Iironga 27
27
ONTOPORUA 27.
Paulus ta hi ko Roma
1Ano sho tsha popirue otshingongo nokutja Paulus na farue ku Italia, okua gandjua puamue naakuatua jakuauo kondjai hongundu homukuaniirua, edina rjaho Julius.
2Otua ronda etembameja rja zi ku Adrumet, tua shimbike okuenda, tu’uka kiirando jokomukunkuro gua Asia. Tua enda puamue nomumakedonia Aristarkus, a zire ku Tessaloniki.
3Esiku ndi rja randura ko otua ciki ku Sidon. Julius okua ri nombiri na Paulus, nde te mu pitikire okutarera po ookuume ke, jo je mu kuace.
4Sho tua zi ko, otu’ukirire ku Kipros, kombinga hokuumbangarantu, oshoka ombepo ha ri he tu denga motshipara.
5Sho tua konda efuta rjopopepi niirongo ja Kilikia na Pamfilia, otue ja nduno ku Listra tshomu Likia.
6Hu ondjai ha tsakaneka etembameja rja zi ku Aleksandria tari hi ku Italia. Ongashi e tu tura murjo.
7Omasiku ogendji tu’enda nokuisisida sigo otua tegamene na Kidnos, sho tua ri katu nombepo ombuanaua. Tua kunkura na Kreta popepi na Salmone.#27:7 Kreta, otshitengedera otshinene tshomefuta.
8Sho tua kunkura tu nuudigu, sse tua ada eshara hari tiua “omaturiro gopara”, popepi notshirando Talassa.
9Ndere ecimbo ere sho rja piti nokuri, nokuenda kuetembameja kua shimbike okumon’uudigu, ecimbo rjokuidirik’iikurja kua rja shura, Paulus okue ja kumagida.#27:9 Ecimbo ndika rjoku’idirik’iikurja orja ri paajuda momuedi September Mecimbo ndika okufu kua ri popepi. Eembepo odindji da tukuruka mecimbo ndika, da ninginica orundji omatembameja gomefuta.
10Nde ta ti ku jo: “Jarumentu ondi uete nokutja okuenda kuetu taku tameke okumon’uudigu notshiponga ha kofrasha ike no ketembameja, aaue, no keemuenjo detu uo.”
11Ndere ondjai oku’inekera omushingi na muene guetembameja, nde ta dini eehapu da Paulus.
12Eturiro ndika, sho ka rja ri ehanaua rjokukara mecimbo rjokufu, okonjara ajeshe ja arere okuza mo nokuerekera oku ha ku Foinike, eturiro rimue rjomu Kreta, rja tshiga kuuninginino no kuutshimbantu, oko ja kare mokufu.
13Ombepo hokuutshimbantu sho ha pepa naua, oja ri je tshi taa hada ko uo, oja shiri mo omakuatico getembameja popepi na Asson, nde taa hende popepi na Kreta.
14Ndere okuza po okacimbo okatshona, ombepo “Tifon” oh’ihundurire mo kotshitengedera, nokutja otshikunguru tsha zi kombinga homokati kuuziro nombangarantu.
15Etembameja ano, sho rja ri meenkondo dotshikunguru, shi tshe tu njenga, sse otue ri eca ouara meenkondo datsho, nde tua hi.
16Sho tua ukirire ruo kokatengedera Kauda, okua tua kanica konjara okatembameja ketu okatshona.#27:16 Okatembameja haka okatshona oka cindikira arushe etembameja enene. Ko ka kuaca pokuronda nenge pokurondoroka metembameja enene.
17Sho je ka shiri pombanda, ja koreka etembameja neengodi eenene. Otsho ja kurukica uo eesaila#27:17 Eesaila eenene kua da tsirikua kombanda hetembemeja. Etembameja okua hari endicua kombepo, nge tahi denge eesaila. Etembameja tari cikama ouara, nge kapu nombepo. sho j’ijageka nokutja taa farua mo Sirti#27:17 Sirti omashara gomefutu popepi nomukunkuro gua Afrika. Mo mu nomeja omatshona, ndere evi nenge omamanja omanene ge ri pombanda. Etembameja, nge tari farua pomashara ngaka gefuta, itari umbatua ue komeja otari tsuua neji komamanja, hari teka orundji, nenge hari gu ouara kombinga, nenge hari tindire ouara mehekevi rjokoshi homeja. no j’ihecera ouara meenkondo domakucikuci.
18Otshikunguru sho tshe tu denge keembinga neembinga, oj’ekerashi otshindji tshofrasha mesiku rja nofu.#27:18 Oje tshi ningi opo etembameja ri fugarere naua kombanda homeja.
