1 Tesalonicenses 2
2
Pablo Tesalónica ötahuiyänä kä̧nö̧ jiähuinö huȩnȩ
1Tö̧jä̧hua̧tö̧, ucututä huo̧juä̧tö̧jä̧ ucuturu dotächä'ijömä adiu micuähuina'a. 2Ucutu huo̧juä̧tö̧jä̧, Filipos ötahuiyä ttö̧ja̧ suronä ucuocu kä̧nö̧, suronä jȩpi̧nä̧tö̧ ujuturu. Ja̧'hua̧nö̧ ja̧'a̧nä̧'i̧nä̧ rö̧ȩnä̧ surojö 'cuäopomenä, Dios ujuturu ppä'ädinö, yecuäcuähuä juiyönä ttö̧ja̧ suronä jȩttö̧ jȩpö̧ icu huȩnȩ jitähua pä'ö ucuturu. 3Ujutu tieru huȩnȩmä̧ ji'ähuocotöjä. Ja̧'hua̧ta̧nö̧ suronä amöcuädö ji'ähuocotöjä. Ucuturu yapareu ucuocu ji'ähuocotöjä. 4Pärocua'acu Dios ujuturu ka̧cuä̧mö̧ topö hue'inö ttö̧ja̧ suronä jȩttö̧ jȩpö̧ icu huȩnȩ jitähua pä'ö. Ja̧u̧tä̧ huȩnȩ ji'ähuätöjä. Pi̧jä̧ ttö̧ja̧ ttesehuatö pä'ömä ji'ähuocotöjä. Diostä, tami iso'quinä topö huo̧jua̧tä̧, esehuatö pä'ö ji'ähuätöjä. 5Ja̧'hua̧ta̧nö̧ ujutu tamönä ti̧huȩnȩmä̧ adiu ucuocu ji'ähuocotö pi̧nä̧tö̧jä̧, pärätä'inä cuiyätucuatö pä'ö. Dios ja̧'hua̧nö̧ jȩtö̧mä̧ huo̧jua̧. 6Ucutu'inä, korotö'inä ttucuotatö pä'ömä ji'ähuocotö pi̧nä̧tö̧jä̧. Ujutumä Cristo hue'ähuotö tö̧ja̧cua̧'a̧ttö̧, tamönä pä̧huä̧ rö̧jö̧ jȩtö̧ttö̧mä̧ hue'ajatöjä ja̧'hua̧nö̧ ttucuotatö pä'ö. 7Yajute isaju ki̧tti̧mö̧rö̧ tta̧jä̧ra̧'a̧ jä̧'i̧nö̧'a̧nö̧, ttu̧ȩcuä̧nä̧ ka̧cui̧nä̧tö̧jä̧ ucuturu. 8Ucuturu rö̧ȩnä̧ repeta'attö, Dios i̧huȩnȩ ji'äu 'corupä'i'ätöjä ucuturu ppä'ädö. Iso päi'önä rö̧ȩnä̧ repe'ätöjä ucuturu. 9Tö̧jä̧hua̧tö̧, ucutu huo̧juä̧tö̧jä̧ ujutu taditinömä. Mo̧ro̧'i̧nä̧, yodo'inä aditinätöjä tö̧jö̧ micuä timita pä'ö, ucuturu mippoönä jätepö juiya pä'ö Dios i̧huȩnȩ ji'äu kä̧nö̧.
10Ucutucu tö̧ja̧cui̧nö̧mä̧ topinätöjä ucutumä. Dios'inä topinö. Ujutumä adiu jȩpö̧ ka̧cui̧nä̧tö̧jä̧ ucutu Diosrö esetätöcu, yoröiso suronä ttucuocu juiyönä ujuturu. 11Ucutu huo̧juä̧tö̧jä̧, ya̧tȩ i̧tti̧mö̧rö̧ ppä'ädö u̧huo̧juȩta̧'a̧ jä̧'i̧nö̧'a̧nö̧, ppä'ädö huo̧juȩti̧nä̧tö̧jä̧ ucuturu o'ca toi'önärö. 12Dios ucuturu ȩmi̧nö̧ chutäcu eseunu cu̧ja̧cuä̧tu̧cua̧ pä'ö. Ja̧'hua̧nö̧ ja̧'a̧ttö̧ Dios i̧tti̧mö̧ ttö̧ja̧cu̧'a̧nö̧, cu̧ja̧cuä̧tu̧cua̧ pä'ö huo̧juȩtö̧ hue'inätöjä ucuturu.
