प्रेरित 21
21
पावल यरुसलेमै जाइल
1एफिसस मन्डलिक् एल्डरलकक्सङ्हिं बिदा भेनेसौ हामि पानिजाहाज चर्हिबानाइ सोझोय कोस बाज्ल टप्पुइ आइपुग्लुहुँक्, आउँ ओर्को दिनइ रोडस बाज्ल टप्पुइ आइपुग्लुहुँक्। तसौ ओछिसौ पटारा सहरै पुग्लुहुँक्। 2ओछि हामि फोनिके इलाकासम्म जाइलाहार एक्टा पानिजाहाज भेंटालुहुँक्, आउँ हामि उहे जाहाजै चर्हिबानाइ जाइलुहुँक्। 3जाइटे-जाइटे साइप्रस देखा पोर्लोकुन्, तसौ हामि उ टप्पुक् दखिनक्भटे भेइबानाइ सिरिया इलाकाक्पटि जाइलुहुँक्। टुरोस सहरै सेहे मालसामान झार्बाक्नि पानिजाहाज रोक्लोकुन्। उहेसैर्हे हामि आको ओच्छिहि नाभ्लुहुँक्। 4तसौ ओछि रैल्ह चेलालकलाइ भेंटाबा जाइलुहुँक्, आउँ हामि एक सातासम्म उहेखर्ह्वाक् सङ्हिं बस्लुहुँक्। पबित्र आत्माक्भटे अगुवाइ पाइबानाइ उखर्ह्वाइ पावललाइ यरुसलेमै बुन् जा बाजिहिन् घरि-घरि बिम्ति कर्लुहुन्। 5भेटौसुधा हामि एक साता जट्का बस्नेसौ हामि ओछिसौ बिदा भेहिन् हिंठ्लुहुँक्। ओछि रैल्ह पर्भुक्लाइ बिस्वास कर्लाहार दाजु-भाइ, दिदि-बैन्हि आउँ केराकुटिलकौसुधा उखर्ह्वा जम्माहिं हाम्रालाइ सहरक् बाहारसम्म पुर्याबा आइलुहुन्। आउँ हामि जम्माहिं समुन्रक् छेंओइ ठेउन्हाँ टेकिहिन् पाराथ्ना कर्लुहुँक्। 6ओक्राक्पाछु हामि बिदाबारि लेहिन् पानिजाहाजै चर्ल्हुहुँक् आउँ उखर्ह्वासेहे आफ्निक् घरक्पटि फर्कलुहुन्।
7हामि टुरोस सहरक्भटे टोलेमाइस बाज्ल सहरै पुग्नेसौ पानिजाहाजक्भटे नाभ्लुहुँक्। ओछि बिस्वासि दाजु-भाइलकलाइ भेंटघाट कर्लुहुँक्, आउँ उहेखर्ह्वाक्सङ्हिं एक्दिन बस्लुहुँक्। 8ओर्को दिनै हामि ओछिसौ बिदा लेइबानाइ कैसरिया सहरै पुग्लुहुँक्। ओछि हामि खुसिक् खभर सुनालाहार फिलिपक् घरै बस्लुहुँक्। उसेहे यरुसलेमै सेवा कर्बाक्नि छान्ल सात जेनाक्मध्ये एकजेना रैल्हक्।#प्रेरित ६:५; ८:५ 9ओक्राक् चार जेना बिहाउ नहिंभेल बेटेकलक् रैल्हकुन्। उखर्ह्वाक्ठालाइ अगमबानि साराबाक् बरदान रैल्हाहा। 10हामि ओछि चुटेक् दिन बस्ल टाकै, यहुदिया इलाकाक्भटे अगाबस नाउँ भेल एकजेना अगमबक्ता हाम्राठालाइ आइलक्।#प्रेरित ११:२८ 11ओहिं हाम्राठालाइ आइबानाइ पावलक् पागि लेहिन् आफ्निक् हाथ-टाङ् बार्हिबानाइ यन्हिं बाज्लक्, “पबित्र आत्माइ यरङ् बाज्ल धरैस्, यि पागि जक्राक् हो, ओक्रानि यरुसलेमै जाइबुने यहुदिलके यहेरङ् करिहिन् बाँर्हथिला आउँ अर्जाति मानुसलकक् हाथै सोंप्थिला।”
