1 Juan 4
4
Iso päi'önä Espíritu Santorö ttu̧ju̧nä̧ra̧ja̧ pä'ö ka̧cuä̧mö̧ toäcuähuä huȩnȩ
1Chö̧jä̧hua̧tö̧, cuesetätucuä' o'ca toi'önä “Espíritu Santo ttöcu kö̧” pä'ätörö. Jahuätörö ka̧cuä̧mö̧ topätucui, Espíritu Santo jahuätöcu ö̧ja̧ pä'ö. Jitä recuätö yapareu ucuocu “Dios i̧huȩnȩ ji'ähuätöjä” pä'ätömä pi̧jä̧ o'ca juiyönä cue'ächätö. 2Ja̧'hua̧nö̧ cu̧huo̧juä̧cuo̧tö̧jä̧ Espíritu Santorö ku̧nä̧rä̧tö̧rö̧. Jesucristo ubo jö̧nä̧ ichinö pä'ö pä'ätömä, jahuätötä Espíritu Santorö ku̧nä̧rä̧tö̧. 3Jesús ubo jö̧nä̧ ichinö pä'ocotömä, Espíritu Santo to'ätö. Cristo a̧bo̧i̧ya̧ amöcuädö'a̧nö̧ amöcuädätö jahuätömä. Ucutu ä̧ju̧cui̧nä̧tö̧jä̧ Cristo a̧bo̧i̧ya̧ i̧chä̧cua̧ pätta'a. Jitä täcö pi̧jä̧nä̧ kö̧.
4Chi̧tti̧mö̧ huotö, ucutu Dios i̧tti̧mö̧jä̧. Yapareu ucuocuätöttö'inä abonänö juruhuinätöjä. Ähuettä pi̧jä̧ jähuä jȩpö̧ ka̧cuä̧tö̧cu̧ kö̧ttö̧'i̧nä̧ abonänö ju̧ru̧hua̧ ucutucu kö̧mä̧. 5Jahuätö pi̧jä̧ ttö̧ja̧ ja̧'a̧ttö̧, pi̧jä̧ jähuätä ucuocuätö. Pi̧jä̧ ttö̧ja̧ ä̧ju̧cuä̧tö̧ jahuätö ttucuocu. 6Ujutumä Dios i̧tti̧mö̧jä̧. Diosrö huo̧juä̧tö̧mä̧ ujutu tucuocu adiu ä̧ju̧cuä̧tö̧. Dios i̧tti̧mö̧cö̧ ujutu tucuocu ä̧ju̧cuo̧co̧tö̧. Ja̧'hua̧nö̧ ja̧'a̧ttö̧ ujutu huo̧juä̧tö̧jä̧ Espíritu Santo hueö jȩpä̧tö̧rö̧'i̧nä̧, ähuettä hueö jȩpä̧tö̧rö̧'i̧nä̧.
Tö̧jä̧hua̧tö̧rö̧ repeähuä huȩnȩ
7Chö̧jä̧hua̧tö̧, repeähuä Diosttö icha'attö, repetö'a̧nö̧ ja̧'a̧ tö̧jä̧hua̧tö̧ o'ca toi'önärö. Repe'ätömä Dios i̧tti̧mö̧. Diosrö huo̧juä̧tö̧. 8Repe'ocotömä Diosrö huo̧juo̧co̧tö̧. Dios ujuturu repe'ömä kö̧. 9Dios I̧tti̧ chu ä̧cua̧rö̧ hue'inö pi̧jä̧ra̧'a̧, kä̧cuä̧huä̧ i'co i'cächö iyatö pä'ö. Ja̧'hua̧nö̧ jȩa̧'a̧ttö̧ huo̧juä̧tö̧jä̧ Dios ujuturu repe'ö pä'ö. 10Pi̧yȩmä̧ iso päi'önä repeähuämä: Ujutu ä'canä Diosrö repe'ocotö pi̧nä̧tö̧jä̧. Chutä ä'canä ujuturu repeömä rö̧ȩnä̧ repea'attö, I̧tti̧rö̧ hue'inö suronä jȩti̧nö̧ töcö icua pä'ö.
