Romanos 16
16
Awaruwärü teäwinü̧ wȩnȩ
1Ukuturu we'üsä tawaruwaju tüjäwaju Febe-rü; juäjumä̧ Cencrea ütawiyättü igresia-nä̧ diákunu̧ isaju#16.1 diákunu̧ isaju Kkoro wȩyu̧kuä̧nä̧mä̧ «umüwäyaju» pä'ü päwä. waju ja̧'a̧. 2Tu̧ru̧wa̧ i̧mi̧nä̧ adiu ppä'ädätukuiju, Crito-rü esetätü jȩä̧kuä̧mä̧ ja̧'wa̧ta̧nü̧ juäjurumä̧ rekuä rü̧jü̧'i̧nä̧ ppä'ädätukuiju; juäjumä̧ rekuätürü ppä'ädä'ijäju ja̧'wa̧ta̧nü̧ ttürü'i̧nä̧ ppä'ädä'ijäju ja̧'a̧.
3Priscirarü'i̧nä̧, Aquira-rü'i̧nä̧, te'äwiyätukuittü Crito weäwä chaditomȩnä̧ ppä'ädärä̧'i̧jä̧tü̧rü̧. 4Ttü jäwänä̧ ra̧wä̧pi̧ja̧'a̧nä̧'i̧nä̧ tta̧'kua̧rü̧ iyäwinä̧tü̧rü̧ eseu kkä̧nü̧, judío pokotü igresia isotü o'katoi'ünä̧rü̧ eseusä. 5Ja̧'wa̧ta̧nü̧ te'äwiyätukuittü kuojusodettü igresia isotürü. Te'äwiyätukuittü cha̧wa̧ru̧wa̧ repedäku Epéneto-rü, Acaya-ttü ä̧kuo̧mȩnä̧ Crito-rü esetinü̧rü̧. 6Ja̧'wa̧ta̧nü̧ te'äwiyätukuittü María-rü, ukuturu ppä̧'ä̧dä̧rü̧ aditä'ijäjuru. 7Te'äwiyätukuittü chukuojattü chawaruwärü Andrónico-rü'i̧nä̧, Junia-rü̧'i̧nä̧, juätümä̧ ttütäku kärenä̧ pȩji̧nä̧tü̧rü̧. Juätü apótore-mä̧ jo̧mȩnü̧ ttu̧wo̧juä̧u̧, ttü chesetäkua'a ä'kanä̧ Crito-rü esetinä̧tü̧.
8Te'äwiyätukuittü Ampriato-rü'i̧nä̧, Crito-nä̧ rü̧ȩnä̧ repedäkuru. 9Te'äwiyätukuittü Urbano-rü̧, Crito weinü̧nä̧ taditomȩnä̧ ppä'ädä̧rä̧'i̧jü̧rü̧ ja̧'wa̧ta̧nü̧ repedäku Estaqui-rü'i̧nä̧. 10Te'äwiyätukuittü Apeles-rü, Crito jäwänä̧ jo̧mȩnü̧ juo'ächinü̧rü̧; ja̧'wa̧ta̧nü̧ Aritóbulo-rü'i̧nä̧, awaruwäku o'katoi'ünä̧rü̧. 11Ja̧'wa̧ta̧nü̧ chukuojattü cha̧wa̧ru̧wa̧ Herodión-rü̧'i̧nä̧ te'äwiyätukuittü. Ja̧'wa̧ta̧nü̧ Narciso awaruwärü te'äwiyätukuittü, täkü Tu̧ru̧wa̧ Crito-nä̧ wotürü. 12Trifena-rü̧'i̧nä̧, Trifosa-rü'i̧nä̧ tu̧ru̧wa̧ weäwä aditä'ijätürü te'äwiyätukuittü; tawaruwaju tüjäwaju Pésida-rü'i̧nä̧, Tu̧ru̧wa̧ aditäwä rü̧ä̧nä̧ aditä'ijürü'i̧nä̧, jü̧nä̧. 13Ja̧'wa̧ta̧nü̧ Rufo-rü'i̧nä̧, Tu̧ru̧wa̧ ȩmi̧nä̧ku̧ru̧ te'äwiyätukuittü ja̧'wa̧ta̧nü̧ jua̧u̧ ja̧ju̧ru̧'i̧nä̧, ttü'i̧nä̧ cha̧ju̧ wajuru. 14Ja̧'wa̧ta̧nü̧ te'äwiyätukuittü Asíncrito-rü'i̧nä̧, Frego̧te-rü'i̧nä̧, Herme-rü'i̧nä̧, Patroba-rü'i̧nä̧, Hema-rü'i̧nä̧ ja̧'wa̧ta̧nü̧ tawaruwä ti̧jä̧wa̧tü̧ juätütäku kka̧kuä̧tü̧rü̧'i̧nä̧, jü̧nä̧. 15Ja̧'wa̧ta̧nü̧ te'äwiyätukuittü Firórogo-rü'i̧nä̧, Juria-rü'i̧nä̧, Nȩrȩu̧-rü̧'i̧nä̧ ja̧'wa̧ta̧nü̧ üjäwajurü'i̧nä̧, Orimpas-rü'i̧nä̧ ja̧'wa̧ta̧nü̧ o'katoi'ünä̧ tawaruwä ti̧jä̧wa̧tü̧ juätütäku kka̧kuä̧tü̧rü̧mä̧ o'katoi'ünä̧rü̧.
