खबरदुत 3
3
यातचाक खोन्द्या भिकारि स्याको
1यात दिन पत्रुस र युहन्ना हिदिङको सुम बजेताङ प्राथना जाह्ङ्साको लागि परमेस्वरको मन्दिरको आङ्गनहाङ आलाकाच। 2मान्तालमइ आमाइ नाःओहाङसयले खोन्द्या स्यावो यातचाक मान्ताकाय मन्दिरको दह्य्लोहाङ लात्ति वान्ति गम्नितो, र ओउ दह्य्लोकाय मान्तालमइ पेओ दह्य्लो त दाह्य्ति तोनितो। मन्दिरभित्र पोको मान्तालमकुस थेपो तेसाको लागि ओउकाय दिनमले मन्दिरको पर्खालको दह्य्लो छेउहाङ गम्नितो। 3जब ओउइ पत्रुस र युहन्नाकाय मन्दिरभित्र पोक्सा लागओ च्यवाकान, ओउइ ओउनिसकुस केहि थेपो तेआ। 4ओउनिसइ ओउकाय ताङ्ति योआकाचु, अनि पत्रुसइ ओउकाय तोआकान, “निचिकाय योउ।” 5ओउतझ्यान्ते ओउइ केहि थेपो दोःनाङ या त म्हर्ति आसति ओउनिसकाय योआकान।
6तर पत्रुसइ ओउकाय तोआथय, “ङाकुसि सुन अथबा चान्दिको थेपोपाय नाःलेल, तर ङाकुसि दोह मुना ओउले ङाइ नाङकाय बइनेनाङ— नासरतको येसु ख्रिस्तको मय्ङहाङ चिङ्ति वाह।” 7ओहाङसयको पत्रुसइ ओउ खोन्द्याको ङोइसयको क्रुतहाङ चुम्ति चिङसाकाय सहयोग जाह्ङाकान, अनि अचानक ओउ मान्ताको दोम र युःमिक बल्यो स्यावा। 8ओउ क्र्यानोक्त चिङा अनि वाह्सा फाःङाकान। ओहाङसयको ओउ वाह्धय, ज्योस्धय र परमेस्वरको प्रसङ्सा जाह्ङ्धय मन्दिरको आङ्गनहाङ पोका। 9जुदा मान्तालमइ ओउकाय वाह्धय र परमेस्वरको प्रसङ्सा जाह्ङ्धयमुओ च्यवाकानि। 10ओउखे पेओ दह्य्लोको छेउहाङ मुओ खोन्द्या भिकारि खेना त दाह्य्ति जुदा मान्तालमइ तह्याकानि, र ओउत च्यउति जुदाले माहा जोक्तो ग्याह्ङाकाय। ओउ मान्ताकाय गतहाइति ओउत स्यावो त दाह्योकुरा ओउमयइ चिःसाले खाइनिलि।
मन्दिरहाङ पत्रुसको भासन
11ओउ मान्ताइ पत्रुस र युहन्नाकाय चुम्ति मुतोकहाङ, जुदा मान्तालमको हुल आन ग्याह्ङ्ति ओउमय मुओ सोलोमनको पिन्धि त तोओ थाउहाङ तन्ति वाङाकाय। 12पत्रुसइ ओहाङ हुमो मान्तालमको हुल च्यउति ओउमयकाय तोआकान, “अ इस्राएलि होयालम, निङ धइति इ कुराहाङ ग्याह्ङ्ति मुतेनय? दोह निइ इ मान्ताकाय निको लयको जिःङ र भक्तिको कारनइ वाह्सा खाइतो जाह्ङालाङ्सु त निङ म्हर्तेनय? 13ओउत खेल, निको पुर्खालम अब्राहाम, इसाक र याकुबको परमेस्वरइले लयको सेवक येसुकाय महिमित जाह्ङ्सास्यावो खेना। इखे पिलातसइ फेतिबइसा निर्नय जाह्ङ्धार्नामा निङइ ओउको ङ्हा इन्कार जाह्ङो र सात्साको लागि सुम्पओ येसुले खेसास्याउना। 14निङइ पबित्र र धर्मि येसुकायखे इन्कार जाह्ङ्तेआकानि, र ओउको होन्त हत्याराकायखे फेताक्साको लागि तोतेआकानि। 15रुवाङ बइसास्यावोकाय निङइ सात्तेआकानि, तर परमेस्वरइ ओउकाय सिओसय उह्ति च्योक्ताक्सास्यावा। निचिखे इ सत्यताको साछि खेनाङ्च। 16येसुहाङ बिस्वास जाह्ङोझ्यान्ते निङइ च्यवो र चिःओ इ मान्ता बल्यो स्यावा। येसुको मय्ङहाङ जाह्ङो बिस्वासइले इ मान्ताकाय निङको मिकको ङ्हा स्याक्ताकाथय।
