yȩtȩ hua̧ ö̧ja̧ pä'ö.” 4Ya̧tȩ aditomenä, mippoönämä iyähuocö. Aditö micuätä i̧yä̧hua̧. 5Dios suronä jȩpä̧tö̧rö̧ jȩpö̧ ja̧u̧cu̧ ji̧nä̧ ji̧yȩtȩ huotö tta pä'ö ttesetomenätä, adiu jȩttö̧nä̧tä̧mä̧cö̧. Ya̧tȩ adiu jȩö̧ juiyönä hua̧rö̧ ja̧u̧ juäi adiu esetomenä, ja̧u̧ru̧ Dios jȩpö̧ ja̧u̧cu̧ ji̧nä̧ ji̧yȩtȩ ja̧ pä'ö. 6David'inä ttesehua pä'inödo ttamönä jȩttö̧nä̧mä̧cö̧, Dios ja̧u̧cu̧ ji̧nä̧ ji̧yȩtȩ huotö tta pä'ö jȩi̧nö̧nä̧. 7Ja̧'hua̧nö̧ pä'inödo David:

Eseunu ka̧cuä̧tö̧ suronä jȩttö̧ Dios jȩpö̧ icuina'attö, suronä jȩttö̧ rȩä̧chi̧'i̧na̧'a̧ttö̧.

8Eseunu̧ kö̧ suronä jȩö̧ U̧ru̧hua̧ jȩpö̧ hua'adö u̧ju̧no̧ca̧'a̧ttö̧.

9Ja̧'hua̧ ja̧'a̧ttö̧ ¿circuncisión jȩpä̧tö̧tä̧ esehuätö tä̧ji̧? ¿Circuncisión jȩpo̧co̧tö̧, esehuocotö tä̧ji̧? Täcö ji'ähuätöjä Abraham esetomenä, Dios jȩi̧nä̧cu̧ ja̧u̧cu̧ ji̧nä̧ ji̧yȩtȩ ja̧ pä'ö. 10Diosmä, ¿ti̧yȩnö̧ ȩmi̧nä̧ttö̧ Abrahamrö? ¿Circuncisión jȩö̧ juiyäi, ȩmi̧nä̧cu̧ tä̧ji̧? ¿Circuncisión jȩi̧nö̧ o'ca'a, ȩmi̧nä̧cu̧ tä̧ji̧? Circuncisión juiyäi ȩmi̧nö̧ Dios Abrahamrö. 11Abrahammä Diosrö esetinö o'ca'a, Dios hueinäcu Abraham circuncisión jȩa̧ pä'ö, o'ca toi'önä ttu̧huo̧jua̧ pä'ö. Ja̧'hua̧ta̧nö̧ Abraham circuncisión jȩö̧ juiyäi, Diosrö esetomenä, Dios Abrahamrö jȩpi̧nö̧ chutäcu ji̧nä̧ ji̧yȩtȩ ja̧ pä'ö. Ja̧'hua̧nö̧ ja̧'a̧ttö̧ o'ca toi'önä circuncisión jȩpo̧co̧tö̧ Diosrö esetätö, Abrahammä ttä'o jä̧cua̧. Ja̧'hua̧ta̧nö̧ Diosrö ttesetiyäcu, Dios jahuätörö jȩpö̧ ja̧u̧cu̧ ji̧nä̧ ji̧yȩtȩ huotö tta pä'ö. 12Ja̧'hua̧ta̧nö̧ circuncisión jȩpä̧tö̧'i̧nä̧ ttä'o päi'önä kö̧ Abrahammä. Ja̧'hua̧nö̧ ja̧'a̧nä̧ circuncisión jȩtti̧nö̧tä̧ amöcuädätö ttä'omäcö̧. Chutä Abraham circuncisión jȩö̧ juiyäi esetinö ta'anö esetätö ttä'o jä̧cua̧.

Dios iya päinömä, churutä esetäcuähuänätä iyö

13Pi̧jä̧ o'ca juiyönä Dios iya pä'inö Abrahamrö, i̧tti̧mö̧rö̧'i̧nä̧, chutä isotörö. Ja̧'hua̧nö̧ ja̧'a̧nä̧ Abrahammä Moisés hueähuä huȩnȩ hueö ta'anö jȩa̧'a̧ttö̧, iya pä'ocö pi̧nö̧ Dios. Abraham churutä Diosrötä eseta'attö, Dios jȩi̧nä̧cu̧ chutäcu ji̧nä̧ ji̧yȩtȩ ja̧ pä'ö. 14Dios pi̧jä̧ o'ca juiyönä Moisés hueähuä huȩnȩ hueö ta'anö jȩpä̧tö̧rö̧ iya päinöttömä, ja̧u̧nu̧mä̧ churutä Diosrö esetäcuähuämä yoröiso micuähuocö ja̧ji̧. Ja̧'hua̧ta̧nö̧ chutä Dios iya päinö huȩnȩ'i̧nä̧ micuähuocö ja̧ji̧. 15Moisés hueähuä huȩnȩ ttu̧ju̧nä̧ro̧mȩnä̧, tä̧bo̧cuä̧ ka̧'a̧. Hueähuä huȩnȩ juiyomenä, tä̧bo̧cuä̧'i̧nä̧ juiya'a.