11Chö̧jä̧hua̧tö̧, Dios ja̧'hua̧nö̧ ujuturu repea'attö, ujutu repetö'a̧nö̧ ja̧'a̧ tö̧jä̧hua̧tö̧ o'ca toi'önärö. 12Yoröiso ya̧tȩ'i̧nä̧ topocö pi̧nö̧ Diosrömä. Ja̧'hua̧nö̧ ja̧'a̧nä̧ tö̧jä̧hua̧tö̧rö̧ repetomenä, Dios ujutucu kö̧. Ja̧'hua̧ta̧nö̧ Diosttö repeähuä jo̧mȩ päi'önä rö̧ä̧cha̧'a̧ ujuturu. 13Dios Espíritu Santorö ujutucu ö̧ja̧ pä'ö hueina'attö, huo̧juä̧tö̧jä̧ Dioscu ka̧cuä̧tö̧jä̧ pä'ömä, ja̧'hua̧ta̧nö̧ Dios ujutucu kö̧. 14Ujutu totinömä ji'ähuätöjä, Dios I̧tti̧rö̧ hue'inö pä'ö, pi̧jä̧nä̧ ka̧cuä̧tö̧ suronä jȩttö̧ jȩpö̧ icua pä'ö. 15Jesúsmä Dios I̧tti̧ ja̧'a̧ pä'ö ji'ähuätöcu kö̧ Diosmä. Jahuätötä Dioscu ka̧cuä̧tö̧.
16Ujutu esetö huo̧juä̧tö̧jä̧, Dios ujuturu repe'ö kö̧. Dios, ujuturu repe'ömä kö̧. Repe'ö ka̧cuä̧tö̧mä̧ Dioscu ka̧cuä̧tö̧. Ja̧'hua̧ta̧nö̧ Dios jahuätöcu kö̧. 17Diosttö repeähuä jo̧mȩ päi'önä rö̧ä̧cha̧'a̧ ujuturu, Dios ttö̧ja̧rö̧ pojocuä mo̧ro̧ päi'omenä, yecuäcuähuä juiyönä tesehua pä'ö, pi̧jä̧nä̧ tö̧ja̧'a̧ttö̧ Jesucristo ö̧jö̧ ta'anö. 18Dios repeä̧u̧mä̧ ye'ecuocotö. Dios ujuturu adiu repea'attö, yoröiso ye'ecuocotöjä. Ja̧'hua̧nö̧ ja̧'a̧ ye'ecuätömä tä̧bo̧cuä̧ tta̧'ä̧rä̧tö̧. Ye'ecuätömä Diosrö adiu repe'ocotö.
19Dios churutä repetäcua'a ä'canä repe'inö ujuturu. Ja̧'hua̧nö̧ ja̧'a̧ttö̧ ujutu'inä repe'ätöjä Diosrö. 20Ya̧tȩ pä'ö “Diosrö repe'ösä” päöttömä, ö̧jä̧hua̧rö̧ repeoca'anä, ja̧u̧mä̧ yaparehua̧. Ja̧'hua̧nö̧ ja̧'a̧ ö̧jä̧hua̧ toäcuru repe'ocömä, Dios tococuru repe'ocö. 21Dios ujuturu hueinömä päa'a: Diosrö repe'ömä, ö̧jä̧hua̧rö̧'i̧nä̧ repeö'a̧nö̧ ja̧'a̧.
Currently Selected:
1 Juan 4: PIDNT86
Highlight
Copy
Compare
Share
Want to have your highlights saved across all your devices? Sign up or sign in
Nuevo Testamento en Piaroa © Sociedades Biblicas Unidas, 1986.