16Te'äwiyätukuittü yotukunä̧rü̧, ttu̧mü̧ 'chu'ädäkuäu. O'katoi'ünä̧ Crito iäre igresia isotümä̧ tettäwä̧u̧jä̧.
17Ja̧'wa̧ta̧nü̧ chawaruwä chü̧jä̧wa̧tü̧ ukuturu jä'epüsä, ttu̧'ȩpä̧rü̧nü̧ ku̧ja̧kuä̧tu̧kua̧ pä'ü ttü̧ja̧ ttiperekuächünä̧ jȩpä̧tü̧rü̧ ja̧'wa̧ta̧nü̧ kkä̧kuä̧wä̧ ku̧wo̧jui̧'i̧nä̧tu̧ku̧ to'ija̧'a̧ku̧ wo̧juȩtä̧tü̧rü̧. Juätüttümä̧ 'kȩkui̧pä̧chä̧tu̧kua̧ pädäu̧jä̧. 18Juätümä̧ Tu̧ru̧wa̧ Jesucrito-rü ukuotümä̧ jȩpo̧ko̧tü̧, pärokua'aku tta̧mü̧nä̧ jäwätä usú, tti̧wȩnȩmä̧ adiu ukuokuätü, tteseunä̧ jȩpü̧ jerupätürü yaparewätü, ttesetünä̧. 19Isopäi'ünä̧ o'katoi'ünä̧tä̧ wo̧juä̧tü̧ Dio-rü kukuotätukumä̧. Ja̧'wa̧nü̧ ja̧'a̧ttü̧ ukuturu eseusä, ku̧wo̧juä̧tu̧ku̧mä̧ adiutä jȩpä̧tu̧kui̧ pä'ü, surojümä̧ jȩ'kuä̧tu̧kuä̧ pä'ü. 20Ja̧'wa̧nü̧ jȩ'kuä̧tu̧kuo̧mȩnä̧ Dio eseäkuäwä iyümä̧, ku̧jä̧pi̧yä̧tu̧ku̧nä̧ kkȩdü̧ kuikuätukunä̧ jȩä̧kua̧ Satanás-rü̧. Tu̧ru̧wa̧ Jesucrito ukuturu ppädinünä̧ kka̧kuä̧tu̧kui̧.
21Chuku chaditäku Timoteo'i̧nä̧ teäwä̧u̧jä̧, Ruciu'i̧nä̧, Jaso̧'i̧nä̧ ja̧'wa̧ta̧nü̧ chukuojattü cha̧wa̧ru̧wa̧ Sosípatro'i̧nä̧, jü̧nä̧.
22Ttü Tecio'i̧nä̧, pi̧yȩ kuyäru wȩyu̧tä̧ji̧'ka̧, Chu̧ru̧wa̧ i̧mi̧nä̧ tedäwä̧u̧jä̧.
23Ja̧'wa̧ta̧nü̧ teäwä̧u̧jä̧ Gayo'i̧nä̧, ojusodenä̧ chü̧ji̧yä̧ku̧ ja̧'wa̧ta̧nü̧ Dio-rü esetätürümä̧ iweye ppä'ädü ja̧'a̧. Ja̧'wa̧ta̧nü̧ Erasto, ütawiyä ttü̧ja̧ ttiäre pärätä tta̧wä̧rä̧kuä̧wä̧ i̧sa̧'i̧nä̧ ja̧'wa̧ta̧nü̧ ti̧jä̧wa̧ Cuarto'i̧nä̧ teäwä̧u̧jä̧.
[24Tu̧ru̧wa̧ Jesucrito re ü̧jü̧mä̧ ukutu o'katoi'ünä̧ kka̧ pä'üsä. A̧mȩ.]
Dio-rü rüjí ukuokuinü̧
25¡Dio-rü teseäkuäwätukua! jua̧u̧tä̧ ja̧'a̧ yaboku kui'chä̧tu̧ku̧nä̧ ppä'ädümä̧ jareü wȩnȩ jidäu ja̧'wa̧nü̧ pä'a ja̧'wa̧ta̧nü̧ Jesucrito'i̧nä̧ ja̧'wa̧nü̧tä̧ wo̧juȩti̧nü̧. Ja̧'wa̧nü̧tä̧ ja̧'a̧ Dio ttieruwuönä̧ amükuädinü̧mä̧, mo̧ täbokü pi̧jä̧ kkä̧kua̧'a̧ a'kojitä päi'ünä̧ wo̧jui̧'ä̧kuä̧wo̧kü̧ ji̧nü̧. 26Ja̧'wa̧nü̧ ji̧na̧'a̧nä̧, jitämä̧ i̧jȩkuä̧chi̧na̧'a̧ profeta winä̧tü̧ tti̧wȩyu̧ti̧nü̧nä̧'i̧nä̧, Dio 'kuäopünä̧tä̧ kkü̧ weinüta'anü̧, i̧jȩkuä̧chi̧nü̧ pi̧jä̧ ttü̧ja̧ o'katoi'ünä̧rü̧, tta̧'kua̧ wȩnä̧rä̧kuä̧wä̧ ttukuota pä'ü.
27Ja̧'wa̧nü̧ ji̧na̧'a̧mä̧ ¡Ya̧tȩtä̧ tü̧ä̧nä̧wa̧ Dio wo̧jua̧rü̧ eseäkuäwätä ja̧'a̧, Tu̧ru̧wa̧ Jesucrito-nä̧tä̧ mo̧ro̧ kki̧ä̧mü̧nä̧! A̧mȩ.
© Sociedades Biblicas Unidas en Venezuela