12यरङ् कहिन् सुनिबानाइ हामि आउँ ओछि रैल्ह जम्माहिं मिलिबानाइ पावललाइ यरुसलेम बुन् जा बाजिहिन् घरि-घरि बिम्ति कर्लुहुँक्। 13तर पावले हाम्रानि यन्हिं बोल्लोक्, “तोहोलेके किसा यरङ् काँरिबानाइ मोरा मन खिन्न पार्बाक् खोज्देहोला? किसाबुने मुँइ पर्भु येसुक् लागि यरुसलेमै बाँर्हिजाबाक् माटेन् बोइने, तर मोर्बाहुक् लागिऔ तियार रहम्ना।”
14पावललाइ रोक्बा नहिंपार्नेसौ, “हामि पर्भुहिक् इच्छा पुरा भेउस्” बाजिहिन् चुप्लाहिन् बस्लुहुँक्।
15ओक्राक्पाछु हामि आफ्निक् सर-सामानलक् तियार काराइबानाइ यरुसलेमक्पटि जाइलुहुँक्। 16हाम्रासङ्हिं कैसरियाक् कुन्हुँ-कुन्हुँ पर्भुक् चेलालक् आको आइलुहुन्, आउँ उखर्ह्वाइ हाम्रानि साइप्रसक् एकजेना मनासोन बाज्ल पर्भुक् पुरानो चेलाहिकक् घरै बासो बस्बा लेगालुहुन्।
पावल यरुसलेमै पुग्ल
17जब हामि यरुसलेमै पुग्लुहुँक्, तसौ ओस्कोक् मन्डलिक् दाजु-भाइलके एकदमे खुसि भेइबानाइ हाम्रानि स्वागत कर्लुहुन्। 18ओर्को दिन पोर्नेसौ पावल आउँ हामि जम्मायँ जेना याकुबक्ठालाइ जाइलुहुँक्। ओछि मन्डलिक् जम्मा एल्डरलक् जउर भेल रैल्हुहुन्। 19पावले उखर्ह्वालाइ भेंटघाट कर्नेसौ ओहिं खुसिक् खभर पर्चार कर्लटाकै अर्जाति मानुसलकक् बिचै परमेस्वरे कनौं-कनौं कामलक् कर्लक्, उ जम्मा कहिनलक् उखर्ह्वानि एकेपरे जानालाहा। 20पावलक् यरङ् कहिन् सुन्नेसौ उखर्ह्वाइ परमेस्वरक् पर्सन्सा कर्लुहुन्। तसौ उखर्ह्वाइ पावललाइ बोल्लिहिंक्, “दिठाउ भाइ, यच्छुहु पर्भु येसुक्लाइ बिस्वास कर्लाहार यहुदिलक् हाजारौ रहट्थ्ला, आउँ मोसाइ देल नियमक् कहिनै उखर्ह्वा जम्मायँ जोसिलो रहट्थ्ला। 21उखर्ह्वाइ तोरोउ बिसइमा किस्-किस् कहिनलक् सुन्ल धरट्थ्ला, उ कहिन् किवा बुने, अर्जाति मानुसलकक् बिचै बस्लाहार यहुदिलकलाइ तुँइ ‘मोसाइ देल नियम मान्बा नापोरेक् आउँ बालखलकलाइ खतना कर्बा नापोरेक् आउँ यहुदि रितिथितिलक् पालन कर्बा नापोरेक्’ बाजिहिन् सिखाल धर्सिखान्ला हँन। 22असौ हामि किवा कर्बा भेका? तोहोलेक यछि आइल रहला बाजिहिन् उखर्ह्वाइ पक्काय सुनिहालट्थ्ला। 23उहेसिहिरे तुँइ हामि बोल्लो कहिन् मान्, यछि हाम्रासङ्हिं भाखल कर्लाहार चार जेना मानुसलक् रहट्थ्ला।