16Dios iya pä'ö amöcuädinömä, churutä esetäcuähuänätä iyö. Ja̧u̧ mippoönä iya pä'inö o'ca toi'önä Abraham i̧tti̧mö̧ isotörö, Moisés hueähuä huȩnȩ jȩpä̧tö̧rö̧'i̧nä̧, Abraham esetinö ta'anö esetätörö'inä. Ja̧'hua̧nö̧ ja̧'a̧ttö̧ ja̧u̧ Abraham ujutu tä'o ja̧'a̧, o'ca toi'önä esetätömä. 17Huȩyu̧cuä̧ Huȩnȩ päa'a: “Ucuru hue'ipinösä recuätö ttö̧ja̧ ttä'o päi'önä.” Abraham Diosrö esetina'attö, micuähuinö ja̧u̧ huȩnȩ. 'Corujuo'ächinätörö'inä Diosmä tta̧'cua̧rö̧ iyö. Ja̧'hua̧ta̧nö̧ pi̧jä̧nä̧ juiyö'inä, kö̧nä̧ jȩpö̧ Diosmä.

18Abraham täbocö tta̧ttä̧rä̧cuä̧huo̧ca̧'a̧nä̧, esetö tta̧'ä̧rä̧cuä̧hui̧nö̧. Ja̧'hua̧nö̧ ja̧'a̧ttö̧ recuätö ttö̧ja̧ ttä'o pi̧nö̧, Dios päina'attö. Dios päinäcu: “Ja̧'hua̧nö̧ jä̧cua̧'a̧ ucu isotö.” 19Abraham cien du'huo tö'cö jö̧nä̧ huinö. Ja̧'hua̧ta̧nö̧ chutä'inä, Sara'inä 'corujuoächäcuähuä tö'cö huinätö. Juiyo böäcuächinätö pi̧nä̧tö̧ tti̧tti̧mö̧rö̧ ku̧nä̧rä̧cuä̧huä̧nä̧mä̧. Ja̧'hua̧nö̧ ja̧'a̧nä̧ Abrahammä Diosrö esetö, jaropi'ocö pi̧nö̧. 20Abraham jarode'ömä, “Dios päömä esetocösä” pä'ocö pi̧nö̧. Juhua'a yabonötä esetinö Diosrö. Diosrö eseunu ucuocuinö. 21Abraham adiu huo̧jui̧nö̧, Dios o'ca juiyönä päömä, ujurunä adiu jȩpö̧ pä'ö. 22Ja̧'hua̧nö̧ ja̧'a̧ttö̧ esetäjiyäcu, Dios jȩpi̧nö̧ chutäcu ji̧nä̧ ji̧yȩtȩ i̧sa̧ ja̧ pä'ö.

23Ja̧u̧ru̧ Dios jȩpi̧nö̧ chutäcu ji̧nä̧ ji̧yȩtȩ i̧sa̧ ja̧ pä'ö huȩyu̧cuä̧mä̧, ya̧tȩrö̧tä̧ Abrahamrötä huȩyu̧cuo̧ca̧'a̧. 24Ujuturu'inä huȩyu̧cua̧'a̧. Ujutu Diosrö tesetomenä, Dios ujuturu jȩpö̧ chutäcu ji̧nä̧ ji̧yȩtȩ huotö ta pä'ö. Dios ja̧'hua̧nö̧ jȩpö̧ ujuturu, Tu̧ru̧hua̧ Jesús ttoädinö huȩnȩ teseta'attö. 25Dios hue'inö Jesúsru 'corupäi'a pä'ö, ujutu suronä jȩtö̧ imitähua pä'ö. Ja̧'hua̧ta̧nö̧ Dios Jesúsru tto'ädinö, ujuturu jȩa̧ pä'ö chutäcu ji̧nä̧ ji̧yȩtȩ huotö ta pä'ö.

Currently Selected:

Romanos 4: PIDNT86

Highlight

Copy