1 Pedro 4
4
Dios ujuturu iyinö huȩnȩ
1-2Ja̧'hua̧nö̧ ja̧'a̧ttö̧ Cristo chutä amönä jä̧ttä̧pä̧ya̧ ubara ttuhuinö ta'anö, ucutu'inä ubara ttucuhuätucuäcua'a̧nö̧. Ya̧tȩ, chutä amönä jä̧ttä̧pä̧ya̧ ubara ttu'u, suronä jȩä̧cuä̧huä̧ jaropi'ö, hua'ö icuome jubö päi'önä Diosrö pä̧huä̧ rö̧jo̧mȩnä̧ adiunä ö̧ja̧ pä'ö, chutä amöcuädö jȩö̧ juiya pä'ö. 3Iso päi'önä Diosrö jerupätö suronä jȩpö̧ jȩttö̧'a̧nö̧, jȩpö̧ ka̧cui̧nä̧tö̧jä̧ recuo ucutu'inä. Ja̧u̧nu̧ suronä ka̧cui̧nä̧tö̧jä̧ ucuturu pä̧huä̧ rö̧jö̧tä̧ jȩpö̧. Ja̧'hua̧ta̧nö̧ cuamönätucu cuamöcuädäu jȩpi̧nä̧tö̧jä̧. Tä̧'ä̧mö̧ kä̧nö̧ huopö ka̧cui̧nä̧tö̧jä̧. Ttu̧mö̧nä̧ adicuä'inä esetö ka̧cui̧nä̧tö̧jä̧. 4Jitämä ucutu ja̧'hua̧nö̧ suronä jȩpä̧tö̧cu̧ cuecuhuächätucuoca'attö, jerupätödo cuesetätucu. Ja̧'hua̧nö̧ ja̧'a̧ttö̧ ucuturu suronä ucuocuätö. 5Yodoji Dios ttö̧ja̧rö̧ pojocuä mo̧ro̧ päi'omenä, ji̧nä̧ ka̧cuä̧tö̧rö̧'i̧nä̧, 'corupä'i'inätörö'inä “Ucumä adiu jȩpi̧nö̧jä̧”, “Ucumä suronä jȩpi̧nö̧jä̧” pä̧cua̧rö̧ jȩtti̧nö̧mä̧ jittähuäcuotö jahuätö'inä. 6Ja̧'hua̧nö̧ ja̧'a̧ttö̧ o'ca toi'önä 'corupä'i'inätömä pi̧jä̧ ttö̧ja̧rö̧ tä̧bo̧cuä̧ päi'önä 'cuäopä̧cuȩ 'cuäopina'attö, adihuä huȩnȩ, jittähua'a ä̧ju̧cui̧nä̧tö̧do. Ja̧'hua̧nö̧ ä̧ju̧cui̧nä̧tö̧do, tta̧'cua̧ru̧hua̧nä̧ Diosrö pä̧huä̧ rö̧jo̧mȩnä̧ ttö̧ja̧cua̧ pä'ö.
7O'ca juiyö beipächäcuome tö'cöhuächa'ado. Ja̧'hua̧nö̧ ja̧'a̧ttö̧ cua̧'cua̧ pö̧nö̧ ka̧cuä̧tu̧cui̧. Adiunä Diosrö amöcuädö ucuocu ka̧cuä̧tu̧cui̧. 8Korottö'inä abonänö eseunu repe'ätucui cu̧jä̧hua̧tö̧rö̧. Iso päi'önä adiu eseunu cu̧ja̧cuä̧tu̧cuo̧mȩnä̧, cu̧jä̧hua̧tö̧ suronä jȩttö̧ unichi'ätöjä. 9Cuojusodenä ichätörö ra̧huä̧rä̧cuä̧huä̧ juiyönä eseunu ppä'ädätucui. 10Dios ucuturu iyö ppädinö ta'anö, korotörö ppä'ädö ka̧cuä̧tu̧cui̧. Koro juäi tta̧huä̧rä̧cuä̧huä̧ i̧sa̧ tta̧huä̧rö̧'a̧nö̧, tta̧'ä̧rä̧tu̧cui̧ Dios adihuä juäi iyömä. 11Ya̧tȩ ucuocuttumä, Dios i̧huȩnȩ päö ta'anö ucuocu'a̧nö̧ ja̧'a̧. Ya̧tȩ ka̧ra̧rö̧ ppädöttömä, Dios ujuru iyömä ppä'ädö aditö'a̧nö̧ ja̧'a̧. O'ca juiyönä jȩcu̧'ä̧tu̧cuo̧mȩnä̧, Jesucristo i̧mi̧nä̧ jȩpö̧, Diosrö esehuäcuähuätucui. 'Cuäopönä Diosrö ttesehuäcuähuäcua'a̧nö̧. Ja̧'hua̧ta̧nö̧ 'cuäopönä Dios ujuruhuäcua'a̧nö̧. Amén.