#गन्ति ६:१३-२१ 24उखर्ह्वाक् भाखल कर्ल समइ पुरा भेउह्वाबे असौ तुँइ उखर्ह्वालाइ लेहिन् मन्दिरै जाइबानाइ सुद्ध भेबाक् कामै भाग लेउ। उखर्ह्वाक् कापार मुराबा लागाब्या आउँ कट्का खर्च लागेला उसेहे तुँहि तिरिदेहिखान्, यरङ् करिहिन् तुँइ मोसाक् नियमलाइ मान्ल देखिबानाइ तोरानि लागाल दोस सत्य बोइने खम बाजिहिन् जम्माहिं थाहा पाट्थ्ला। 25तर पर्भुक्लाइ बिस्वास कर्लाहार अर्जाति मानुसलकलाइ सेहे मुर्तिलाइ भोग चार्हाल थोक् बुन् खाहो, घेंरसुरि निम्थिबानाइ मार्ल पसुक् मास बुन् खाहो, आउँ किच्छुहिंक् रकटौ बुन् खाहो, आउँ बेबिचारक्भटे टार्हो भेहिन् बस्बा पोर्लाहार बाजिहिन् हामि निर्नय करिहिन् चिठि लेखिबानाइ पाठाहिन् सक्ल धरुहुँक्ला।”#प्रेरित १५:२९
26तसौ ओर्को दिन पोर्नेसौ पावले उ चार जेना मानुसलकलाइ मन्दिरै लेइबानाइ जाहिन् उखर्ह्वाक्सङ्हिं आफ्निलाइ आको सुद्ध पार्लक्। ओक्राक्पाछु पावल मन्दिर भिट्र पोसिहिन् सुद्ध भेबाक् दिन कख्नि सकेला आउँ पर्त्यक् जेनाक् लागि चार्हाबा लेगाल भेंटिक् कहिन् पुझरिलाइ थाहा देलक्।
पावललाइ पक्रल
27भाखल कर्ल सात दिन सक्बा लाग्ल रैल्हकुन्। तसौ एसिया इलाकाक्भटे आइल यहुदिलके पावललाइ मन्दिर भिट्रै देखिहिन् जम्मा मानुसलकक् भिरलाइ सुर्यालाहा, आउँ पावललाइ पक्रलिहिंक्। 28तसौ उखर्ह्वाइ यन्हिं बाजिहिन् चिच्याबा ठाल्लुहुन्, “आहो, इस्राएलक् मानुसेहेलक्, हाम्रालाइ मदप करह! हाम्रा मानुसलकलाइ चारौपाखा जाहिन् मोसाक् नियम बुन् मान्बा आउँ यि मन्दिरै पुजा कर्बा नाभेक् बाजिहिन् सिखाटे बुल्लाहार मानुस यिहे हो। ओट्का माटेन् बोइने यहिं अर्जाति मानुसलकुहुलाइ मन्दिर भिट्रै पोसाहिन् यि पबित्र ठाउँहुलाइ असुद्ध काराल धरैस्।” 29किसाबुने यहिंसौ आघु उखर्ह्वाइ एफिससक्भटे आइल त्रोफिमसलाइ पावलक्सङ्हिं सहरै देख्ल धर्लिहिंक्। आउँ पावले ओक्रुहुलाइ मन्दिर भिट्रै लेग्ल बाजिहिन् सोंच्ल धर्लुहुन्।#प्रेरित २०:४
30तसौ यि कहिनें जम्मा सहरेभोरि खैला-बैला भेलकुन्, आउँ मानुसलक् चारौपटिक्भटे दग्रा-दग्रि कर्टे जउर भेलुहुन्। उखर्ह्वाइ पावललाइ गर्थिबानाइ मन्दिरक्भटे घिंस्याटे बाहार लेगालिहिक्, आउँ छिट्छिटो मन्दिरक् दिहाँरलक् लागालुहुन्। 31उखर्ह्वाइ पावललाइ मार्बाहिक् खोज्लो धर्लिहिक्। उहेटाकिहिमा पुराय यरुसलेम सहरभोरिय मारकाट भेबा ठाल्ल रहेला बाज्बाक् खभर रोमि सेनापतिक् कानै पुग्लकुन्। 