Romanos 1
1
Pauru teäwinü̧ wȩnȩ
1Ttü Pauru-mä̧, Jesucrito u̧mü̧wä̧ya̧ jü̧nä̧, apóto cha pä'ü, jareü wȩnȩ Dio jäwä ujuturu iyinü̧ jidäwiyarü pä'ü woinä̧ku̧sä̧.
2Jua̧u̧mä̧ ä'kojitä päi'ünä̧ umüwäyotü profeta-nä̧, wȩyu̧kuä̧ wȩnȩnä̧ Dio-mä̧ weäkua'a ukuokuinü̧. 3Jua̧u̧ wȩä̧kua̧mä̧ I̧tti̧, Tu̧ru̧wa̧ Jesucrito ji̧na̧'a̧, ü̧tä̧mü̧ttü̧mä̧ Dawi isotü i̧sa̧ pinü̧, 4Jua̧u̧mä̧ Dio ujurunä̧, Epíritu Surojü jui̧'a̧ a̧'kua̧ iweyenä̧, Dio I̧tti̧ jü̧nä̧ i̧jȩpi̧nä̧ku̧ wa'arettü ttoächomȩnä̧.
5Ja̧'wa̧nü̧ ja̧'a̧ttü̧, jua̧u̧ Jesucrito-nä̧ re ü̧ja̧'a̧ttü̧ apótore päi'ünä̧ jȩi̧nä̧u̧jä̧; Jua̧u̧ru̧ esetü o'katoi'ünä̧ tta̧'kua̧ wȩnä̧rü̧ ttü̧ja̧ pä'ü. 6Ukutu Roma-nä̧ kka̧kuä̧tü̧'i̧nä̧ ja̧'wa̧nü̧tä̧ wotüjä̧, Jesucrito ȩmi̧nä̧u̧ kuätükua'attü. 7Ukutu Roma-nä̧ kka̧kuä̧tü̧ o'katoi'ünä̧, Dio surojü juiyünä̧ ku̧jä̧tu̧kua̧ pä'ü pojopü ȩmi̧nä̧u̧ru̧ pä'üsä: Jä'o Dio ja̧'wa̧ta̧nü̧ Tu̧ru̧wa̧ Jesucrito iyü adiwä juei wȩnȩ juiyü kkä̧tu̧kua̧ku̧ pä'üsä.
Pauru esewinü̧ wȩnȩ
8Ä̧kuo̧mȩnä̧mä̧, Tu̧ru̧wa̧ Jesucrito-nä̧, Chä'o Dio-rü eseusä. Ukutu kuesetätuku wȩnȩ o'kajuiyünä̧ ütawiyä pünä̧ ukuowa'a ä̧ju̧ku̧. 9Dio-tä ja̧'a̧ wo̧jua̧mä̧ cha̧'kua̧rü̧ eseunä̧ chadita'amä̧; Churutä Dio-rü chukuokuta'anü̧, 'kuäopünä̧ ukutu kutü'kütuku 'kuäopünä̧ chukuokua'amä̧. 10'Kuäopünä̧tä̧ jä'epüsä Dio-rümä̧, Churutä pä̧wä̧rü̧jo̧mȩnä̧ jü̧ttü̧mä̧, jua'a ukuturu do'ächü ichü adiunä̧tä̧ 'kuädopa pä'ü, 11Isopäi'ünä̧ ukuturu tochächa pä'üsä, Epíritu jäwä, iyinü̧ jidäwätukuaku pä'ü, yaboku 'kiyünä̧ ku̧jä̧kuä̧tu̧kuä̧kua̧'a̧nü̧; 12jua̧u̧ pädümä̧ ppä'ädäkuäu eseäkuäu tujuru tȩma̧ pä'üsä, ta̧'kua̧ tu̧wȩnä̧rü̧nä̧, ukutu'i̧nä̧ ttü'i̧nä̧ ji̧nä̧ ji̧yȩtȩ jäwä ja̧'a̧ttü̧.
