Hebreos 9
9
Pi̧jä̧nä̧'i̧nä̧, mo̧ro̧jä̧nä̧'i̧nä̧ Diosrö ucuocuäcuähuä huȩnȩ
1Äcuomenä pä'äji huȩnȩ Diosrö ucuocuäcuähuä jȩttö̧ hueina'ado. Pi̧jä̧nä̧ Diosrö ucuocuäcuähuodenä jȩpi̧nä̧tö̧do. 2Pi̧jä̧ttö̧ Diosrö ucuocuäcuähuode pa̧'a̧nö̧ ji̧nodedo. Äcuomenä i̧so̧ca̧nä̧, Adihuo̧ca̧ pätto̧ca̧nä̧ lámpara ku̧nä̧huä̧cä̧'i̧nä̧, adihuä juäi pan'inä, mesa isodänä rötähua'a ki̧na̧'a̧do. 3Ju̧huȩnȩ yabonä, koro i̧sä̧ta̧ abonä, ko̧ro̧ca̧ ji̧na̧'a̧do. Ju̧huo̧ca̧ i̧mi̧mä̧ Ji̧nä̧ Isocu Adihuo̧ca̧ pätti̧no̧ca̧do. 4Ju̧huo̧ca̧nä̧ korodä, Diosrö ucuocu incienso pättö, adiu ameu juäi, ku icuähuodä, orottö adicuodä, ki̧na̧'a̧do. Ja̧'hua̧ta̧nö̧ i̧sä̧ca̧, orottö juä̧huä̧ca̧, hueähuä huȩnȩ ȩcä̧ca̧'i̧nä̧ ju̧huo̧ca̧nä̧tä̧ ki̧na̧'a̧do. Ja̧huä̧ca̧ i̧sä̧ca̧nä̧ koro juäi i̧sä̧yu̧, orottö adicuä̧yu̧'i̧nä̧, maná ȩcä̧yu̧ ki̧na̧'a̧do. Ja̧'hua̧ta̧nö̧ Aarón ö̧ä̧ro̧'quȩ ojiyä ba̧hui̧no̧'quȩ'i̧nä̧ ȩqui̧na̧'a̧do. Inädu, hueähuä huȩnȩ huȩyu̧cuädu'inä ȩqui̧na̧'a̧do. 5Ja̧huä̧ca̧ i̧sä̧ca̧ huämenä, koro juäi querubines pättö, ki̧na̧'a̧do. Ja̧u̧ juäi ka̧'a̧ttö̧, Dios kö̧ pä'inätödo. Ja̧u̧ juäi huotömä, ttujuabiyänä, suronä jȩtti̧nö̧ jȩpö̧ icuähuäca mö̧ttȩpa̧'a̧ ji̧na̧'a̧do. Ja̧'hua̧nö̧ ja̧'a̧nä̧ jitämä ja̧u̧ huȩnȩ juhua'a yabonö jitäu juiyö'a̧nö̧ ja̧'a̧.
6Ja̧'hua̧nö̧ o'ca juiyönä jo̧mȩ päi'omenä, sacerdotes huotö 'cuäopönä do'ächätödo äcuomenä i̧so̧ca̧nä̧ culto jȩtta̧ pä'ö. 7Ja̧'hua̧nö̧ ja̧'a̧nä̧ juhua'a yabocu i̧so̧ca̧nä̧ sacerdote ru̧hua̧ koro a̧'ȩ'i̧nä̧, koro a̧'ȩ'i̧nä̧ ya'utenätä do'ächödo. Ju̧huo̧ca̧nä̧ doächomenä, äji cuäcuähuotö ttucuoja ȩpö̧do, chutä suronä jȩö̧'i̧nä̧, korotö suronä jȩttö̧'i̧nä̧ micuä päi'önä. 8Ja̧'hua̧ ja̧'a̧nä̧ Espíritu Santo huo̧juȩcuä̧nä̧ huo̧juä̧tö̧jä̧. Äcuomenä i̧so̧ca̧ ji̧nä̧ ka̧'a̧nä̧, juhua'a yabocu i̧so̧ca̧nä̧, Ji̧nä̧ Isocu Adihuo̧ca̧mä̧, ji̧nä̧ 'chä̧cuä̧huo̧ca̧'a̧ ji̧na̧'a̧ huo̧juä̧tö̧jä̧. 9Ja̧u̧ juäi o'ca juiyönä jitä mo̧ro̧ päi'önä Diosrö ucuocuäcuähuode huo̧juȩcuä̧ huȩnȩdo. Juhua'attö ofrendascu, sacrificioscu Diosrö amöcuädö jȩtto̧mȩnä̧, jȩpä̧tö̧ ttamöcuädömä yoröiso adiunä aditö icuocödo. 10Ja̧u̧ juäimä, cuäcuähuättö'inä, ahuähuättö'inä, koro juäi jȩpö̧ töcö icuähuättö'inä, yoröiso huämenätä jȩä̧cuä̧hua̧'a̧do, Dios o'ca juiyönä pärou icuome jubö päi'önä.
