2 Corintios 13
13
Röjinä teähuinö huȩnȩ
1Jitä chi̧'cho̧mȩnä̧, huäbodäcuänä päi'äcua'a ucuturu dodächinömä. Ja̧'hua̧nö̧ ja̧'a̧ttö̧ ta̧ju̧nu̧, huämetucuänö korotö suronä jȩtta̧'a̧ jittähuomenätä, chä̧ju̧cuä̧cua̧sä̧. 2Korotörö täbocö suronä jȩpi̧nä̧tö̧rö̧'i̧nä̧, korotörö o'ca toi'önärö'inä, ucuturu todärenä topö 'chä̧nö̧, cuä'catucu jo̧mȩttö̧ jidähuinö huȩnȩ, jitä'inä otottö kä̧nö̧ pä'äji ta'anö ji'äusä. Pä'äji ta'anö ucuturu topö chi̧'chö̧ttö̧mä̧, o'ca toi'önärö ttö̧ji̧pö̧ juiyönä, yecuäcuähuä juiyönä ro̧dȩpä̧cua̧sä̧. 3Ja̧'hua̧nö̧ jȩcho̧mȩnä̧, iso päi'önä ucutumä topö cu̧huo̧jui̧'ä̧cuo̧tö̧jä̧ Cristo ttörö ucuocu pä'ö. Ja̧'hua̧ta̧nö̧ Cristo ucuturu ro̧ȩpo̧mȩnä̧, juiyupocö. Ujurunä aditö ucuturu. 4Iso päi'önä ya̧tȩ jui̧yu̧pa̧rö̧ daunä pȩ'o̧pö̧ ttu̧ju̧na̧ji̧'a̧nö̧, daunä pȩ'o̧pö̧ ttu̧ju̧ni̧nä̧cu̧do. Ja̧'hua̧nö̧ ja̧'a̧nä̧ Dios ujurunä kö̧ jitämä. Ujutu'inä ijuiyuhuinö ta'anö juiyupätöjä. Ja̧'hua̧ta̧nö̧ ja̧u̧ru̧ esetö, Dios ujurunä ka̧cuä̧tö̧jä̧ ucuturu ppätäda pä'ö.
5Ucutu cuamönätucunä ka̧cuä̧mö̧ amöcuädäcuähuätucui, Diosrö esetö adiu cuami 'qui'ächi'önä cu̧ja̧cuä̧tu̧cua̧ pä'ö topö. Ja̧'hua̧nö̧ amöcuädö, ¿Jesucristo ucutucu ö̧ja̧'a̧ huo̧juo̧co̧tö̧jä̧ tä̧ji̧? Ja̧'hua̧nö̧ cu̧huo̧juä̧tu̧cu̧ juiyöttömä, ¿amönä yapareunätä esetinätöjä tä̧ji̧? 6Ja̧'hua̧ta̧nö̧ ujutu pä̧huä̧ rö̧jä̧u̧jä̧ “Adihuä huȩnȩ ji'ähuätö” päcuhuätucuatö pä'ö. 7Diosrö ucuocuätöjä ucuturu, suronä jȩcu̧'ä̧tu̧cu̧ juiya pä'ö. “Ujutu adiu jȩpi̧nä̧tö̧jä̧” pä'ömä pä'ocotöjä. Ucututä adiunä jȩcu̧'ä̧tu̧cua̧ pä'ätöjä, ujuturu tamöcuädoca'anä. 8Ujutumä iso päi'önä huȩnȩ päö'a̧nö̧ jȩpä̧tö̧jä̧. Yoröiso päocö'a̧nö̧mä̧ jȩpo̧co̧tö̧jä̧. 9Ja̧'hua̧nö̧ ja̧'a̧ttö̧ ujutu tijuiyuhuomenä, topö esehuätöjä ucuturu cujuruhuiyätucuä̧u̧. Ja̧'hua̧ta̧nö̧ 'cuäopönä Diosrö tucuocuäcuotöjä adihuä juäitä jȩpö̧ Diosrö pä̧huä̧ rö̧jo̧mȩnä̧ cu̧ja̧cuä̧tu̧cua̧ pä'ö. 10Pi̧yȩ cuyäru huȩyu̧tu̧sä̧ ucuturu topö chi̧'chä̧cua̧'a̧ ä'canä, chi̧'cho̧mȩnä̧ pä̧i̧cu̧nä̧ ro̧dȩpö̧ juiya pä'ö, Tu̧ru̧hua̧ hueinö jȩpö̧. Chutä Tu̧ru̧hua̧, hue'inö ujurunä ttörö, ja̧'hua̧nö̧ ppädäda pä'ö ucuturu, juhua'a yabonö rö̧ä̧chö̧nä̧ cuesetätucuarö pä'ö. Ucuturu be'epäjipö chicua pä'ö hue'ocö pi̧nö̧do.
11Jitämä chö̧jä̧hua̧tö̧, Diosrö pä̧huä̧ rö̧jo̧mȩnä̧, adiu cu̧ja̧cuä̧tu̧cua̧ja̧. Esehuätucui. Ji̧nä̧ ji̧yȩtȩ amöcuädö ka̧cuä̧tu̧cui̧. Ja̧'hua̧nö̧ jȩpö̧ Dios, eseäcuähuä'inä, repeähuä'inä iyömä, ucutucu ö̧jä̧cua̧. 12O'ca toi'önärö te'ähuätucui ttu̧mö̧nä̧ 'chu'ädö. 13Pottötä o'ca toi'önä Diosrö esetätömä, ucuturu te'ähuätö.
14Tu̧ru̧hua̧ Jesucristo ucuturu ppädäcua'a̧nö̧. Dios ucuturu repeäcua'a̧nö̧. Espíritu Santo'inä o'ca toi'önä ucutucu ö̧jä̧cua̧'a̧nö̧. Amén.
Currently Selected:
2 Corintios 13: PIDNT86
Highlight
Share
Copy
Want to have your highlights saved across all your devices? Sign up or sign in
Nuevo Testamento en Piaroa © Sociedades Biblicas Unidas, 1986.