13Ja̧'wa̧nü̧ ja̧'a̧nä̧ chawaruwä chü̧jä̧wa̧tü̧ ku̧wo̧juä̧tu̧kua̧ pä'üsä, do'ächü chicha pä'ü jȩcha̧'a̧nä̧, do'ächü chichü juiyünä̧ weyekuä'ijüsä. Ji̧nä̧somä̧ kkorotü judío pokotürü jä̧'i̧jü̧ta̧'a̧nü̧ ukutunä̧'i̧nä̧ u̧wä̧ju̧ chu̧ju̧nä̧ra̧ pä'ü. 14Grecia ttü̧ja̧rü̧'i̧nä̧ ja̧'wa̧ta̧nü̧ Grecia ttü̧ja̧ wokotürü'i̧nä̧ ja̧'wa̧ta̧nü̧ wo̧juä̧tü̧rü̧'i̧nä̧, jerupätürü'i̧nä̧ pi̧yȩmä̧ mi̧ppotüsä; 15Ja̧'wa̧nü̧ ja̧'a̧ttü̧, ttütämä̧ jitätä ja̧'a̧ chicha pä̧wä̧rü̧jä̧ku̧sä̧ Roma-ra̧'a̧ ukuturu jareü wȩnȩ jidäwa pä'ü.
Jareü wȩnȩmä̧, Dio ujuru ja̧'a̧
16Isopäi'ünä̧ jareü wȩnȩ ji'äumä̧ dä'ä ttu'oküsä, jua̧u̧mä̧ surojüttü kki̧'ä̧kuä̧wä̧ Dio ujuru ja̧'a̧ttü̧ esetätürümä̧, ä̧kuo̧mȩnä̧mä̧ judío-rü'i̧nä̧, judío pokotürü'i̧nä̧, jü̧nä̧. 17Isopäi'ünä̧ jareü wȩnȩmä̧, Dio ujuturu adiwomȩnä̧ jȩü̧mä̧ i̧jȩkuä̧cha̧'a̧; tta̧'kua̧ ttu̧wȩnä̧ro̧mȩttü̧ kkä̧mä̧dü̧, yaboku tta̧'kua̧ ttu̧wȩnä̧rü̧nä̧, wȩyu̧kuä̧ wȩnȩmä̧ pa̧'a̧nü̧ pä'attü̧: «adiwä juei jȩpü̧ kkü̧mä̧ a̧'kua̧ wȩnä̧rü̧tä̧ ü̧jä̧kua̧.»
18Ja̧'wa̧nü̧ ja̧'a̧nä̧ Dio üjü'kokümä̧ mo̧ro̧jä̧ra̧'a̧ttü̧ kkä̧mä̧dü̧ i̧jȩkuä̧cha̧'a̧ o'katoi'ünä̧ ttü̧ja̧ suronä̧ jȩpä̧tü̧rü̧, suronä̧ jȩpü̧ jueü wȩnȩ surojuo'epätürümä̧. 19Dio-rü ttu̧wo̧jua̧ pä'ü rekuä rü̧jü̧mä̧, täkü juätürümä̧ i̧jȩkuä̧chi̧na̧'a̧, jua'amä̧ chutä Dio i̧jȩpi̧na̧'a̧ttü̧. 20Isopäi'ünä̧ Dio jäwä tottü juiyünä̧ ji̧nü̧mä̧, mo̧ro̧ kki̧ä̧mü̧nä̧ ujuru'i̧nä̧ ja̧'wa̧ta̧nü̧ chutä jäwä Tü̧ä̧nä̧wa̧ jü̧nä̧ jü̧'i̧nä̧ ttu̧wo̧jui̧pü̧nä̧ i̧jȩkuä̧cha̧'a̧ pi̧jä̧ aditino̧mȩttü̧ kkä̧mä̧dü̧, jerupätüjä̧ pätta pä'ümä̧ juiya'a. 21Ja̧'wa̧nü̧ Dio-rümä̧ ttu̧wo̧jui̧na̧'a̧nä̧, Dio-rü ttü̧ä̧nä̧wa̧ jü̧nä̧ tteseäkuäwoka'a, ye adiwa'a pä'ü'i̧nä̧ pä'ü jui'ü, jitütä ttamu̧kuäda'akutä surojuottächa'attü, adiu tta̧mü̧kuädokomȩnä̧ tta̧mi̧so'ki yo̧ä̧chi̧nä̧u̧. 22Adiu wo̧juä̧tü̧jä̧ pätta'anä̧, amükuädokotü 'kua̧rü̧nä̧ juo'ächinä̧tü̧; 23Ja̧'wa̧ta̧nü̧ Dio ukuo jäwä beipokümä̧ pärotü ikuinä̧tü̧, ttü̧ja̧ be'ipächätü tta̧'kua̧juä̧nä̧tä̧, ppi̧yu̧nä̧tä̧, de'iyü kue'ächätünä̧tä̧, ä̧ka̧tü̧nä̧tä̧, jü̧nä̧.