11Ja̧'hua̧nö̧ ja̧'a̧nä̧ Cristo täcö ichinödo. Jitämä ja̧u̧mä̧ ji̧nä̧ isocu sacerdote ru̧hua̧ päi'önä kö̧. Ja̧u̧tä̧ o'ca juiyönä adihuä juäi tu̧ju̧nä̧rö̧mä̧ ru̧hua̧do. Chutä sacerdote ru̧hua̧ päi'önä aditomenä, koromettö'inä abonänö adihuomedo. Pi̧jä̧ ttö̧ja̧ttö̧ adicuocomedo. Ja̧'hua̧nö̧ pä'ö pi̧jä̧ jähuättömäcö̧ pä'ätöjä. 12Chutä Cristo Ji̧nä̧ Isocu Adihuo̧ca̧cu̧ täcö do'ächinödo. Juhua'attö oveja i̧tti̧'i̧nä̧, päcäyä i̧tti̧'i̧nä̧ ttucuoja iyocödo. Ja̧'hua̧ta̧nö̧ chutä amönä ucuojatä iya pä'ö do'ächinödo. Chutä ya'utenätä do'ächinödo, o'ca toi'önä suronä jȩttö̧ jȩpö̧ icu. Ja̧'hua̧nö̧ jȩpö̧, kä̧cuä̧huä̧ i'co ȩmö̧ iyinä̧u̧jä̧. 13Iso päi'önä pä̧cä̧yö̧'i̧nä̧, o̧vȩja̧stö̧ tti̧tti̧mö̧'i̧nä̧ ttucuoja, päcäyärö ku tticuäji o'ca'a, i̧sa̧ppȩ'i̧nä̧ suronä jȩpä̧tö̧rö̧ ttuhuämenä tticuomenä, huämenätä surojö aditö icu, töcö icuähuänä juruhua'ado. 14Ja̧'hua̧ ja̧'a̧ ja̧'hua̧nö̧ jö̧ttö̧mä̧, Cristo ucuoja ji̧nä̧ isocu ujuru'a̧nö̧ ja̧'a̧. Espíritu Santo 'cuäopönä kö̧mä̧, Cristorö ppädomenä, chutä Cristo amönä Diosrö iyähuinödo, adihuä juäi, idicu juiyönä sacrificio päi'önä. Ujutu 'corupäi'äcuähuä jȩtö̧mä̧ ucuojanä töcö icuä̧u̧jä̧, Dios kö̧ hueö jȩta̧ pä'ö.
15Ja̧'hua̧nö̧ ja̧'a̧ttö̧ chutä Jesucristo ja̧u̧ jareö huȩnȩ tta̧huä̧rä̧cuä̧huä̧ i̧sa̧do. Cristo 'corupä'i'inödo, pä'äji huȩnȩ jȩtti̧nö̧ ka̧cui̧nä̧tö̧'i̧nä̧ suronä jȩtti̧nö̧ jȩpö̧ icua pä'ö. Ja̧'hua̧ta̧nö̧ Dios huoinä̧u̧'i̧nä̧ adihuä juäi kä̧cuä̧huä̧ iya päinö ttȩmä̧ pä'ö, 'corupä'i'inödo. 16Iso päi'önä ya̧tȩ 'corupäi'ö o'ca'a, öäre iya päömä, chutä iya pä'ö 'corupäi'omenätä, öäre ttiyö'a̧nö̧ ja̧'a̧. 17Chutä ji̧nä̧ ö̧jo̧mȩnä̧, iya päinö huȩnȩ yoröiso micuähuoca'a. Chutä 'corupäi'omenätä micuähua'a. 18Ja̧'hua̧nö̧ ja̧'a̧ttö̧ pä'äji huȩnȩ'i̧nä̧ ucuoja erönätä micuähuina'ado. 19Moisés o'ca juiyönä hueähuä huȩnȩ ji'ähuinödo ttö̧ja̧rö̧. Ja̧u̧nu̧ o'ca'a pö̧jä̧ta̧, o̧vȩja̧stö̧ ttuhuo'chettö adicuä̧ta̧ tu̧huä̧ta̧cu̧, hisopo dau ä̧na̧juä̧cu̧ 'chu̧'ä̧rö̧, pä̧cä̧yö̧ tti̧tti̧mö̧'i̧nä̧, o̧vȩja̧stö̧ tti̧tti̧mö̧'i̧nä̧ ttucuojacu, ajiyacu huihuacua'a da'epäji'ca̧, hueähuä huȩnȩ cuyäru'tänä'inä, ttö̧ja̧rö̧'i̧nä̧ icuähuinödo. 20Ja̧'hua̧nö̧ jȩo̧mȩnä̧ pä'inödo: “Pi̧yȩ ucuojamä, Dios hueö huȩnȩ, ucuturu iyö huȩnȩ i̧jȩpa̧'a̧.” 21Ja̧'hua̧ta̧nö̧ Diosrö ucuocuäcuähuodenä'inä, o'ca juiyönä culto jȩä̧cuä̧huä̧ juäinä'inä ucuoja icuähuinödo Moisés. 22Hueähuä huȩnȩ päa'a: “O'ca juiyönä ucuojanä töcö icua'ado.” Ttucuoja erö juiyönä, suronä jȩttö̧ jȩpö̧ icuähuocödo.
