1 Pedro 2
2
1Ja̧'hua̧nö̧ ja̧'a̧ttö̧ o'ca juiyönä suronä jȩä̧cuä̧huä̧'i̧nä̧, yapareu jiäcuähuä'inä, korotörö suronä ucuocuäcuähuä'inä, korotö ttu̧ju̧nä̧rö̧ pä̧huä̧ rö̧jö̧ toäcuähuä'inä jaropi'ätucui. 2Ya̧tȩ ji̧'qui̧cha̧hua̧ ttatate isoya ahua pä'ö usu'a̧nö̧, usätucui ucutu'inä adihuä juäi huȩnȩ, juhua'a yabonö cujuruhuätucua pä'ö, ja̧'hua̧ta̧nö̧ Dios ucutu suronä jȩcu̧'ä̧tu̧cu̧ jȩpö̧ icua pä'ö. 3Iso päi'önä ja̧'hua̧nö̧ jȩcu̧'ä̧tu̧cu̧ttu̧mä̧, Tu̧ru̧hua̧rö̧ adiunä esetätöjä pä'ö huo̧juä̧tö̧jä̧.
Cristomä inähuä 'corupäi'ocohuä jä̧'i̧nö̧'a̧nö̧ kö̧
4Tö'cöpächätucui Tu̧ru̧hua̧rö̧, inähuä hua'ö icuocohuä jä̧'i̧nö̧'a̧nö̧ hua̧rö̧. Pi̧jä̧ ttö̧ja̧ ttöjö'cocö ji̧nö̧. Ja̧'hua̧nö̧ ja̧'a̧nä̧'i̧nä̧ Dios öjö'ca'attö, rö̧ȩnä̧ micuähuähuä. 5Koro juäi isode ttaditö'a̧nö̧, Dios adihuode adita'anä, ucutu'inä ido'qui isode adicuo'qui jä̧'i̧nö̧'a̧nö̧ jö̧nä̧ ka̧cuä̧tu̧cui̧. Ja̧'hua̧ta̧nö̧ juhuode tta̧'ä̧rä̧tö̧mä̧, Dios aditö icuinä̧u̧mä̧, Jesucristorö esetö Dios öjö'cö juäi iyö ttö̧jö̧'a̧nö̧ ka̧cuä̧tu̧cui̧ ucutu'inä. 6Ja̧'hua̧nö̧ ja̧'a̧ttö̧ Huȩyu̧cuä̧ Huȩnȩ päa'a:
Jueö isä'ca ttu̧ju̧nu̧'a̧nö̧, adihuä juäi inähuä, rö̧ȩnä̧ micuähuähuä, ku̧nu̧sä̧ Siónnä.
Ja̧u̧ru̧ esetömä, yoröiso a̧'cua̧ tta̧'ȩcu̧ re'tehuocö.
7Ucutu esetätörömä, ja̧u̧ inähuä rö̧ȩnä̧ micuähua'ado. Esetocotörömä pi̧yȩ Huȩyu̧cuä̧ Huȩnȩ päö ta'anö 'cuäopa'a:
Jitötä adicuä ttö̧ja̧mä̧ ttöjö'cocohuä ji̧nähuä,
jueö isä'ca jä̧'i̧nö̧'a̧nö̧ kähuä jitämä.
8Ja̧'hua̧ta̧nö̧ pi̧yȩ päinö huȩnȩ'i̧nä̧ 'cuäopa'a.
Ja̧u̧ inähuä döttäcuähuä jä̧'i̧nö̧'a̧nö̧ kö̧. Juhuähuä inähuänä dö'ö ma̧ttähuä jä̧'i̧nö̧'a̧nö̧ kö̧,
päa'a Huȩyu̧cuä̧ Huȩnȩ. Jahuätö Dios i̧huȩnȩ esetocotömä, inähuä dö'ö ma̧'ä̧chä̧tö̧ jä̧'i̧nö̧'a̧nö̧ ka̧cuä̧tö̧. Jahuätö ttuhuäpächäcua'a ä'canä, jahuätörö ja̧'hua̧nö̧ 'cuäopäcua'a pä'ö amöcuädinö Dios.
