2 Corintios 7
7
1Ja̧'hua̧nö̧ ja̧'a̧ttö̧ adihuä chö̧jä̧hua̧tö̧, ja̧'hua̧nö̧ iya pä'inö Dios ujuturu. Jitämä ujutu jättäpäyotönä'inä, ta̧'cua̧ru̧hua̧nä̧'i̧nä̧ idicuächö juäittö'inä i̧mi̧cu̧nä̧ cuetächäcua'a̧nö̧. Ja̧'hua̧ta̧nö̧ Diosrö ye'ecu kä̧nö̧, tami iso'quinä o'ca juiyönä esetö tiyäcuähuätucuaja Diosrö.
Corinto ötahuiyä ttö̧ja̧ pärocuäcutä amöcuädinätödo
2Cuami iso'quitucunä eseunu topätucui ujuturu. Suronämä yoröiso jȩpo̧co̧tö̧ pi̧nä̧tö̧jä̧ korotörö. Ja̧'hua̧ta̧nö̧ ujutu jitähuomenä, korotö i̧mi̧cu̧nä̧ koro juäi huȩnȩ esetocotö pi̧nä̧tö̧do. Ujutu yoröiso yapareu ji'ähuocotö pi̧nä̧tö̧jä̧. 3Ja̧'hua̧nö̧mä̧ ji'ähuocösä ucuturu ro̧dȩpa̧ pä'ö. Pä'äji jidähuinö ta'anö, ucuturu chami iso'quinä eseunu amöcuädösä tö̧jo̧mȩnä̧'i̧nä̧, 'corupäti'omenä'inä. 4Juiyo eseunu amöcuädösä ucuturu. Rö̧ȩnä̧ ubara ttutomenä'inä, adiunä eseunu chami 'qui'ächi'ö kö̧sä̧.
5Macedonia rȩjȩra̧'a̧ rȩbȩhuä̧jä̧tö̧'co̧tö̧ 'cuätächi'ö'a̧nö̧ ja̧'a̧nä̧, ji̧nä̧ isocu aditäjätöjä. Rö̧ȩnä̧ rohuäcuähuä 'cuäopäja'a ujutu tö̧ja̧cuo̧mȩttö̧. Ja̧'hua̧ta̧nö̧ tami iso'quinä'inä ye'ecu ka̧cuä̧jä̧tö̧jä̧. 6Ja̧'hua̧nö̧ ja̧'a̧nä̧ Dios, rö̧ȩnä̧ tta̧'cua̧ tta̧'ȩcuä̧tö̧rö̧ ppä'ädömä, ujuturu'inä ppä'ädinö Tito i̧rȩbȩhuo̧mȩnä̧. 7Titorö topötä esehuocotö pi̧nä̧tö̧jä̧. Ja̧u̧ru̧ rö̧ȩnä̧ ppäcuhuädätucua'attö esehua'a totomenä, ujutu'inä esehuinätöjä. Ja̧u̧ ujuturu ji'ähuinödo: “Jahuätö rö̧ȩnä̧ totta pä'ätö ucuturu. Ja̧'hua̧ta̧nö̧ tta̧'cua̧ tta̧'ȩcu̧ ka̧cuä̧tö̧. Ucuturu'inä rö̧ȩnä̧ amöcuädätö,” ji'ähuinödo. Ja̧'hua̧nö̧ ä̧ju̧cu̧, ji̧nä̧ isocu esehuinösä.
