Iironga 13
13
ONTOPORUA 13.
Okuha kuotango guomuapostoli Paulus a huvicire aantu eehapu da Karunga
1Meklesia rjomu Antiokia omua ri aaprofeti naahongi. Mokati kauo mua ri Barnabas, Simon, ngu kua a rukua Niger, Lutsius omukireni, Manahen, ngu a putudirue puamue na Herodes omureri guotshitine, na Saulus.
2Mboka manka ja karere Karunga muukarere uujapuki#13:2 Uukarere mbu uujapuki ouo emissa ejapuki. oj’idirike iikurja, nena Ombepo Ondjapuki ahi ti ku jo: “Joororeriindje Saulus na Barnabas, ja ka ronge otshironga, shi nde ja ogororera”.#13:2 Okutja otshironga tshehuvico rjeehapu da Karunga mokati kaapagani.
3Opo ja zi okuidirika#13:3 Oj’irongikidira arushe iironga iijapuki nokugarikana nokuidirika iikurja. iikurja nokugarikana, je ja tenteke omake#13:3 Paulus na Barnabas oja peua ejapurico rjuuepiskopi. nde jo je ja rareke.
4Mboka ng’aatumua j’Ombepo Ondjapuki oja hi ku Seleukia. Okuza hoka taa rondo okatembameja, ja hi ku Kipro.
5Sho ja ciki ku Salamis,#13:5 Salamis, otshirando otshinene motshitengedera Kipro. oj’uvica eehapu da Karunga meesinagoga daajuda. Johannes#13:5 Johannes nedina rjoponto Markus okua ri omudiakoni. Tara 6:9 okua ri uo pu jo, omukuaci guauo.
6Nde sho j’endagura otshitengedera atshishe sigo oku Pafus, oj’itsu omurumentu gumue, h’ompure, omuprofeti guiirombo, ngu a ri omujuda, edina rje Barjesu.
7Ngoka a ri perenga Sergius Paulus, omurumentu omunandunge. He t’icana Barnabas na Saulus ku he, a harere okuuva eehapu da Karunga.
8Ndere Elimas nokutja ompure, otsho edina rje rja fatururua, okua rudike na jo, nde ta kembadara okukerera erenga kehiteero.
9Ndere Saulus ngu a rukirue uo Paulus, oku’uda Ombepo Ondjapuki, te mu deng’omesho.
10He ta ti: “Mentu ngueje, u’uda iiherere nuumbudi aushe, ngueje omuna guomusatana, ngu omutondi gu’uujuki aushe, ito ka zimbuka okugojokica eendjira d’uka da Muene?”
11Nena, tara, eke rja Muene otari ku denge, oto ka tsika, ito ka mona ue etango omasiku gamue. “Naanzija okua siikirua keemrema eemcokocoko. T’endagura, ta kongo gumue ngu te mu kuata keke.”
12Erenga sho rja mona shoka tsha ningua po, orj’iteera rja rurirua kerongo rja Muene.
13Paulus naakuaci je oja ronda etembameja, ja zi ku Pafus, nde taa hi ku Perge mu Pamfilia. Ndere Johannes okua topoka na jo, nde ta tshuna ku Jerusalem.
14Okuza ku Perge oje ja ku Antiokia mu Pisidia.#13:14 Paulus na Barnabas oja zi ku Antiokia mu Siria. Taa hi mosinagoga mesiku rjesabati, nde ja kaatumba.
15Sho pua leshua eehapu domompango no domaaprofeti, aakuruntu josinagoga oja tumu ku jo, ja ti: “Jarumentu ne aamuameme, nge omu neehapu dokukumagida aantu, popjeni nduno.”
16Nena Paulus okua cikama, okue j’anda ja muene nde ta ti: “Jarumentu aaisraeli, nane uo jarue, mba mua tira Karunga, puakeneni!
17Karunga kotshiguana tsh’Israel oku’ogorora ootate, he ta tanica otshiguana ngija ja ri aakuiirongo motshirongo tsh’Egipti, nokue ja piica mo nokuoko kue kua tanganana.
18Erara ri cike peemvo eemrongo ine oku’ididimikire eemkaro dauo mombuga.
19Ta shanagura iiguana unuuari motshirongo tsha Kanaan. Otshirongo tshauo te tshi ja topororere, te j’umbire otshihogororico.#13:19 Josue, h’omuranduri gua Moses okua toporera ngaano otshirongo tsha Kanaan mokati komazimo gaaisraeli.
20Shoka tsha ningua eemvo di cike pomacere gane neemvo eemrongo ntano sho da pita. Okuza hoka te ja pe aapanguri sigo okomuprofeti Samuel.
21Nena oja arere omukuaniirua. Nde Karunga te ja pe Saul, omuna gua Kis, omurumentu guomezimo rja Benjamin. A pangera eemvo eemrongo ine.
22Sho e mu kuca po, okue ja ogororere David omukuaniirua ngu e mu okorora a ti: Onda dimburura David, omuna gua Isai, ng’omurumentu guokomuenjo guandje. Ohe ta ka guanica eharo rjandje arishe.
23Moruvaro rue omua zi omukuriri Jesus, ngashi Karunga e tshi rombuere Israel.