Diosrö esetätö ubara ttuttu huȩnȩ
12Adihuä chö̧jä̧hua̧tö̧, koro juäi rö̧ȩnä̧ surojö 'cuäopomenä ucuturu, koro koronö cuamöcuädä'chätucuä'. Totocö jä̧'i̧jö̧ 'cuäopa'a ujuturu pä'ö cuamöcuädätucuä'. 13Pärocua'acu, Cristo ubara ttuhuinö'a̧nö̧ ubara ttu'u, cua̧'cua̧ tta̧cu̧huȩcuä̧tu̧cuo̧mȩnä̧, Cristo ichö mo̧ro̧ rö̧ȩnä̧ cuesehuätucuäcua'a amöcuädö esehuäcuähuätucui. 14Ucutumä Cristorö cuesetätucua'attö, suronä ra̧huä̧rö̧ huottöttömä, eseunu cu̧ja̧cuä̧tu̧cua̧ja̧. Iso päi'önä adihuä i̧sa̧ Espíritu Santo ucutucu kö̧. Jahuätö suronä ucuocuätö ja̧u̧ru̧. Ucutumä ucuotönö ucuocuätöjä ja̧u̧ru̧. 15Ucutu ubara ttucuhuätucuttumä, ttö̧ja̧rö̧ cuä'ö icu'a̧nö̧ hua̧'i̧nä̧, nä̧u̧cuä̧rö̧ ö̧jö̧'a̧nö̧'i̧nä̧, koro suronä jȩttö̧'a̧nö̧'i̧nä̧ ubara ttuttu ta'anö, ubara ttucuhuätucu juiya pä'ösä ucutumä. 16Ya̧tȩ Diosrö esetö kä̧nö̧ ubara ttuttumä, yoröiso dä'äcuocö pa̧ji̧. Dios i̧mi̧nä̧ eseta'attö, Diosrötä esehuäcua'a̧nö̧.
17Dios ttö̧ja̧rö̧ pojocuä mo̧ro̧ täcö ichäja'a. Dios i̧tti̧mö̧rö̧ ä'canä pä̧cua̧. Ja̧'hua̧nö̧ ja̧'a̧nä̧ ujuturu ja̧'hua̧nö̧ ä'canä päa'attö, ¿tta̧'a̧nö̧ päcua'ajä̧ttö̧ Dios i̧huȩnȩ esetocotörömä? 18Ja̧'hua̧ta̧nö̧ adihuä juäi jȩpä̧tö̧mä̧ tteseta pätta'anä, ttesetö juiyönä jö̧ttö̧mä̧, suronä jȩpä̧tö̧mä̧ ¿tta̧'a̧nö̧ jȩttä̧cua̧'a̧jä̧ttö̧? 19Iso päi'önä Diosrö pä̧huä̧ rö̧jo̧mȩnä̧ ubara ttu'ätömä, juhua'a yabonö adihuä juäi jȩpö̧ ttö̧ja̧cuä̧cua̧'a̧nö̧. Ja̧'hua̧ta̧nö̧ tta̧'cua̧ru̧hua̧rö̧ Diosrö, jitörötä aditinörö, ttiyäcua'a̧nö̧. Chutä o'ca juiyönä päömä, jȩpö̧do.
Currently Selected:
1 Pedro 4: PIDNT86
Highlight
Copy
Compare
Share
Want to have your highlights saved across all your devices? Sign up or sign in
Nuevo Testamento en Piaroa © Sociedades Biblicas Unidas, 1986.