8Iso päi'önä cuyäru huȩyu̧tu̧ huedinömä topö cua̧'cua̧ tta̧cu̧huȩcuä̧tu̧cuo̧mȩnä̧, “Suronä huȩyu̧ti̧nö̧sä̧cö̧” pä'ocösä. Ja̧'hua̧nö̧ beometä cua̧'cua̧ tta̧cu̧huȩcuä̧tu̧cua̧'a̧ topö, “Suronä huȩyu̧ti̧nö̧sä̧ a̧'cua̧ra̧'a̧” chamöcuädö'a̧nö̧ ja̧'a̧. 9Ja̧'hua̧nö̧ ja̧'a̧nä̧ ja̧'hua̧nö̧mä̧ amöcuädocösä. Eseutä eseusä. Juhuorö'inä ja̧'a̧tä̧ra̧'a̧mä̧ cua̧'cua̧ tta̧cu̧huȩcuä̧tu̧cuo̧mȩnä̧, pärocuäcutä amöcuädinätöjä. Ja̧'hua̧ta̧nö̧ cua̧'cua̧ tta̧cu̧huȩcuä̧tu̧cuo̧mȩnä̧, Dios esehua pä'ö ucuturu suronämä jȩpo̧co̧tö̧ pi̧nä̧tö̧jä̧ ujutumä. 10Iso päi'önä koronö päi'omenä, tta̧'cua̧ tta̧'ȩcu̧ kä̧nö̧, Diosrö pä̧huä̧ rö̧jo̧mȩnä̧ ttami 'quittächi'öttömä, ja̧u̧mä̧ pärocuäcutä ttamöcuäda pä'ö ppäda'ado Dios suronä jȩttö̧ jȩpö̧ icua pä'ö. Ja̧'hua̧nö̧ tta̧'cua̧ tta̧ttȩcuo̧mȩnä̧, suronämä ttamöcuädö juiyäcua'a̧nö̧. Ja̧'hua̧nö̧ ja̧'a̧nä̧ pi̧jä̧ttö̧ tta̧'cua̧ tta̧ttȩcu̧mä̧, 'corupäi'äcuähuätä ppäda'ado. 11Ucutumä Diosrö pä̧huä̧ rö̧jo̧mȩnä̧, cuami 'qui'ächi'inätöjä ja̧u̧nu̧mä̧. Jitä 'cuäopäjimä topätucui. Jitämä cua̧'cua̧ pö̧nö̧ jö̧ ji'ähuinätöjä 'cuäopinö huȩnȩ. Ja̧'hua̧ta̧nö̧ ja̧'hua̧nö̧ 'cuäopa'anä ra̧huä̧rö̧nä̧nö̧'i̧nä̧, ye'ecunänö'inä amöcuädinätöjä. Ttörö'inä tocu'ätucua pä'inätöjä. Ja̧'hua̧ta̧nö̧ suronä jȩpi̧nö̧rö̧ ro̧cu̧huȩpä̧tu̧cua̧ pä'ö amöcuädinätöjä. Ja̧'hua̧ta̧nö̧ ja̧'hua̧nö̧ 'cuäopa'anä, ucutu suronä jȩcu̧'ä̧tu̧cuo̧ca̧'a̧ ji̧na̧'a̧ topö huo̧juä̧tö̧ ucuturu. 12Ja̧'hua̧nö̧ ja̧'a̧nä̧ ja̧u̧ cuyäru chi̧huȩyu̧to̧mȩnä̧, churutä, suronä jȩpi̧nö̧rö̧tä̧, amöcuädocö pi̧nö̧sä̧. Ja̧'hua̧ta̧nö̧ suronä jȩo̧mȩnä̧, ubara ttu'inörötä amöcuädocö pi̧nö̧sä̧. Ucutu Dios ä'ca jo̧mȩttö̧ ujuturu cuamöcuädätucumä, pä'äji ta'anö cuamöcuädätucua pä'ö huȩyu̧ti̧nö̧sä̧. 13Ja̧'hua̧nö̧ ja̧'a̧ttö̧ iso päi'önä esehuätöjä jitämä.
Ja̧'hua̧ta̧nö̧ ja̧'hua̧nö̧ topö tesehuomenä, ji̧nä̧ isocu rö̧ȩnä̧ esehuätöjä Titorö topö. Ja̧u̧mä̧ rö̧ȩnä̧ eseunu kö̧ jitämä. Ucutu ja̧'hua̧nö̧ adiunä ö̧ja̧ pä'ö ppä'ädinätöjä. 14Ucuturu eseunu amöcuädösä pä'ö jidähuomenä Titorö, iso päi'önä adiu ji'ähuinösä. Ucuturu o'ca juiyönä jitähuinömä, iso päi'önä huȩnȩ ji̧nö̧ ji'ähuinätöjä. Ja̧'hua̧ta̧nö̧ ucuturu tesehua'a Titorö jitähuomenä, iso päi'önätä ji'ähuinätöjä. 15Ja̧u̧'i̧nä̧ ucuturu repe'ö ucuturu jiähuomenä jȩcu̧'i̧nä̧tu̧cu̧ ta'anö amöcuädö. Ja̧'hua̧ta̧nö̧ ye'ecunänö usurä isotö ta'anö kä̧nö̧, ja̧u̧ru̧ ä̧ju̧cu̧ ppäcuhuädinätucu ta'anö eseunu amöcuädö ja̧u̧mä̧. 16Ttö'inä ja̧'hua̧nö̧ amöcuädö ucuturu, rö̧ȩnä̧ eseusä.
Currently Selected:
2 Corintios 7: PIDNT86
Highlight
Share
Copy
Want to have your highlights saved across all your devices? Sign up or sign in
Nuevo Testamento en Piaroa © Sociedades Biblicas Unidas, 1986.
