Gálatas 3

Cristorö esetäcuähuä huȩnȩ

1Juiyo di̧ji̧ huo̧juä̧chi̧'o̧co̧tö̧jä̧, Gálatas ttö̧ja̧. ¿Dihuä ja̧'hua̧nö̧ jȩi̧nä̧tu̧cuä̧cu̧ iso päi'önä suronä jȩttö̧ jȩpö̧ icu huȩnȩ cuesetätucu juiyönämä? Adihuä huȩnȩ jitäumä, ucutu'inä ja̧u̧tä̧ Jesucristo daunä 'corupä'i'inörö tocu'ätucua pä'ö ji'ähuätöjä. 2Chu̧huo̧jua̧ ji'ähuätucuittö: ¿Ucutumä Espíritu Santorö ku̧nä̧rä̧tö̧jä̧ tä̧ji̧, Moisés hueähuä huȩnȩ jȩcu̧'i̧nä̧tu̧cua̧'a̧ttö̧mä̧? Isocö̧. Ucutumä Espíritu Santorö ku̧nä̧rä̧tö̧jä̧, ujutu jitähuinö esetö cuä̧ju̧cui̧nä̧tu̧cua̧'a̧ttö̧. 3¿Tta̧'a̧nö̧ pä'ö juiyo huo̧juä̧chi̧'o̧co̧tö̧jä̧? ¿Espíritu Santo u̧huo̧juȩta̧'a̧nä̧ cu̧ji̧nä̧tu̧cu̧'a̧nö̧, ucutu'inä jitämä cuamönä cujurutucunä jȩpö̧ cu̧ja̧cuä̧tu̧cua̧ päcuhuätucua tä̧ji̧? 4¿Diosrö cuesetätucuei ucuturu 'cuäopinömä micuähuocö jä̧'i̧nö̧'a̧nö̧ jä̧u̧jä̧ tä̧ji̧? Ji̧'qui̧cha̧nö̧tä̧ ppädinä̧u̧jä̧ a̧'cua̧ra̧'a̧. 5Dios ucuturu Espíritu Santorö'inä iyomenä, ucutu cu̧'quȩtȩtu̧cu̧nä̧ ttö̧ja̧ ttieru juäi'inä jȩo̧mȩnä̧, ¿dä̧bö̧ jȩa̧'a̧jä̧ttö̧ Dios ja̧u̧mä̧? Hueähuä huȩnȩ jȩcu̧'i̧yä̧tu̧cuä̧cu̧mä̧ jȩpo̧cö̧ ja̧u̧mä̧. Ja̧u̧mä̧ ja̧'hua̧nö̧ jȩpö̧ ucutu ujuturu ä̧ju̧cu̧ cuesetiniyätucuäcu.

6Abraham mi̧nä̧ Diosrö esetomenä, Dios ja̧u̧ru̧ pä'inö: “Surojömä jui̧'a̧jä̧ täcö”. 7Ja̧'hua̧nö̧ ja̧'a̧ttö̧ ucutu cu̧huo̧juä̧tu̧cu̧'a̧nö̧ ja̧'a̧ iso päi'önä Diosrö esetätötä Abraham mi̧nä̧ ahuaruhuä o'cotö pä'i'ätö. 8Judíos huocotöttö Diosrö esetätömä ttesetäcua'a ä'canä amöcuädö Dios jahuätörö ȩma̧ päinö huȩnȩ päina'a Huȩyu̧cuä̧ Huȩnȩ Abrahamrö. Ja̧u̧ adihuä huȩnȩ päina'a: “Ucu adiu cueseta'attö, o'ca toi'önä ttö̧ja̧mä̧ ppädädäcuotö.” 9Ja̧'hua̧nö̧ ja̧'a̧, o'ca toi'önä chutä esetinö ta'anö esetätömä, ji̧nä̧ ji̧yȩtȩ ppädäcuähuotö Abraham mi̧nä̧cu̧.