Dios i̧tti̧mö̧ ttö̧jö̧ huȩnȩ
9Ucutu Dios ȩmi̧nä̧u̧jä̧. Tu̧ru̧hua̧ hue'ähuotöjä, churutä pä̧huä̧ rö̧jo̧mȩnä̧ jȩcu̧'ä̧tu̧cua̧ pä'ö. Ja̧'hua̧ta̧nö̧ ucutumä Dios umöhuäyotöjä, chutä ä'ca jo̧mȩttö̧ adiunätä cu̧ja̧cuä̧tu̧cua̧ pä'ö. Ucutumä ja̧'hua̧nö̧ ka̧cuä̧tö̧jä̧, Dios adihuä juäi jȩö̧ huȩnȩ jicuhuähuätucua pä'ö. Ja̧u̧ yo̧ö̧ttö̧ rä'opö, adihuä juäi tȩa̧u̧nä̧ cuecuhuächätucua pä'ö huoinä̧u̧jä̧. 10Pä'äjimä ttumöhuäyotö pocotö pi̧nä̧tö̧jä̧. Jitämä Dios umöhuäyotöjä. Pä'äjimä ihueye tta̧'cua̧ tta̧nö̧ tottoco̧u̧ pi̧nä̧tö̧ja̧. Jitämä Dios re rö̧jö̧nä̧ toä̧u̧jä̧.
Diosrö pä̧huä̧ rö̧jö̧ jȩpö̧ kä̧cuä̧huä̧ huȩnȩ
11Adihuä chö̧jä̧hua̧tö̧, ucuturu pä'ösä, korotö tti̧rȩjä̧ttö̧ ichö ttö̧jö̧'a̧nö̧, cua̧'cua̧ru̧hua̧nä̧ rohuäcuähuä, pi̧jä̧ttö̧ amöcuädäcuähuä, cuamöcuädätucuä'. 12Adiunä ka̧cuä̧tu̧cui̧ Diosrö esetocotö ttä'ca jo̧mȩ. Ja̧'hua̧nö̧ ja̧'a̧ttö̧ jahuätö suronä jȩpä̧tö̧rö̧ ttucuocu'a̧nö̧ ttucuocuomenä ucuturu, adiu jȩcu̧'ä̧tu̧cua̧'a̧ topö, Diosrö ttesehuäcuotö, Dios ttö̧ja̧rö̧ pojocuä mo̧ro̧ päi'omenä.
13Tu̧ru̧hua̧rö̧ esetö kä̧nö̧, pi̧jä̧ ttö̧jä̧ hueähuä huȩnȩ hueö'a̧nö̧ jȩpä̧tu̧cui̧. Ji̧nä̧ isocu ru̧hua̧ hueö'a̧nö̧ jȩpä̧tu̧cui̧. 14Ja̧'hua̧ta̧nö̧ ru̧hua̧ ippeyä ruhuotö'inä huettö'a̧nö̧ jȩpä̧tu̧cui̧. Jahuätö suronä jȩpä̧tö̧rö̧ ttö̧tä̧bo̧ta̧ pä'ö hue'ähuotö. Ja̧'hua̧ta̧nö̧ adiu jȩpä̧tö̧rö̧ ttesehua pä'ö hue'ähuotö. 15Adiunä cu̧ja̧cuä̧tu̧cua̧ pä'ödo Diosmä, jerupö ucuocuätö juhua'a yabonö ttucuocu juiya pä'ö.
