Hechos 3

Pedrocu, Juancu cue'ächocörö aditö tticuinö huȩnȩ

1Koro mo̧ro̧ Pedrocu, Juancu ni̧pä̧ro̧mȩcu̧ päi'a'a, Diosrö ucuocuäcuähuodera̧'a̧ 'chä̧nö̧ 'cha'chepinätödo. Judíos ttö̧ja̧ ttihueye ni̧pä̧ro̧mȩcu̧ Diosrö ucuocuinätödo. 2Ju̧huȩnȩtä̧ Diosrö ucuocuäcuähuodenä, ya̧tȩ uhuäpächina'atä päi'önä cue'ächocörö ȩpö̧ i'cächinätödo ahuaruhuä. Mo̧ro̧ji̧nö̧ a̧'u̧cuä̧ äpate Adihuate ä'ca ja̧u̧ru̧ rötinätödo, dodepätörö pärätä jäepa pä'ö mippoönä. 3Pedrorö, Juanrö Diosrö ucuocuäcuähuodenä dottächa'a topö, ja̧u̧ cue'ächocömä pärätä jä'epinödo. 4Pedrocu, Juancu cue'ächocörö topinätödo. Pedro ja̧u̧ru̧ pä'inödo:

—Topitö.

5Ja̧'hua̧nö̧ päcu, cue'ächocömä jahuätörö topö, “Ttörö ttiyattö pä'öcö̧”, amöcuädinödo. 6Ja̧'hua̧ ja̧'a̧ Pedro pä'inödo:

—Pärätä'inä, oro'inä jui̧'a̧sä̧. Chu̧ju̧nä̧rö̧mä̧ chiyäcujä. Ä̧rä̧mi̧'ö̧ cue'ächi Jesucristo Nazaret i̧sa̧ i̧mi̧nä̧.

7Pedro u̧mö̧ u̧huo̧jua̧'a̧nä̧ 'chu'ädö, cäepinäcudo. Yotäcu ö̧jä̧pi̧yä̧'i̧nä̧, ö̧jä̧dä̧'chu̧'i̧nä̧ adiu päi'inäcudo. 8Tö'önänö ä̧rä̧mi̧'ö̧ cue'ächinödo. Jahuätöcu Diosrö ucuocuäcuähuodenä do'ächi'inödo. Ja̧'hua̧nö̧ tö'önänö cue'ächö, Diosrö eseunu ucuocuinödo. 9O'ca toi'önä topinätödo ja̧u̧ru̧ Diosrö eseunu ucuocu cueächa'a. 10Ja̧u̧mä̧ Diosrö ucuocuäcuähuode äpate Adihuate ä'ca pä̧nö̧ pärätä jä̧'ȩpä̧rö̧ ö̧'a̧'a̧ tottä'ija'a cueächa'atä huo̧jui̧nä̧tö̧do. Ja̧'hua̧nö̧ ja̧'a̧mä̧ tottocö jä̧'i̧jö̧ to̧pä̧rö̧ ka̧cui̧nä̧tö̧do.

Pedro Salomón i̧so̧ca̧ttö̧ jiähuinö huȩnȩ

11Diosrö ucuocuäcuähuode u̧mi̧nä̧ i̧so̧ca̧, Salomón i̧so̧ca̧, ja̧u̧ cue'ächocö pä'ijömä Pedrorö, Juanrö 'chu̧'ä̧rö̧ ki̧nö̧do. O'ca toi'önä jopipö ca̧ca̧cui̧pi̧nä̧tö̧do 'chu̧'ä̧rö̧ ö̧ja̧'a̧ topö. Tottocö jä̧'i̧jö̧ to̧pä̧rö̧ ka̧cui̧nä̧tö̧do. 12Pedro jahuätörö topö pä'inödo:

