Romanos 6
6
Crito jäwänä̧ a̧'kua̧ri̧'i̧nä̧tü̧jä̧
1¿Ja̧'wa̧nü̧ ja̧'a̧mä̧ toku pätäkua'ajä̧ttü̧? ¿Yabonü̧ surojümä̧ jȩtä̧kua̧'a̧, Dio re ü̧ji̧nü̧ rü̧ä̧cha̧ pä'ümä̧? 2¡Isokü̧, ja̧'wa̧nü̧mä̧kü̧! ujutumä̧, isopäi'ünä̧ surojünä̧ jȩti̧nü̧mä̧ wa'ü ikuinä̧tü̧jä̧; ja̧'wa̧nü̧ ja̧'a̧ttü̧ surojümä̧ jȩpü̧ kka̧kuo̧ko̧tü̧jä̧. 3¿Ukutumä̧ yoriso o'katoi'ünä̧ jerupätüjä̧ tä̧jí̧, jua̧u̧ bautizo jȩi̧nü̧nä̧ jȩtä̧kuä̧wi̧na̧'a̧mä̧, wa'ü ikuinü̧nä̧'i̧nä̧ bautizo jȩpä̧kuä̧wä̧tü̧jä̧, pä'ümä̧? 4Isopäi'ünä̧ bautizo jȩtä̧kuä̧wi̧nü̧nä̧, Crito-ku 'koru juotächa'a 'turu ikuäwotü jü̧nä̧tä̧ wotüjä̧, jä'o üadiwä ujurunä̧ Crito wa'arettü ttoächinü̧ta̧'a̧nü̧, ujutu'i̧nä̧ jareünä̧ kkä̧kuä̧wä̧nä̧ kuetächa pä'ü.
5Isopäi'ünä̧ bautizo jȩtä̧kuä̧wi̧nü̧, Crito-ku ji̧nä̧ ji̧yȩtȩnä̧ 'korujuotächina̧'a̧mä̧ ja̧'wa̧ta̧nü̧ chutä ttoächinü̧nä̧ ji̧nä̧ ji̧yȩtȩ pä'i'nä̧tü̧jä̧. 6Täkü wo̧juä̧tü̧jä̧, ä'koji jȩpü̧ tü̧ji̧nü̧mä̧, chutäku yo̧mȩtȩnä̧ ü̧jo̧kä̧ jäinä̧ toe'ächomȩnä̧, ji̧yȩku̧ tu'uttächinü̧ surojä'ijü ujuru si'epü ikuina̧'a̧ pä'ü, täkü jua̧u̧ ukuotäkuäwokü wea'anä̧ ti̧'chü̧ juiya pä'ümä̧. 7Isopäi'ünä̧ 'korujuo'ächürümä̧, täkü surojümä̧ weokoku. 8Ja̧'wa̧nü̧ ja̧'a̧ttü̧ Crito-ku 'korujuotächüttümä̧, chutäku ta̧'kua̧rä̧kuo̧tü̧jä̧ pä'ü esetätüjä̧. 9Ja̧'wa̧ta̧nü̧ wo̧juä̧tü̧jä̧, Crito-mä̧ wa'arettü ttoächina̧'a̧mä̧, täkü wa'aremä̧ kkȩdä̧ro̧ko̧ku̧ pä'ü. 10Isopäi'ünä̧ Crito 'korujuoächomȩnä̧mä̧, surojü ukuotäkuäwokü ujuru ji̧nü̧mä̧ ya'uteku 'kuäopünä̧tä̧ toe'ächinü̧; Jitä ü̧jü̧mä̧, Dio-rü eseu ü̧jü̧tä̧ ja̧'a̧. 11Ukutu'i̧nä̧ ja̧'wa̧ta̧nü̧ amükuädü kka̧kuä̧tu̧kui̧, ukuotäkuäwokü surojümä̧ wa'ü ikuinü̧ jü̧nä̧tä̧, jitä ku̧ja̧kuä̧tu̧ku̧mä̧ Dio eseunü̧tä̧ kka̧kuä̧tu̧kui̧ Crito Jesú-nä̧.
12Ja̧'wa̧nü̧ ja̧'a̧ttü̧, surojü ukuotäkuäwokü kuidepätukunä̧ wea'anä̧mä̧ ku̧ja̧kuä̧tu̧kuä̧ ja̧'wa̧ta̧nü̧ ji̧yȩtä̧ pä̧wä̧rü̧ja̧'a̧ku̧ oipa'anä̧mä̧. 13Ja̧'wa̧ta̧nü̧ surojüra̧'a̧ku̧ oipa'anä̧mä̧ kuiyäwätukuä. Ja̧'wa̧nü̧ ja̧jü̧ jueimä̧, wa'ü ikui'ü'kotü tto'ächätü jü̧nä̧tä̧ Dio-rümä̧ iyäwätukui, adiwä juei ukuotätü jü̧nä̧tä̧. 14Ja̧'wa̧nü̧ jo̧mȩnä̧ ukutunä̧mä̧ ukuotäkuäwokü surojümä̧ wȩo̧ko̧u̧ kuäkuotüjä̧, täkü weäwä wȩnȩnä̧mä̧ kka̧kuo̧ko̧tü̧jä̧, jitämä̧ Dio re ü̧ji̧nü̧nä̧ kka̧kuä̧tü̧jä̧.