16Surojöttö ejädö icuähua̧ ö̧jö̧'a̧nö̧, eseunu ka̧cuä̧tu̧cui̧. Ja̧'hua̧nö̧ eseunu cu̧ja̧cuä̧tu̧cua̧'a̧ttö̧, suronämä jȩcu̧'ä̧tu̧cuä̧'. Dios umöhuäyotö ttö̧jö̧'a̧nö̧, ka̧cuä̧tu̧cui̧. 17Ucuotö ka̧cuä̧tu̧cui̧ o'ca toi'önärö. Cristonä cu̧jä̧hua̧tö̧rö̧ eseunu kä̧nö̧, Diosrö ye'ecunänö ka̧cuä̧tu̧cui̧. Pi̧jä̧ ru̧hua̧rö̧ ucuotö ka̧cuä̧tu̧cui̧.
Cristo ubara ttuhuinö huȩnȩ
18Korotöcu aditätö, curuhuotö huettö o'ca juiyönä eseunu aditätucui. Curuhuotö adiu huȩ'ä̧rä̧tö̧rö̧'i̧nä̧, suronä huȩ'ä̧rä̧tö̧rö̧'i̧nä̧ huettömä yoräteunä eseunu aditätucui. 19Ya̧tȩrö̧, chutä suronä jȩo̧ca̧'a̧nä̧ suronä jȩttö̧ttö̧mä̧, Diosrö eseu amöcuädö ubara ttuttumä, adiu jȩpö̧. 20Suronä jȩcu̧'ä̧tu̧cua̧'a̧ ro̧ttȩpo̧mȩnä̧, cuami 'quicuhuächi'ätucuttumä ¿adihua'a tä̧ji̧? Ja̧'hua̧nö̧ ja̧'a̧nä̧ adiunätä jȩcu̧'ä̧tu̧cua̧'a̧ ro̧ttȩpo̧mȩnä̧, cuami 'quicuhuächi'ätucuttumä, ja̧u̧tä̧ adihua'a Dios ä'ca jo̧mȩttö̧. 21Dios ucuturu huopinö. Cristo ubara ttu'inö ucuturu. Chutä cueächinö ta'anö, cue'ächätucui ucutu'inä. 22Ja̧u̧mä̧ yoröiso suronä jȩpo̧cö̧ pi̧nö̧. Yapareu'inä ji'ähuocö pi̧nö̧ yoröiso. 23Ja̧u̧ru̧ ra̧huä̧rö̧ huottomenä, ädätö huopocö pi̧nö̧. Ubara ttuhua'anä'inä, ra̧huä̧ri̧po̧cö̧ pi̧nö̧. Jä'o Diosrö, o'ca toi'önärö yoräteunä pä̧cua̧rö̧, amöcuädö ucuocuinö. 24Cristo ujutu suronä jȩtö̧ chutä jä̧ttä̧pä̧ya̧nä̧ ȩpi̧nö̧ daunä kä̧nö̧ 'corujuoächomenä. Ja̧'hua̧nö̧ ȩpi̧nö̧ suronä jȩpö̧ 'corupäti'a'acu. Adiunätä tö̧ja̧cua̧ pä'ö ȩpi̧nö̧. Ucuturu aditö icua pä'ö ubara ttu'inö. 25Pä'äjimä oveja re'tehuächö cueächö'a̧nö̧ cue'ächinätöjä. Jitämä Cristocu ppa̧'ä̧chi̧nä̧tö̧jä̧. Chutämä o̧vȩja̧stö̧rö̧ tta̧huä̧rä̧cuä̧huä̧ i̧sa̧ tta̧huä̧rö̧'a̧nö̧ tta̧'ä̧rö̧ ucuturu. Ja̧'hua̧ta̧nö̧ cua̧'cua̧ru̧hua̧nä̧'i̧nä̧ tta̧'ä̧rö̧ ucuturu.
Currently Selected:
1 Pedro 2: PIDNT86
Highlight
Copy
Compare
Share
Want to have your highlights saved across all your devices? Sign up or sign in
Nuevo Testamento en Piaroa © Sociedades Biblicas Unidas, 1986.