17ङाको होयालम, ङाइ चिःओ मुना, निङ र निङको सासकलमइ येसु सु खेसास्याउना त दाह्य्ति चिःमातले सातो खेतेनय। 18लयको ख्रिस्तइ दुख च्यउसाले परना त दाह्यो कुरा उहिलेखाले जुदा अगमबक्तालम दुवारा परमेस्वरइ तोसास्यावो खेतो, र लयको कुरा पुत्ताक्साकाय परमेस्वरइ एत जाह्ङ्सास्यावो खेना। 19द्याह निङइ लयको पापको पस्ताप जाह्ङ्नु र परमेस्वरकताङ द्याह्न्न, ओउत स्याउधार्ना परमेस्वरइ निङको पाप छेमा जाह्ङ्ति बइसास्याउना। 20अनि प्रभु परमेस्वरकसय आससिओ समय वाङ्लेना, र परमेस्वरइ निङको लागि छ्युह्ङो ख्रिस्त ल्होक्सास्याउना, ओउखे येसुले खेसास्याउना। 21तर परमेस्वरइ उहिलेखा लयको पबित्र अगमबक्तालमकसय तोसास्यावो अनुसार, परमेस्वरइ जुदा कुरा नया जाह्ङ्माच्युककाय येसुखे लाङकाहाङले मुसा परना। 22मोसाइ तोओ मुना, ‘प्रभु निङको परमेस्वरइ ङाकाय छ्युह्ङ्सास्यावो लेखाले, निङको लयको मान्तालम मध्येसयले यातचाककाय अगमबक्ता स्याउसाको लागि छ्युह्ङ्सास्याउना। ओउ अगमबक्ताइ तोओ जुदा कुरा निङइ साइसा परलेतेनय।#बेब १८:१५ 23ओउ अगमबक्ताइ तोओ कुरा पालन जाह्ङ्मालोलमखे परमेस्वरको मान्तालमकसय जुगाङले वेङ्लेनय र म्हेत्लेनय।’#बेब १८:१९; लेबि २३:२९ 24समुएल र ओउको लोन्हे वाङो जुदा अगमबक्तालमइमा तेनछ्याङको दिनलमहाङ स्याउधयमुओ कुरालमको बारेहाङ तोओ खेइतो। 25निङखे ओउ अगमबक्तालम र परमेस्वरइ निङको पुर्खालमकुस जाह्ङो बाचाको सन्तान खेतेनय। धइतिदाह्य्सा परमेस्वरइ अब्राहामकाय तोसास्यावा, ‘नाङको सन्तानलमकसयले ल्हाउदयबाङको जुदा जातिलमइ आसिक दोःलेनय।’#उत १२:३; २२:१८ 26जब परमेस्वरइ लयको सेवक येसुकाय छ्युह्ङ्सास्यावा, ङ्हाखे परमेस्वरइ येसुकाय निङ इस्राएलको मान्तालमकहाङले ल्होक्सास्यावा, ओउतझ्यान्ते यदि निङइ लयको पापको पस्ताप जाह्ङ्ति प्रभुकताङ द्याह्न्तेनय त खेया परमेस्वरइ निङकाय आसिक बइसास्याउलेना।”
Currently Selected:
खबरदुत 3: CHEP
Highlight
Copy
Compare
Share
Want to have your highlights saved across all your devices? Sign up or sign in
© 2024 (Active), Mother Tongue Translators Society and Wycliffe Bible Translators, Inc. All rights reserved.