1 Juan 1

I̧wȩnȩmä̧, tta̧'kua̧rü̧ wȩnȩ ja̧'a̧

1Ä̧kuo̧mȩnä̧tä̧ päi'ünä̧ kki̧nü̧, jua̧u̧nu̧tä̧ päi'ünä̧ ä̧ju̧kui̧nä̧tü̧jä̧, ti'ärenä̧'i̧nä̧ topinä̧tü̧jä̧, tu̧mü̧nä̧'i̧nä̧ mȩ'i̧nä̧tü̧jä̧, jua̧u̧ kkä̧kuä̧wä̧ wȩnȩ jitäumä̧, 2Jua̧u̧ kkä̧kuä̧wä̧ ji̧na̧'a̧ ujuturu i̧jȩkui̧nü̧mä̧. Jua̧u̧ topinü̧'kotü, ukuturu ji'äwätüjä̧, Jua̧u̧ kkä̧kuä̧wä̧ i'komä̧ Jä'oku kki̧na̧'a̧, ujuturu i̧jȩkuä̧chä̧kuȩmä̧ pä'ü. 3Jua̧u̧ totinü̧tä̧, tä̧ju̧kui̧nü̧tä̧tä̧, ji'äwätüjä̧, ukutu'i̧nä̧ ujutuku ji̧nä̧ ji̧yȩtȩnä̧ ku̧ja̧kuä̧tu̧kua̧ pä'ü. Jua̧u̧ ji̧nä̧ ji̧yȩtȩnä̧ ku̧jä̧kua̧tu̧kua̧ pädümä̧, Jä'okutä, I̧tti̧ Jesucrito-kutä ja̧'a̧. 4Pi̧yȩmä̧ ti̧wȩyu̧tä̧u̧jä̧, ujutu teseu jo̧mȩnü̧ ja̧ pä'ü.

Surojü jȩä̧chü̧ wȩnȩ

5Jua̧u̧ Jesucrito-ttü ä̧ju̧kui̧nü̧'kotü ukuturu jitäumä̧ pi̧yȩ ja̧'a̧: Dio-mä̧ tȩya̧u̧tä̧ wa̧ ja̧'a̧ttü̧ jua̧u̧nä̧mä̧, yorisotä yo̧ü̧mä̧ juiya'a, 6Jua̧u̧tä̧ku̧ ji̧nä̧ ji̧yȩtȩnä̧ kka̧kuä̧tü̧jä̧ päta'anä̧, yo̧ü̧nä̧ tü̧ja̧ku̧ttü̧mä̧, yaparewätüjä̧, jueü wȩnȩnä̧ tü̧ja̧kuo̧ka̧'a̧ttü̧. 7Ja̧'wa̧nü̧ ja̧'a̧nä̧, Dio tȩya̧u̧nä̧ ü̧jü̧ta̧'a̧nü̧, ujutu'i̧nä̧ tȩya̧u̧nä̧ kue'ächü, kkorotüku ji̧nä̧ ji̧yȩtȩnä̧ tü̧ja̧ku̧ttü̧mä̧, Tu̧ru̧wa̧ Jesucrito, Dio i̧tti̧ ukuojamä̧ tükü i̧kuä̧u̧jä̧.

8Isopäi'ünä̧, «Surojü jui'ätüjä̧ pätüttümä̧,» ta̧mü̧nä̧ pa̧ja̧tü̧ yapareäkuäwätüjä̧, ja̧'wa̧nü̧ jo̧mȩnä̧mä̧ jueü wȩnȩmä̧ juiya'a ujutunä̧mä̧. 9Isopäi'ünä̧ suronä̧ jȩta̧'a̧, iweye ja̧'wa̧nü̧tä̧ wa̧sä̧ pätäuttümä̧, Dio-mä̧ adiwä juei, ppä'ädü ja̧'a̧ttü̧, suronä̧ jȩtä̧'i̧jü̧mä̧ aditü i̧kuä̧u̧jä̧. 10Ja̧'wa̧nü̧ ja̧'a̧nä̧, «surojümä̧ jȩpo̧ko̧tü̧ pä'ijätüjä̧ pätüttümä̧» Dio-rümä̧ ya̧pa̧rȩwa̧tä̧ ü̧ji̧pü̧nä̧ pä'ätüjä̧. Chutä i̧wȩnȩ'i̧nä̧ juiya'a ujutunä̧mä̧.

Currently Selected:

1 Juan 1: PNT13

Highlight

Copy

Compare