—Israel ttö̧ja̧, ¿dä̧bö̧ tocu'ätucuocö jä̧'i̧jö̧ to̧pä̧rö̧ cu̧ja̧cuä̧tu̧cuä̧ttö̧? ¿Dä̧bö̧ ujuturu to̧cu̧'ä̧rä̧tu̧cuä̧ttö̧? ¿Diosrö adiu ttamöcuäda'attö, ttujurunä adiu cueächa pä'ö aditö tticuäjäcu amöcuädätöjä tä̧ji̧? 13Ja̧'hua̧nö̧mä̧cö̧. Ujutu tä̧do̧tö̧ mi̧nä̧ Abraham'inä, Isaac'inä, Jacob'inä Ttä̧do̧ ä̧cua̧ Dios hue'inö o'ca toi'önä ttucuota pä'ö I̧tti̧ Jesúsru. Ja̧u̧ru̧ ucutu iyö icuinätöjä. Ja̧'hua̧ta̧nö̧ ja̧u̧ru̧ ucutu kö'cocotö pi̧nä̧tö̧jä̧, ru̧hua̧ Pilato ja̧u̧ru̧ ejädö icua päa'anä. 14Dios hueinö ta'anö jȩpi̧nö̧rö̧, adihuä i̧sa̧rö̧, kö'cocotö pi̧nä̧tö̧jä̧. Pilatorö jä'epinätöjä ya̧tȩ ttö̧ja̧rö̧ cuä'ö icuinörö rä'epö icua pä'ö. 15Ja̧'hua̧ ja̧'a̧ ucutu kä̧cuä̧huä̧ iyörö cuä'ö cuicuinätucua'anä, Dios ja̧u̧ru̧ tto'ädinö. Ujutu tto'ächinörö topinätöjä. 16Ja̧'hua̧nö̧ ja̧'a̧ Jesús i̧mi̧nä̧ teseta'attö, pide tocu'ätucuäcuru, cu̧huo̧juä̧tu̧cuä̧cu̧ru̧ Dios ujuru iyäji. Ucutu tocu'ätucu ta'anö täcö surojömä jui̧'a̧, Jesúsru eseta'attö.

17“Ja̧'hua̧nö̧ ja̧'a̧ chahuaruhuä, huo̧jua̧sä̧ ucutu'inä curuhuotö'inä cuä'ö cuicuätucuomenä, cuieruhuätucua'attö cuä'ö icuinätöjä. 18Ja̧'hua̧nö̧ jȩcu̧'ä̧tu̧cuo̧mȩnä̧, Dios päinö ta'anö 'cuäopina'a o'ca toi'önä Dios i̧huȩnȩ jiäcuähuä isotö mo täbocö jittähuinömä. Jahuätö ä'canä jï'ähuinätö Cristo ubara ttuhuäcua'amä. 19-20Ja̧'hua̧ ja̧'a̧ pärocuäcutä amöcuädätucui. Diosrö ppa̧'ä̧chä̧tu̧cui̧, suronä jȩcu̧'i̧nä̧tu̧cu̧ si'epö icua pä'ö, cua̧'cua̧ eseunu kä̧cuä̧huä̧ iyätucuacu pä'ö, Jesucristorö ä'canä ucuturu pätetö hue'inörö huea pä'ö. 21Ja̧u̧ Jesucristo mo̧ro̧jä̧ra̧'a̧ ö̧jä̧cua̧, o'ca juiyönä Dios äcuomenä aditinö ta'anö aditö u̧ju̧na̧'a̧ jubö päi'önä. Ja̧'hua̧nö̧mä̧ Diostä ji'ähuinö mo täbocö i̧huȩnȩ jiäcuähuä isotörö, adihuä ttö̧ja̧rö̧. 22Moisés pä'inö tä̧do̧tö̧ mi̧nä̧rö̧: “Cu̧ru̧hua̧ Dios ucuturu huȩä̧cua̧ i̧huȩnȩ jiäcuähuä i̧sa̧rö̧, ucututtu ya̧tȩrö̧, ttörö hueinö ta'anö. Ja̧u̧ jiäumä o'ca juiyönä adiu esetö cuä̧ju̧cuä̧tu̧cu̧'a̧nö̧ ja̧'a̧. 23Israel ttö̧ja̧ttö̧ 'quȩ'ȩpö̧ cuä'ö tticuäcuotö o'ca toi'önä ja̧u̧ i̧huȩnȩ jiäcuähuä i̧sa̧rö̧ esetocotörö”, pä'inödo Moisés.

24“O'ca toi'önä Dios i̧huȩnȩ jiäcuähuä isotö, Samuel'inä, ja̧u̧nu̧ o'comenä ka̧cui̧nä̧tö̧'i̧nä̧ ä'canä ji'ähuinätödo jitä 'cuäopä̧cuȩtä̧. 25Dios iya päinömä, i̧huȩnȩ jiäcuähuä isotörö päinömä, ucuturu'inä pä'inö. Ja̧'hua̧ta̧nö̧ ucutu cuä̧do̧tö̧ mi̧nä̧cu̧ amöcuädäcuähuä ucuocuomenä, Dios ucuturu'inä amöcuädinö. Ja̧'hua̧nö̧ pä'inö Abrahamrö: “Ucuttu isotöttö ppä̧dä̧dä̧cua̧sä̧ o'ca toi'önärö ruhuäcuiyä pa̧ja̧cu̧nä̧ ttö̧ja̧rö̧.” 26Dios I̧tti̧rö̧ ttoädäji o'ca'a, I̧tti̧rö̧ äcuomenä ucuturu hue'inö, ucuturu ppäda pä'ö, o'ca toi'önä suronä jȩcu̧'ä̧tu̧cu̧ jarocu'ipätucua pä'ö, —pä'inödo Pedro.

Currently Selected:

Hechos 3: PIDNT86

Highlight

Copy