24Manka he in’oroka miipaci jaantu, Johannes oku’uvicire otshiguana atshishe tsh’Israel etshatsho rjehidirururo.
25Ndere sho a shurica eendjenda de okua ti: “Kandi shi ngoka tamu erekendje na he. Ndere tara, ote ja ta randurandje. Ngaje inandi opara ndi diture eengaku dokeempadi de.”
26Jarumentu! jamuameme, ne jaana jomoruvaro rua Ambraham, na ne jarue, mba mua tira Karunga, one mua tuminua ohapu hehupico ndika.#13:26 Eemvo doka oda jarurua okuza kehogororo rja Abraham.
27Aantu jomu Jerusalem naakuruntu jauo inaje mu dimburura. Ndere sho je mu pangura oja guanica eehapu di adi leshua keshe esabati.
28Nanto inaa mona mu he ondjo hokusa, oj’indira Pilatus, a dipague.
29Sho ja rongo atshishe sho tsha tshangerua, oje mu kuca komuti, jo taje mu rangeke mombira.
30Karunga okue mu jumuda kuusi esiku etitatu.
31Omasiku ogendji t’ihororere mboka ja zire puamue na he ku Galilea, ja hi ku Jerusalem. Nanena ojo mboka eentari jo aahokorori je mokati kotshiguana.
32Nasse otatu mu uvicire omarombuerero, nga ga gandjua kootate.
33Nga Karunga e tu guanicira ng’ojana, sho a jumuda Jesus, ngashi tsha tshangua uo mepsalmi etijari: ‘Ongueje omumuandje. Onena tuu ndjika onde ku vara.’#13:33 Jesus omukuriri, h’Omumua Karunga. Ano Jesus ita vuru okukarerera mombira.
34Ndere okue mu jumuda kuusi, opo ka tshune ue mehoro. Sho e tshi tja otshingaa: ‘Onda ara ndi mu pe omasiroshenda omajapuki garushe ga David.’#13:34 (Isaias 55:3)
35Ongashi ta popi uo peshara rirue: ‘Omujapuki guohe#13:35 Omujapuki ngu Jesus Kristus. ito mu monica ehoro.’
36Oshoka David, sho kua a karera eharo rja Karunga pecimbo rje, okua si. He ta gongerua pookuku, nokua mona ehoro.
37Ndere nguno okua jumudua kuusi ku Karunga, he ina mona ehoro.
38Ongashi ano jarumentu jamuameme, kareni mu tshi tshi naua, morua nguka otamu uvicirua edimopo rjeendjo no miinima ajishe mbi mua njengerue okuucua aajuki kompango ha Moses.#13:38 Eguanico rjompango ha Moses inari ja pa ekuriro.
39Omu he ta ningi omujuki keshe ngu a hiteera.#13:39 Jesus Kristus, ohiike okue tu etera uujuki uotshiri, nokutja, ekuriro.
40Ano nduno, kotokeni, kamu adikue ku mbjoka ja popiua meehapu daaprofeti:
41‘Tareni ne jadini, mu rurirue ne mu jonuke po, oshoka ngaje ote rongo otshironga momasiku geni, eno, otshironga nge tamu tshi okororerua, itamu tshi iteere’.”
42Ano, sho ja zi mo, oj’indirua okuuvica eehapu doka nomesabati rja nofu.
43Otshigongi tshomosinagoga, sho tsha rarekua, aajuda ojendji na mboka jarue, mba ja tira Karunga, oja randura Paulus na Barnabas. Mboka oje ja kumagida nokudiginina, ja kare moshenda ha Karunga.
44Ndere esabati ndijaka rja nofu, konjara otshirando atshishe omo kua tsha gongara okuuva eehapu da Karunga.
45Nena aajuda, sho ja mono eengundu daantu, oja kuatua kuukodi, ja patana Paulus sho a popi, jo taa tsheke.
46Opo ja zi Paulus na Barnabas okupopja nuufure: “Ne omua ri mu nokuuvicirua tangotango ohapu ha Karunga. Ndere nena, sho mue hi kandura po, ne jene mu’itara kutja inamu oparera omuenjo guarushe. Tareni ano, ss’otatu pungurukire kaapagani.
47Oshoka otsho ngii Muene e tu rombuera: Onde ku tura po uujerere uaapagani, u ninge ehupico sigo okongamba hevi.”#13:47 (Isaias 49:6)
48Aapagani, sho je tsh’uvu, oja njanjukua, jo ja simaneka ohapu ha Muene. Najeshe mba j’ucirua omuenjo guarushe, oj’iteera.#13:48 Ajeshe mba j’iteera Jesus Kristus neharo rjauo arishe, ojo j’ucirua ku Karunga okumona omuenjo guarushe.
49Nohapu ha Karunga oha taandera motshirongo shika atshishe.
50Ndere aajuda oja tsitsimika aakiintu aanamadina noonakutirakarunga, naakuruntu jotshirando. Oja tukurire Paulus na Barnabas etidaguro, noku ja tida mo motshirongo tshauo.
51Jo oje ja pupurire ontsi hokeempadi dauo, nde taa hi ku Ikonium.
52Ndere aarongua oja ri j’uda enjanju n’Ombepo Ondjapuki.
Omission Heklesia Ekatolika, 1951. Namibian Catholic Bishops Conference.