19Esiku etitatu oj’ekerashi uo nomake gauo iinima jetembameja.
20Ndere etango inari oroka ue, eenjoci inadi monikua ue omasiku gamue, otshikunguru tsha geja inatshi rota, nena etegerero rjehupico rjetu orja fe rja kana.
21Sho ja ningi nokuri esiku inaa rja tsha, Paulus okua cikama mokati kauo a ti: “Jarumentu, ngeno okua mua uvandje, ne inamu za ku Kreta, ando inamu mon’uudigu notshiponga shi.
22Ndere nena andi mu pe omeere ngaka: ikorereni, kapu na nande ogumue mokati ketu ta ka kana, etembameja ike.
23Oshoka uusiku mbu omujengeli gua Karunga oku’ire kungaje ngu e nandje ngaje omukareri gue.
24Nde ta ti: “Ino tira Paulus, ngueje u nokucikama motshipara tshomukuaniirua. Tara Karunga okue ku pa ajeshe mba je ri nangueje metembameja.”#27:24 Karunga okua ara uo okuupica jakuauo morua Paulus.
25Ano jarumentu, ididimikeni, oshoka ond’iteera Karunga nokutja ota ningi atshishe, ngashi e tshi rombuerandje.
26Ndere sse otu nokuitsa otshitengedera tshimue tshomefuta.”
27Uusiku uutimurongo na une sho ue ja, sse otua teraganicua pokati kuusiku mefuta rja Adria, aantu jetembameja oja ri je tshi taa mono evi.
28Oj’umbu otsheera tshokuereka uure uefuta, jo ja nongere uure uefuta nokutja ou cike peendja eemrongo mbari. Sho ja engene ko katshona oj’umburura mo otsheera, no j’ereke eendja omurongo na ntano.
29Sho ja tira unene, etembameja tari tsuua komamanja gokoshi homeja, oja kurukica mo konima hetembame ja omakuatico gane, jo ja jeerukua okutsha kuongura.
30Ndere aantu jetembameja sho ja ara okuijaka mo metembameja, oja kurukica okatembameja okatshona mefuta nekoto, anuua, ja ara uo okukurukica omakuatico komesho getembameja.
31Nena Paulus okua rombuere ondjai naakuiita: “Mboka nge itaa kara mo metembameja, itamu vuru oku ka upicua.”
32Aakuiita oja keke po eengodi dokatembameja, nde jo taa ka hica ouara.
33Eruua sho rja tende, Paulus okua kumagida ajeshe, ja rje iikurja nde ta ti: “Omasiku omurongo na gane ga piti, hera tuu mua tegerera mu’idirika inamu rja tsha.
34Otsho ano ngaje andi mu kumagidire mu rje iikurja, opo mu kore, oshoka kapu na nande evudi rimue rjokeemtse deni tari ka kana.”
35Sho a popi doka okua kuca ombroto, a hamberera Karunga miipaci jajeshe, e hi pambura nokua shimbike okurja.
36Nena ajeshe oj’ekerericua no ja rja uo.
37Ss’atushe otua ri aantu omacere gaari neemrongo uunuari na kanekamue.
38Sho ja ri ja kuta, oja pupareke etembameja nokuumbira iirja mefuta.
39Nde sho kua tshi, inaa dimburura otshirongo shija, ndere oja mona otshikororo tshefuta tshi nomukunkuro guopara. Oko ja ara okuukica etembameja, nge taa vuru.
40Oja jeruca omakuatico, jo j’ihecera keenkondo domakucikuci. Oja ditura eemnja dotshipungurico tshetembameja. Nde sho ja shiri pombanda osaila hokomesho, ho hi kuatue kombepo, oj’ukirire ruo komukunkuro.
41Sho tua denge netembameja evi rjokoshi homeja, otshitoporua tshokomesho tshetembameja otsha patekere mo, inatshi injenga ue. Ontoporua hokonima hetembameja oha teka keenkondo domakucikuci.
42Nena aakuiita oja ara okudipaga aakuatua ajeshe, opo kapu kare mba taa tuurunga nokujoga.
43Ndere ondjai ndji kua ha ara okuupica Paulus, inahi tshi pitikira, aaue, oha rombuere aantu nokutja mbo je tshi kujoga naa nukire mo tango mefuta, j’ihupice nokuada kevi.
44Oonakukara po oja farua ko uo, jamue ja ronda kiiblanki, jamue ja ronda iipambu jetembameja. Ongashi ajeshejeshe ja ciki kevi.
Omission Heklesia Ekatolika, 1951. Namibian Catholic Bishops Conference.