Dio-rü adiwa'aku jȩä̧kuä̧wä̧ isotüjä̧
15¿Ja̧'wa̧nü̧ ja̧'a̧mä̧ttü̧? ¿weäwä wȩnȩnä̧ tü̧ja̧kuo̧ka̧'a̧, Dio re ü̧ji̧nü̧nä̧ tü̧ja̧kua̧'a̧ttü̧ ukuotäkuäwokü surojü jȩpü̧ tü̧ja̧kuä̧kua̧'a̧ tä̧jí̧? ¡Ja̧'wa̧nü̧mä̧kü̧! 16Ukutumä̧ wo̧juä̧tü̧jä̧ ya̧tȩ ttu̧ru̧wa̧rü̧ umüwäyotü jü̧nä̧ ttiyäwomȩnä̧mä̧, umüwäyotü jü̧nä̧ ttukuota pä'ütä ja̧'a̧. Ja̧'wa̧nü̧ ja̧'a̧ttü̧ surojü ttukuotomȩnä̧mä̧ wa'arera̧'a̧tä̧ ȩpü̧, ja̧'wa̧ta̧nü̧ Dio-rü ttukuotomȩnä̧mä̧ adiwä juei ttukuotünä̧ ja̧'a̧. 17Ja̧'wa̧nü̧ ja̧'a̧nä̧ Dio-rü esewätüjä̧, ä'kojimä̧ surojü jȩä̧kuä̧wä̧tä̧ umüwäyotü kuinä̧tu̧kua̧'a̧mä̧, kua̧mi̧'iso'kituku o'kajuiyünä̧ kukuotätukua'attü̧, kkä̧kuä̧wä̧ kuesetinä̧tu̧ku̧nä̧. 18Surojü 'chu̧ä̧ri̧nü̧ttü̧ rä'epü ikuinü̧ o̧'ko̧u̧mä̧, adiwomȩnä̧ jȩpü̧ kkä̧kuä̧wä̧nä̧ ku̧ja̧kuä̧tu̧kua̧ pä'ü dodepinä̧tü̧jä̧. 19Kuidepä jäwänä̧ kua̧mi̧ 'kuäkuätukuomȩttü̧, pi̧jä̧ ttü̧ja̧ ttukuokunä̧ chukuokuäu̧jä̧; ä'kojimä̧ iyäkuäwinä̧tü̧jä̧ surojü jȩä̧kuä̧wä̧tä̧ jȩpü̧ kkä̧nü̧ ja̧'wa̧nü̧ ji̧nü̧ jueimä̧, jitämä̧ Dio-rü ukuotäkuäwänä̧tä̧ iyäkuäwätukui.
20Ji̧yȩnü̧ surojü umüwäyotü kuinä̧tu̧ku̧mä̧, Dio jäwä adiwäjuei ku̧ja̧kuä̧tu̧kua̧ pä'ümä̧ jui'inä̧tü̧jä̧. 21Ja̧'wa̧nü̧ ji̧na̧'a̧mä̧ ¿Jua̧u̧ surojüttü̧mä̧ däje u̧wä̧ju̧tä̧, kuȩmi̧nä̧tu̧kuä̧ttü̧, jitä kudäpekuätukumä̧? Jua̧u̧mä̧ wa'arera̧'a̧tä̧ ȩpi̧nä̧u̧jä̧. 22Ja̧'wa̧nü̧ ji̧na̧'a̧nä̧, jitämä̧ surojüttü rä'epü ikuinü̧ o̧'ko̧u̧mä̧, Dio-ku dodepinä̧tü̧jä̧ umüwäyotü kuätukua pä'ü. Ja̧'wa̧nü̧ ja̧'a̧ jua̧u̧ u̧wä̧ju̧mä̧ surojü juiyünä̧ kkä̧nü̧, päjuriyänä̧mä̧, kkä̧kuä̧wä̧ i'ko ȩmä̧wä̧ ja̧'a̧. 23Isopäi'ünä̧ surojü ukuotäkuäwokümä̧ wa'arenä̧tä̧ mikuäwächa'a ja̧'wa̧nü̧ ja̧'a̧nä̧ tu̧ru̧wa̧ Jesucrito-nä̧ Dio-mä̧ kkä̧kuä̧wä̧ i'ko mippoünä̧ iyinäu̧jä̧.
© Sociedades Biblicas Unidas en Venezuela