Hebreos 1
1
Dios I̧tti̧rö̧ hue'inödo ujuturu jiähua pä'ö
1Täbocö Dios chutä i̧huȩnȩ jiäcuähuä isotörö jiähuinömä, juhua'a yabocu ji'ähuinätödo ujutu tä̧do̧tö̧ mi̧nä̧rö̧, rö̧ȩnä̧ koro juäinä jȩpö̧ ucuocu. 2Ja̧u̧nu̧ o'ca'a, jitämä I̧tti̧rö̧tä̧ ucuocuinödo ujuturu. Ja̧'hua̧ta̧nö̧ chutä I̧tti̧, Jä'o ujurunä aditinödo pi̧jä̧ o'ca juiyönä. Ja̧'hua̧ta̧nö̧ Dios o'ca juiyönä ku̧ni̧pi̧nö̧do ja̧u̧ru̧, I̧tti̧rö̧. 3Chutä, Dios I̧tti̧mä̧, Dios i̧tȩa̧u̧. Ja̧u̧mä̧ yoröiso Dios ta'anö hua̧do. Ja̧'hua̧ta̧nö̧ ja̧u̧tä̧ i̧huȩnȩ, adiu juruhua'attö, o'ca juiyönä huȩ'ä̧rö̧do. Ujutu suronä jȩti̧nö̧ jȩpö̧ icuinö o'ca'a, mo̧ro̧jä̧ra̧'a̧ttö̧ Dios ö̧'o̧mȩ u̧huo̧jua̧'a̧nä̧ pä̧mä̧di̧nö̧do.
Angelesttö'inä abonänö ju̧ru̧hua̧ Dios I̧tti̧mä̧
4Dios I̧tti̧mä̧ ángelesttö'inä abonänö ru̧hua̧do. Dios “Ja̧u̧mä̧ ttö Chi̧tti̧” päina'attö, ángelesttö'inä abonänö adihuome hueinäcudo. 5Pa̧'a̧nö̧mä̧ pä'ocö pi̧nö̧do Dios ángelesrö:
Ucutä ttö Chi̧tti̧jä̧.
Jitä mo̧ro̧ ttömä ucu Cuä'osä.
Ja̧'hua̧ta̧nö̧ ángelesrö yoröiso pa̧'a̧nö̧ pä'ocö pi̧nö̧do:
Ttötä ja̧u̧ jä'omä jä̧cua̧sä̧.
Ja̧u̧mä̧ ttö chi̧tti̧ jä̧cua̧.
6Ja̧'hua̧nö̧ ja̧'a̧nä̧ I̧tti̧rö̧ chu ä̧cua̧rö̧ pi̧jä̧ra̧'a̧ i'cächomenä, pä'inödo:
O'ca toi'önä ángeles, Dios umöhuäyotö, ja̧u̧ru̧ ucuotätucui,
pä'inödo. 7Angelesrö Dios pä'inödo:
Angeles kä̧ru̧'coppa kö̧'a̧nö̧ ttö̧ja̧cuä̧cuo̧tö̧.
Ja̧'hua̧ta̧nö̧ chumöhuäyotö ocurä cuoö'a̧nö̧ ttö̧ja̧cuä̧cuo̧tö̧,
päinä̧u̧do. 8Ja̧'hua̧nö̧ ja̧'a̧nä̧'i̧nä̧ I̧tti̧rö̧ päa'a:
Ucu cu̧'o̧mȩ, Dios, yoröiso beipächoca'a jä̧cua̧'a̧.
Ucu huecumä, o'ca juiyönä adiunä hue'öjä.
9Adihuä juäi kö'quinöjä. Suronä jȩä̧cuä̧huä̧ kö'cocö pi̧nö̧jä̧.
Ja̧'hua̧nö̧ ja̧'a̧ttö̧ Dios, Cuä̧do̧ ä̧cua̧ Dios,
cuahuaruhuättö'inä abonänö eseäcuähuä iyinäcujä.
10Ja̧'hua̧ta̧nö̧ päa'a:
Ucu Tu̧ru̧hua̧, äcuomenä aditinöjä pi̧jä̧ rȩjȩ.
Cu̧mö̧nä̧ aditinöjä mo̧ro̧jä̧.
11Jahuätö bettipächäcuotö. Ucumä yoröiso be'ipächocöjä.
Pö̧jä̧ta̧ täbo i̧sä̧ta̧ beipächa'a jä̧'i̧nö̧'a̧nö̧, bettipächäcuotö.
12Ttö̧'ca̧tä̧huä̧ta̧ ttö̧to̧rä̧da̧'a̧ jä̧'i̧nö̧'a̧nö̧, cu̧to̧rä̧dä̧cua̧jä̧ jahuätörö.
Pärou tticuäcuotö, pö̧jä̧ta̧ ttö'ärohua'a jä̧'i̧nö̧'a̧nö̧.
Ja̧'hua̧nö̧ ja̧'a̧nä̧ ucutä yoröiso pärohuächocöjä.
Cu̧ju̧mä̧ yoröiso beipächoca'a,
päa'a Dios. 13Diosmä ángelesrö yoröiso pä'ocö pi̧nö̧do pa̧'a̧nö̧mä̧:
Chö̧'o̧mȩ chu̧huo̧jua̧'a̧nä̧ pä̧mä̧di̧,
cuaboiyotörö cu̧jä̧pö̧ dȩa̧'a̧ chötome jubö päi'önä.
14O'ca toi'önä ángelesmä, espíritus tta'attö, Dios hueötä jȩpä̧tö̧do. Dios ȩmi̧nä̧u̧ru̧ ttesetarö pä'ö ppättäda pä'ö hue'ähuotödo.
Currently Selected:
Hebreos 1: PIDNT86
Highlight
Copy
Compare
Share
Want to have your highlights saved across all your devices? Sign up or sign in
Nuevo Testamento en Piaroa © Sociedades Biblicas Unidas, 1986.