10Moisés hueähuä huȩnȩ tta̧'cua̧ huȩnä̧rä̧tö̧mä̧, Diostä ö̧tä̧bo̧tä̧cuo̧tö̧. Huȩyu̧cuä̧ päa'a: “O'ca toi'önä 'cuäopönä hueähuä huȩnȩ huȩyu̧cuä̧'tä̧nä̧ huȩyu̧cuä̧ päö ta'anö jȩpo̧co̧tö̧mä̧, Diostä ö̧tä̧bo̧tä̧cuo̧tö̧.” 11Iso päi'önä Moisés hueähuä huȩnȩtä̧ jȩpä̧tö̧rö̧mä̧ Dios jȩpo̧cö̧ ja̧u̧cu̧ ji̧nä̧ ji̧yȩtȩ huotö tta pä'ö. Huȩyu̧cuä̧ Huȩnȩ päa'a: “Dios jȩä̧u̧ ja̧u̧cu̧ ji̧nä̧ ji̧yȩtȩ huotö tta pä'ö Cristorötä esetö ttö̧ja̧cuä̧cuo̧tö̧.” 12Iso päi'önä Moisés hueähuä huȩnȩmä̧ Cristorö esetäcuähuämäcö̧. Hueähuä huȩnȩ päa'a: “Pi̧yȩ huȩnȩ päö ta'anö jȩpä̧tö̧mä̧ pi̧yȩnä̧tä̧ ttö̧ja̧cuä̧cuo̧tö̧.”

13Cristomä hueähuä huȩnȩ tä̧bo̧cuä̧ ja̧ji̧ jȩpö̧ icuinä̧u̧jä̧. Chutä Cristo ujuturu rettö pä'ö hueähuä huȩnȩ tä̧bo̧cuä̧ ja̧ji̧ päi'önä 'corupä'i'inö. Huȩyu̧cuä̧ Huȩnȩ päa'a: “O'ca toi'önä daunä pȩ'o̧pö̧ ttu̧ju̧nä̧u̧ 'corujuo'ächätömä suropätö.” 14Ja̧u̧ 'cuäopina'a Dios Abraham mi̧nä̧rö̧ ppädäcuähuä ucuocuinö huȩnȩ judíos huocotörö ppäda pä'ö Cristo Jesúsnä. Ja̧'hua̧ta̧nö̧ ujutu o'ca toi'önä esetö tȩma̧ pä'ö Espíritu Santo, Dios iya päinäcuru.

Dios ujuturu iya päinö huȩnȩ

15Ujututä tamönä tö̧jö̧nä̧ huȩnȩtö̧ jidähua pä'ösä, chö̧jä̧hua̧tö̧. Ya̧tȩ pi̧jä̧ttö̧'i̧nä̧ i̧mi̧ rötö huȩyu̧tu̧ u̧ju̧no̧mȩnä̧, ka̧ra̧mä̧ ji̧'qui̧cha̧nö̧'i̧nä̧ jȩpö̧ icuäu pärou icu, huȩyu̧to̧cö̧. 16Iso päi'önä Dios Abraham mi̧nä̧rö̧'i̧nä̧, chutä ahuaruhuä isotö i̧sa̧rö̧'i̧nä̧ iya pä'ö ucuocuinö. Huȩyu̧cuä̧ Huȩnȩ päoca'a ja̧u̧ isotö jö̧nä̧mä̧. Recuätönä päoca'a. Huȩyu̧cuä̧ Huȩnȩ ji̧ta̧'a̧nö̧tä̧ päa'a: “Ucu i̧sa̧ttö̧.” Ya̧tȩrö̧tä̧ Cristorötä pä'ö päa'ajä ja̧u̧mä̧. 17Ttö pädömä pi̧yȩjä̧: Dios o'ca juiyönä Abraham mi̧nä̧rö̧ ucuocuinömä jȩpi̧nö̧. Dios Abraham mi̧nä̧rö̧ ucuocuina'attömä, cuatro cientos treinta a̧'ȩ ji̧nö̧ o'ca'a, iyinödo Moisés hueähuä huȩnȩ. Ja̧u̧ Moisés hueähuä huȩnȩ yoröiso jȩpö̧ icuähuocö Dios iya päinö huȩnȩmä̧. 18Moisés hueähuä huȩnȩ jȩä̧cuä̧huä̧nä̧ suronä jȩtö̧ jȩpö̧ icuttumä, ja̧u̧nu̧mä̧ Dios Abraham mi̧nä̧rö̧ iya päinömä yoröiso micuähuocö ja̧ji̧. Ja̧'hua̧nö̧ ja̧'a̧nä̧ Dios mippoönä iya pä'inö Abraham mi̧nä̧rö̧.