13Ja̧'hua̧nö̧ ja̧'a̧ttö̧ ujutumä 'cuäopönä eseunu ucuocuätöjä Diosrö. Dios i̧huȩnȩ jitähuomenä, ucutu adiu ä̧ju̧cu̧ esetinätöjä. Pi̧yȩ huȩnȩ iso päi'önä Dios i̧huȩnȩ, pi̧jä̧ ttö̧ja̧ tti̧huȩnȩmä̧cö̧. Ja̧u̧ huȩnȩ cuesetätucuomenä, cuamöcuädätucumä pärohua'attö, iso päi'önä huȩnȩ ja̧'a̧. 14Tö̧jä̧hua̧tö̧, ucutu cuahuaruhuä ucuturu suronä jȩpö̧ ubara ttucuhuätucuomenä, Judea rȩjȩnä̧ Cristo Jesúsru esetätö iglesia ruhuärö 'cuäopinö ta'anö, 'cuäopina'a ucuturu. Jahuätö'inä ttamönä ttahuaruhuä judíos ttö̧ja̧ suronä jȩtta̧'a̧ttö̧, ubara ttu'inätö. 15Pitö judíos ttö̧ja̧mä̧ pä'äji jitötättö Dios i̧huȩnȩ jiäcuähuä isotörö cuä'ö tticuinö ta'anö, Tu̧ru̧hua̧ Jesúsru'inä cuä'ö icuinätö. Ujuturu'inä ya'opö icuinätö. Dios'inä jahuätörö esehuocö. O'ca toi'önä ttaboiyotö. 16Ujutumä judíos huocotörö jitähua pätomenä, suronä jȩttö̧ jȩpö̧ icu huȩnȩ tteseta pä'ö, jahuätö judíos ttö̧ja̧mä̧ jitäu juiyönä jȩpä̧tö̧. Ja̧'hua̧nö̧ jȩtto̧mȩnä̧, ji̧nä̧ isocu suronä jȩpä̧tö̧. Ja̧'hua̧nö̧ ja̧'a̧nä̧ jitämä Dios ö̧tä̧bo̧tä̧cuȩmä̧ 'cuäopa'a jahuätörö.
Pablo pä'äji ta'anö Tesalónica ötahuiyära̧'a̧ do'ächö i̧'cha̧ päinö huȩnȩ
17Tö̧jä̧hua̧tö̧, ujutu ucututtu kara'a tö̧ja̧cuo̧mȩnä̧, ucuturu totoca'anä, 'cuäopönä tami iso'quinä amöcuädinätöjä ucuturu. Ucuturu rö̧ȩnä̧, tota pä̧huä̧ rö̧ji̧nä̧u̧jä̧. 18Koronö'inä chi̧'cha̧ pä'ö jȩpi̧nö̧sä̧. Ja̧'hua̧ta̧nö̧ recuo ti̧'cha̧ päta'anä, ti̧'chö̧ juiyönä jȩi̧nä̧u̧jä̧ Satanás. 19Tu̧ru̧hua̧ Jesucristo ichomenä, ¿dirö tesehuäcua'ajä̧ttö̧? ¿Dirö tta̧tä̧rä̧cua̧'a̧jä̧ttö̧ tesehua pä'ö? ¿Dirö tamöcuädäcua̧'ajä̧ttö̧? Ucuturu tesehuäcuotöjä Tu̧ru̧hua̧ Jesucristo ichomenä. 20A̧, iso päi'önä ucuturu amöcuädö tesehuäcuotöjä.
Currently Selected:
1 Tesalonicenses 2: PIDNT86
Highlight
Copy
Compare
Share
Want to have your highlights saved across all your devices? Sign up or sign in
Nuevo Testamento en Piaroa © Sociedades Biblicas Unidas, 1986.