32तसौ उ ताट्काले सिपाहि आउँ कप्तानलकलाइ लेहिन् मानुसलकक् भिरक्पटि दग्रटे जाइलक्। उखर्ह्वाइ सेनापति आउँ सिपाहिलकलाइ आबाठाल्ल देखिबानाइ पावललाइ पिट्बा छार्लिहिक्। 33तसौ रोमि सेनापति ओछि आइबानाइ पावललाइ गर्थलकुन्, आउँ दुइगोटा फालामक् साङ्लाइसम् बाँर्भाक् हुकुम देलक्। तसौ उ मानुसलकलाइ सोर्ल्हाहा, “यि मानुसे किवा कर्ल धरैस्? यि मानुस कुन्ग्वा हो?” 34तर उ भिरमाहा रैल्हाहार मानुसलके कुन्हुँइ एक्टा कहिन् कुन्हुँइ ओर्को कहिन् बाजि-बाजि चिच्याबा ठाल्लुहुन्। यरङ् करिहिन् रोमि सेनापतिय उ झग्राक् खास कहिन् थाहा पाबा नहिंपार्ल सिहिरे ओहिं पावललाइ सिपाहिक् अड्डाइ लेगाबा बाजिहिन् हुकुम देलक्। 35सिपाहिलके पावललाइ लेहिन् जाइलटाकै मानुसलकक् धुइरो उखर्ह्वाक् पाछु-पाछु आबा ठाल्लुहुन्। पैह्रि चर्लटाकै मानुसलके पावललाइ मार्बाक्नि आइलुहुन्। उहेसिहिरे उ मानिसलकक्भटे जोगाबाक्नि सिपाहिलके ओक्रानि बोकिबानाइ लेगालिहिक्। 36किसाबुने भिरक् मानुसलके “यि मानुसलाइ मार्बाय पोर्लाहार! मार्बाय पोर्लाहार!” बाजिहिन् चिच्याइ-चिच्याइ ओक्राक् पाछु-पाछु लाग्लुहुन्।
भिरलाइ पावले बोल्लो कहिन्
37सिपाहिलकक् अड्डा भिट्रइ पुगाबाक् लाग्ल बेलाइ पावले रोमि सेनापतिलाइ गिरिक भासाक्भटे यन्हिं बोल्लोकुन्, “हजुर, मुँइ बिम्ति करम्ना, मोरानि किच्छु बाज्बा दे।”
तसौ रोमि सेनापतिय सोर्ल्होकुन्, “किस् तुँइ गिरिक भासा जानस्ला खम?”
38“किस् तुँइ उहे मिस्रि बोइने ते, जैहिं हुल-डङ्का कर्लाहार चार हाजार बिद्रोहिलकलाइ बनै लेगाहिन् धर्ल धर्लाहा?”
39पावले जुबाप देलक्, “मुँइ किलिकिया बाज्ल टार्सस सहरै जर्मल एकजेना यहुदि हो। मुँहु उहे नाउँ चल्ल सहरक् एक्टा नागरिक हो। उहेसिहिरे मोरा बिम्ति रहैस्, यि मानुसलकलाइ किच्छु कहिन् बोल्बाक्नि देहे।”
40रोमि सेनापतिय साराबाक्नि आग्या देलकुन्, तसौ पावले पैर्हिमा ठड्ध्याइबानाइ मानुसलकलाइ हाथ बाताहिन् चुप्लाबा बोल्लाहा, आउँ उखर्ह्वानि पावले हिब्रु भासाइ बोल्बा ठाल्लाहा।
Currently Selected:
प्रेरित 21: DEWZ
Highlight
Share
Copy
Want to have your highlights saved across all your devices? Sign up or sign in
© 2024 (Active), Mother Tongue Translators Society and Wycliffe Bible Translators, Inc. All rights reserved.