19Ja̧'hua̧nö̧ ja̧'a̧ttö̧ ¿Diosmä dä̧bö̧ iyina'ajä̧ttö̧ Moisés hueähuä huȩnȩ? Ja̧u̧ hueähuä huȩnȩmä̧ iyinö suronä jȩtto̧mȩnä̧ ttu̧huo̧jua̧ pä'ö. Ja̧u̧ Dios Abraham mi̧nä̧rö̧ iya päinäcu ichome jubö päi'önätä ttu̧ju̧nä̧ra̧ pä'ö iyinö ja̧u̧ hueähuä huȩnȩmä̧. Ja̧u̧ hueähuä huȩnȩ ángeles jittähuinö Moisés mi̧nä̧rö̧. Ja̧'hua̧ta̧nö̧ chutä Moisés mi̧nä̧ juhua'a yabo ji'ähuinö pi̧jä̧ ttö̧ja̧rö̧. 20Ja̧'hua̧nö̧ ja̧'a̧nä̧ yoröiso recuä rö̧jo̧co̧u̧jä̧ ya̧tȩrö̧tä̧ tucuocuomenä. Iso päi'önä Diosmä ya̧tȩtä̧do.

Hueähuä huȩnȩ äcuomenä hueinö huȩnȩ

21¿Moisés hueähuä huȩnȩmä̧ Dios iya päinö huȩnȩttö̧'i̧nä̧ i̧mi̧cu̧nä̧ päa'a tä̧ji̧? Juhua'acumäcö̧. Ja̧u̧ hueähuä huȩnȩ kä̧cuä̧huä̧ i'co ttu̧ju̧nä̧ra̧ pä'ö iyinö jö̧ttö̧mä̧, ja̧u̧nu̧mä̧ Diosmä jȩpa̧ji̧ ja̧u̧cu̧ ji̧nä̧ ji̧yȩtȩ huotö tta pä'ö hueähuä huȩnȩ esetö jȩpä̧tö̧rö̧. 22Ja̧'hua̧nö̧ ja̧'a̧nä̧ Huȩyu̧cuä̧ Huȩnȩ päö'a̧nö̧ o'ca toi'önä surojötä jȩpä̧tö̧ 'cuäopönä. Ja̧u̧mä̧ ja̧'hua̧nö̧ päa'a Jesucristorö esetätö Dios iya päinömä ttu̧ju̧nä̧ra̧ pä'ö.

23Jesucristorö esetäcuähuä huȩnȩ juiyäimä, hueähuä huȩnȩmä̧ yoröisotä cärenätä rötinä̧u̧jä̧. Ja̧'hua̧ ji̧yä̧u̧ Jesucristorö esetäcuähuä huȩnȩ tta̧'ä̧ri̧nä̧tö̧jä̧ tu̧huo̧jua̧ pä'ö. 24Hueähuä huȩnȩmä̧ ppo̧'ä̧tö̧rö̧ huo̧juȩtö̧ tta̧'ä̧rä̧ju̧ jä̧'i̧nö̧'a̧nö̧tä̧ huo̧juȩtö̧ tta̧huä̧ri̧na̧'a̧ ujuturu, Cristo ichome jubö päi'önä. Ja̧u̧ru̧ tesetomenä, Diosmä ujuturu jȩpö̧ ja̧u̧cu̧ ji̧nä̧ ji̧yȩtȩ huotö ta pä'ö. 25Ja̧'hua̧nö̧ ja̧'a̧ttö̧ täcö Jesucristorö esetäcuähuä huȩnȩ ichina'attö, jitämä hueähuä huȩnȩmä̧ jȩpö̧ ko̧co̧tö̧jä̧.

26Ja̧'hua̧nö̧ ja̧u̧ru̧ cuesetätucuomenä, ucutumä o'ca toi'önä Dios i̧tti̧mö̧jä̧ Cristo Jesúscu ji̧nä̧ ji̧yȩtȩ huotö cu'ätucua'attö. 27Ucutu o'ca toi'önä Cristocu ji̧nä̧ ya̧tȩ cu'ätucua pä'ö bautizando pä'i'inätömä, Cristo jö̧'a̧nö̧ huotöjä. 28Yoröiso yorätehuätöjä Cristo Jesúsru cuesetätucuomenä, judíos ttö̧ja̧'i̧nä̧, griegos ttö̧ja̧'i̧nä̧, ttu̧mö̧huä̧ya̧'i̧nä̧, ttu̧mö̧huä̧ya̧cö̧'i̧nä̧, ubo'inä, isaju'inä. 29Iso päi'önä Cristorö cuesetätucuttumä, Abraham mi̧nä̧ isotö isotöjä. Ja̧'hua̧ta̧nö̧ o'ca juiyönä Dios iya päinömä cuȩmä̧cuo̧tö̧jä̧.

Currently Selected:

Gálatas 3: PIDNT86

Highlight

Copy