24Ja̧'wa̧nü̧ jȩtto̧mȩnä̧ Dio-mä̧ tta̧mi̧so'ki pä̧wä̧rü̧jü̧ surojünä̧ ttü̧jü̧nä̧tä̧ iyipinä̧u̧ ja̧'wa̧nü̧ jo̧mȩnä̧ dä'ärü̧jü̧nä̧ tta̧mü̧nä̧ pa̧ja̧tü̧ ttidepä ttiyäkuäunä̧tä̧. 25Dio jäwä Isopäi'ünä̧ wȩnȩmä̧ yapare wȩnȩnä̧ pärotü iku, Chutä aditinü̧rü̧mä̧ tteseäkuäwoka'anä̧, aditäwätä eseäkuäwinä̧tü̧, Jua̧u̧tä̧ ja̧'a̧nä̧ mo̧ro̧ kki̧ä̧mü̧nä̧ eseäkuäwa̧mä̧. Amȩ́
26Ja̧'wa̧nü̧ ja̧'a̧ttü̧ Dio-mä̧ dä'ärü̧jü̧ jäwänä̧ jȩpü̧ ttü̧jü̧nä̧ iyipinä̧u̧. Tti̧rȩkuo̧mü̧rü̧'i̧nä̧ pärowächinä̧tü̧ pi̧jä̧ttü̧ jȩä̧kuä̧wo̧kü̧nä̧, nä̧tü̧ku̧tä̧ jȩttä̧kuä̧u̧nä̧; 27ja̧'wa̧ta̧nü̧ u̧mä̧tü̧'i̧nä̧ ttirekua̧mü̧ku̧mä̧ jȩttä̧kuä̧wo̧ka̧'a̧, kkorotü u̧mä̧tu̧ku̧tä̧ jȩttä̧kuä̧u̧nä̧, dä'ärü̧jü̧ jȩpä̧'chä̧kuä̧u̧, ro̧ȩkuä̧nä̧tä̧ surojü jȩttü̧mä̧ usurä ttȩmä̧wa̧ pä'ü.
28Dio-rümä̧ ttu̧wo̧jua̧rü̧ pättokoku, surojü tta̧mü̧kuäda'aku jȩpü̧ ttü̧jü̧nä̧tä̧ iyipinä̧u̧, jȩä̧kuä̧wo̧kü̧nä̧ jȩpü̧ ttü̧jü̧nä̧tä̧. 29Ja̧'wa̧nü̧ jo̧mȩnä̧ surojü o'kajuiyütä jȩpä̧tü̧, tti̧rȩkua̧mü̧ pokotüku ä'ä'chäkuäwätä, surojuoächäkuäwätä, kkorojuei kkü'käwätä, surojü jȩä̧kuä̧wä̧tä̧; ttawaruwärü kkü'käwokütä, kuäwätä, rowäkuäwätä, yapare wȩnȩtä̧, ma̧ttä̧chü̧nä̧ tto̧ȩpä̧rä̧kuä̧wä̧tä̧. 30Suronä̧tä̧ wiräwätü, Dio'i̧nä̧ aboiyotütä wotü, ukuotokotü, pä̧i̧kuä̧tü̧, ukuo te'äkuäwätü, kkorotürü ttüjü'koka'a topätü, surojütä amükuädätü, ttä'otü̧rü̧'i̧nä̧ ukuotokotü, 31wo̧jui̧'ü̧'i̧nä̧ wo̧jui̧'o̧ko̧tü̧, tta̧'kua̧ ttu̧wȩnä̧rü̧ juiyü'anü̧ wotü, re kkä̧kuä̧wä̧'i̧nä̧ jui'ätü. 32Dio, ja̧'wa̧nü̧ jȩpä̧tü̧mä̧ wa'ü ttikuäkuotü päinü̧'i̧nä̧ wo̧juä̧tü̧, suro jitütämä̧ jȩpo̧ko̧tü̧, kkorotürü'i̧nä̧ jȩtti̧ya̧tü̧ pä'ü jȩpä̧tü̧.
© Sociedades Biblicas Unidas en Venezuela