2 Corintios 9
9
Tö̧jä̧hua̧tö̧rö̧ ttiya pä'ö ofrenda ȩmä̧huä̧ huȩnȩ
1Tö̧jä̧hua̧tö̧rö̧, Cristorö esetätörö, ttiyö huȩnȩ chi̧huȩyu̧tu̧ juiyö'a̧nö̧ ja̧'a̧ ucuturu. 2Täcö huo̧jua̧sä̧ ucutu adiu cuiyätucua'a. Macedonia rȩjȩnä̧ ka̧cuä̧tö̧rö̧ 'cuäopönä eseunu ji'äusä: “Acaya rȩjȩnä̧ ka̧cuä̧tö̧mä̧, ni̧po̧ a̧'ȩ päi'önä iyö ppättäda pä'ätö.” Ja̧'hua̧nö̧ pä'ö, Macedonia rȩjȩttö̧ recuätö, ucutu eseunu cuiyätucua'a topö, jahuätö'inä eseunu ttiya pä'ätö ttu̧ju̧nä̧rö̧mä̧. 3Ja̧'hua̧nö̧ ja̧'a̧nä̧'i̧nä̧ pitö tö̧jä̧hua̧tö̧rö̧ ucuturu hue'ösä, iso päi'önä ucuturu adiu jidähuinö ta'anö 'cuäopa pä'ö. Ja̧'hua̧nö̧ pä'ö, ucutu iso päi'önä eseunu iyö ppäcuhuädätucua pä'ösä. 4Ja̧'hua̧ta̧nö̧ korotö Macedonia rȩjȩttö̧ ttöcu cue'ächätö, ucuturu cuiyätucuoca'a tottöttömä, ja̧u̧ yapareu ji'ähuinö pä'ö amöcuädätö a̧'cua̧ra̧'a̧. Ja̧'hua̧nö̧ tottöttömä, ttömä juiyo dä'äcuajisä, ucuturu rö̧ȩnä̧ eseunu chucuocuinö o'ca'a. Ucutu'inä juiyo dä'äcuajatöjä a̧'cua̧ra̧'a̧. 5Ja̧'hua̧nö̧ amöcuädö, pitö tö̧jä̧hua̧tö̧rö̧ hueda pä'äjisä ucuturu. Pitö ucuturu ä'canä do'ächö 'chä̧nö̧, ppättädäcuotö ucutu cuiyätucua päcuhuinätucu, adiu jo̧mȩnä̧ cuiyätucua pä'ö. Ja̧'hua̧nö̧ jȩpö̧, ucutu cuiyätucumä jo̧mȩnä̧ päi'äcua'a, korotö topö pättäcuotö: “Iso päi'önä jitötä amöcuädö eseunu iyätö,” ujutu huetoca'anä.
6Pi̧yȩ'i̧nä̧ cunichi'ätucuä': Ya̧tȩ ji̧'qui̧cha̧nö̧tä̧ ku̧nu̧mä̧, ji̧'qui̧cha̧nö̧tä̧ ȩmä̧cua̧. Ja̧'hua̧ta̧nö̧ ya̧tȩ rö̧ȩnä̧ ku̧nu̧mä̧, rö̧ȩnä̧ ȩmä̧cua̧. 7Ka̧ra̧'i̧nä̧, ka̧ra̧'i̧nä̧ chutä ami iso'quinä iya pä'ö amöcuädö iyö'a̧nö̧ ja̧'a̧. Juhuorö'inä churutä pä̧huä̧ rö̧jo̧mȩnä̧ eseunu i̧yä̧cua̧, korotö huettoca'anä. Eseunu iyätörö repe'ö Dios. 8Dios ucuturu o'ca juiyönä adihuä juäi iyäcua'a̧nö̧, rö̧ȩnä̧ cu̧ju̧nä̧rä̧tu̧cua̧ pä'ö, ucutu'inä, korotörö'inä iyö ppäcuhuädätucua pä'ö. 9Huȩyu̧cuä̧ Huȩnȩ päa'a:
Usurä isotörö repeähuä juiyönä rö̧ȩnä̧ iyinö.
Ja̧'hua̧ta̧nö̧ adiu jȩi̧nö̧mä̧ 'cuäopönä kä̧cua̧'a̧.
10Diosmä ku̧nä̧huä̧ ru̧hua̧rö̧ jacuä jähuä u̧ju̧na̧ pä'ö iyö. Ja̧'hua̧ta̧nö̧ cuäcuähuä iyö, ucua pä'ö. Ucuturu'inä i̧yä̧cua̧ adihuä juäi cu̧ju̧nä̧tu̧cua̧ pä'ö. Ja̧u̧nu̧ o'ca'a, cu̧ju̧nä̧tu̧cu̧ o'ca'a, rö̧ȩnä̧ adihuä juäi cuȩmä̧tu̧cua̧ pä'ö i̧yä̧cua̧. 11Ja̧'hua̧nö̧ cuȩmä̧tu̧cuo̧mȩnä̧, ucutumä o'ca juiyönä adihuä juäi cu̧ju̧nä̧rä̧cuo̧tö̧jä̧, korotörö'inä repeähuä juiyönä cuiyätucua pä'ö. Ja̧'hua̧ta̧nö̧ ujuturu iyö huecuhuätucuomenä, korotö tö̧jä̧hua̧tö̧'i̧nä̧ topö ttesehuäcuotö Diosrö, ucuturu amöcuädö. 12Iso päi'önä pi̧yȩ ppä'ädö huecuhuätucu tiyomenä, jahuätö tö̧jä̧hua̧tö̧rö̧, jui'ätörö iyätöjä ttu̧ju̧nä̧ra̧ pä'ö. Ja̧'hua̧ta̧nö̧ jahuätö'inä ttȩmo̧mȩnä̧, Diosrö rö̧ȩnä̧ ttesehuäcuotö. 13Jahuätö ttesehuäcuähuäcuotö Diosrö. Ja̧u̧ ppä'ädö huecuhuätucuomenä, topö ttu̧huo̧juä̧cuo̧tö̧ iso päi'önä ucutumä Cristo i̧huȩnȩ päö ta'anö jȩpä̧tö̧jä̧. Ja̧'hua̧ta̧nö̧ jahuätörö'inä, o'ca toi'önärö'inä eseunu ppä'ädö cuiyätucuomenä topö, Diosrö adiu ttucuotäcuotö. 14Ja̧'hua̧ta̧nö̧ Diosrö ttucuocuäcuotö ucuturu repe'ö, Dios ucuturu rö̧ȩnä̧ adihuä juäi iyinö pä'ö amöcuädö. 15Diosrö adiu tesehuäcuähuätucuaja. Iso päi'önä ja̧u̧mä̧ juiyo rö̧ȩnä̧ adihuä juäi iyö ujuturu.
Currently Selected:
2 Corintios 9: PIDNT86
Highlight
Share
Copy
Want to have your highlights saved across all your devices? Sign up or sign in
Nuevo Testamento en Piaroa © Sociedades Biblicas Unidas, 1986.
