Romanos 13
13
1O'katoi'ünä̧ ruwo we'ätürü ukuotätukui; isopäi'ünä̧ o'kajuiyünä̧ ruwo jäwämä̧ Dio jäwätä ja̧'a̧ttü̧ ja̧'wa̧nü̧ ja̧'a̧ttü̧ ruwonä̧ pȩjä̧tü̧mä̧, Dio u̧ju̧ni̧na̧'a̧tä̧ pȩjä̧tü̧. 2Ja̧'wa̧nü̧ ja̧'a̧ttü̧ juätürü to'ija̧'a̧ku̧ jȩpü̧mä̧ Dio weinü̧ to'ija̧'a̧ku̧ jȩpü̧. Ja̧'wa̧ta̧nü̧ to'ija̧'a̧ku̧ jȩpä̧tü̧rü̧mä̧ ro̧ȩkuä̧kua̧'a̧; 3isopäi'ünä̧ ruwo we'ätümä̧ adiu jȩpä̧tü̧rü̧ yettepä'cha pä'ümä̧ pȩjo̧ko̧tü̧, pärokua'aku suronä̧ jȩpä̧tü̧rü̧ to̧ttä̧ra̧ pä'ü wotü. ¿Ruwo we'ätürü yekuekuoka'a ku̧ja̧ pä'üjä̧? adiutä jȩpü̧ kkä̧wi̧ ja̧'wa̧nü̧ jo̧mȩnä̧ ruwotümä̧ ttȩsȩwä̧kua̧jä̧, 4jua'amä̧ Dio u̧mü̧wä̧ya̧ ja̧'a̧ttü̧, uku adiu ku̧ja̧ pä'ü. Ja̧'wa̧nü̧ ja̧'a̧nä̧ suronä̧ jȩ'ku̧ttü̧mä̧, iweye ye'ekua̧jä̧; isopäi'ünä̧ ruwo we'ätümä̧ ttukurodämä̧ ji̧ya̧kuä̧ra̧'a̧mä̧ kue'ädokotü, jua'amä̧ Dio aditäwä ttadita'attü̧, jitü suronä̧ jȩpä̧tü̧rü̧ ro̧'ȩpä̧tü̧. 5Ja̧'wa̧nü̧ ja̧'a̧ttü̧, ruwo we'ätürümä̧ tukuota pä'ü ja̧'a̧, suro ro̧ttȩpü̧ ye'ekutämä̧kü̧, isopäi'ünä̧ jueü ja̧'a̧ pä'ü amükuädü. 6Ja̧'wa̧nü̧ jo̧mȩttü̧, ukutu'i̧nä̧ impuesto#13.6 Impuesto/Tributo pä'ü o'inä̧tü̧, ruwo we'ätürü pärätä iyäwä. Jua̧u̧nä̧tä̧ ruwo ttadita pä'ü (Mt 7.25; Luk 5.27). pättü, pärätä mitätü̧jä̧; jua'amä̧ Dio umüwäyotü jü̧nä̧ ttadita'attü̧.
7Yotukunä̧rü̧ kuiyätukua pä'ü jü̧ iyätukui: Tributo pättü kuiyätukua pä'ü jü̧ttü̧mä̧ iyätukui; impuesto pättü kuiyätukua pä'ü jü̧ttü̧mä̧, iyätukui; Kukuotätukua pä'ü jü̧ttü̧mä̧, ukuotätukui; eseu kukuotätukua pä'ü jü̧ttü̧mä̧, eseu ukuotätukuirü.
8Ya̧tȩrü̧'i̧nä̧ kuimippotätukuoka'a, kkorotüku eseu repe'äkuäwätukui; isopäi'ünä̧ a̧wa̧ru̧wa̧ ü̧jä̧wa̧rü̧ eseu repe'ümä̧ o'kajuiyünä̧ weäwä wȩnȩ weümä̧ jȩpü̧. 9Weäwä wȩnȩmä̧ pä'a: «Kuirekua pokojukumä̧ jȩ'kuä̧'chä̧, kuä'ü kuikuä, ku̧nä̧u̧kuä̧rä̧, yapareumä̧ jikuäwä'chä, kkorotü ttu̧ju̧nä̧rü̧ adiumä̧ kkü'künä̧mä̧ to'kuä»; ja̧'wa̧nü̧ ja̧'a̧ weäwä wȩnȩmä̧ pi̧yȩnä̧tä̧ ka̧ka̧kuä̧cha̧'a̧: «Kua̧wa̧ru̧wa̧rü̧mä̧ repe'i, ukutä kua̧mü̧nä̧ repekuäkuäuta'anü̧.» 10Ttawaruwärü eseu repeäkuäwämä̧, surojuoepokü; ja̧'wa̧nü̧ ja̧'a̧ttü̧ weäwä wȩnȩmä̧ ka̧ka̧kuä̧cha̧'a̧ repe'ü eseäkuäwänä̧tä̧.
11Ja̧'wa̧nü̧ ja̧'a̧, jitä pi̧yȩ mo̧ro̧ totomȩnä̧, tü'orächa pä'ü rekuä rü̧ja̧'a̧. Mo̧ ji̧no̧mȩttü̧'i̧nä̧ abonä̧nü̧, täkü tü'kü ja̧'a̧ surojüttü ttü̧ji̧pä̧kuȩ mo̧ro̧mä̧, ji̧nä̧ku̧ pätina̧'a̧mä̧. 12Täkü yodomä̧ 'kuao'a'a, mo̧ro̧ juoa pä'ütä; ja̧'wa̧nü̧ ja̧'a̧ttü̧ täkü yo̧ü̧ jäwämä̧ kätädi'ätukua, tȩya̧u̧ jäwätä tü̧'ka̧tä̧wi̧'ä̧tu̧kua̧. 13Mo̧ro̧ kuettächa'a jä̧'i̧nü̧'a̧nü̧ kuetächätukua, adiwomȩnä̧tä̧ amükuädü. Tu̧kuȩ rü̧ȩnä̧ abo 'kuäo'ünä̧ kuä̧nü̧, tä̧'ä̧mä̧'chü̧mä̧kü̧, nä̧tü̧rü̧ jȩpä̧'chü̧mä̧kü̧, rowäkuäumä̧kü̧, kka̧ra̧ u̧ju̧nä̧rü̧ mȩ'o̧pä̧rü̧mä̧kü̧. 14Pärokuänä̧ Tu̧ru̧wa̧ Jesucrito jäwänä̧ 'ka̧tä̧dä̧kuäwi̧'ä̧tu̧kui̧, kuidepä kkü'kekunä̧mä̧ kuiyäwätukuoka'a.
© Sociedades Biblicas Unidas en Venezuela