Cristo sacrificio jȩi̧nö̧ huȩnȩ
23Ja̧'hua̧ ja̧'a̧ttö̧ ja̧u̧ juäi mo̧ro̧jä̧ jähuä a̧'cua̧rö̧nä̧ aditö tticua pä'ö, sacrificios jȩpi̧nä̧tö̧do. Ja̧'hua̧nö̧ ja̧'a̧nä̧ iso päi'önä mo̧ro̧jä̧ jähuä sacrificiosttö'inä abonänö adihuä juäi jȩttö̧'a̧nö̧ ja̧'a̧. 24Cristomä, ja̧u̧ juäi Diosrö ucuocuäcuähuode, ttö̧ja̧ ttaditode, mo̧ro̧jä̧nä̧ kode a̧'cua̧rodenä do'ächocö pi̧nö̧do. Mo̧ro̧jä̧nä̧tä̧ do'ächinödo. Jitä'inä Dios ä'ca jo̧mȩttö̧ ujuturu ucuocu kö̧do. 25Ja̧u̧ judíos ttö̧ja̧ i̧sa̧ sacerdote ru̧hua̧, koro a̧'ȩ'i̧nä̧, koro a̧'ȩ'i̧nä̧ Ji̧nä̧ Isocu Adihuo̧ca̧cu̧ ya'utenätä do'ächödo, koro hua̧tä̧ ucuoja ȩpö̧ suronä jȩttö̧ micuä päi'önä. Ja̧'hua̧nö̧ ja̧'a̧nä̧ Cristomä koronö'inä, koronö'inä sacrificio päi'önä iyähuocödo. 26Ja̧'hua̧nö̧ jȩö̧ttö̧mä̧, pi̧jä̧ aditinö o'ca'a, rö̧ȩnä̧ 'corupä'i'aji. Juhua'acucö̧. Pi̧yȩ pä̧nä̧ 'cuäopa'anä, Cristo ya'utenätä ichö, amönä iyähuinödo sacrificio päi'önä, o'ca toi'önärö suronä jȩttö̧ jȩpö̧ icu. 27Ja̧'hua̧ ja̧'a̧ttö̧ o'ca toi'önä ya'utenä 'corupätti'äcuotödo. Ja̧u̧nu̧ o'ca'a: “Ucu adiu jȩpi̧nö̧jä̧”, “Ucu suronä jȩpi̧nö̧jä̧” pä̧cua̧ Dios o'ca toi'önärö. 28Iso päi'önä Cristo ya'utenätä sacrificio jȩpi̧nö̧do recuätö ttö̧ja̧ suronä jȩttö̧ jȩpö̧ icu. Ja̧u̧nu̧ o'ca'a, pä'äji ta'anö i̧chä̧cua̧. Ja̧u̧nu̧ suronä jȩttö̧ jȩpö̧ icua pä'ö ichocö jä̧cua̧. Ja̧u̧ru̧ tta̧'ä̧rä̧tö̧rö̧ ȩmö̧ i̧chä̧cua̧do.
Currently Selected:
Hebreos 9: PIDNT86
Highlight
Copy
Compare
Share
Want to have your highlights saved across all your devices? Sign up or sign in
Nuevo Testamento en Piaroa © Sociedades Biblicas Unidas, 1986.
