खबरदुत 20
20
पावल माकेदोनिया र ग्रिसताङ आलो
1मान्तालमइ आतङ्क जाह्ङ्सा फेआपछि, पावलइ बिस्वासिलमकाय गोताक्तिको हउसला बयाकान। अनि पावल ओउमयकसय बिदा लेःआक्तिको माकेदोनियाताङ आला। 2ओहाङ दाहापछि पावलइ थाउ-थाउहाङ आल्ति बिस्वासिलमकाय हउसलाको स्यानराय बयाकान। ओहाङसयको ओउ ग्रिस छेत्रहाङ#२०:२ ग्रिस छेत्र इ “ग्रिस” त तोओखे ग्रिक सहरलमको कुनय यातज्यो छेत्रको मय्ङ खेना, र रोमिलमइ ओउकाय अखइया इलाकाको यातज्यो छेत्र त दाह्य्तिमा तोनितो। आला। 3र ओहाङ ओउ सुम महिनासम्म मुआ। ओहाङसय ओउ तिः जहासहाङ लह्न्ति सिरियाताङ आल्सा तयार स्याउधय मुतोकहाङ केहि यहुदिलमइ लयको बिरोतहाङ जालसाजि जाह्ङो कुरा ओउइ चिःआकान, ओउतझ्यान्ते ओउइ माकेदोनिया स्याउधयले सिरियाताङ आल्सा निर्नय जाह्ङाकान। 4केहि मान्तालममा ओउको यात्राहाङ ओउकुसि ब्रकले आलाकाय। ओउमयखे बेरिया सहरको पुरसको चोः सोपात्रोस, थेसलोनिके सहरको अरिस्तार्खस र सिकन्दस, दर्बि सहरको गायस, अनि तिमोथि, र एसिया इलाकाको तुखिकस र त्रोफिमस खेइतो। 5ओउमयखे ङ्हाले आलाक्तिको त्रोआस सहरहाङ निकाय ल्युह्ङ्तिमुओ खेइतो। 6छुत्काराको छ्यात मानति द्योकापछि निखे फिलिप्पि सहरसय तिः जहासहाङ लह्न्ति आलालाङ्सु, पोङा दिन लोन्हे त्रोआसहाङ दाहापछि नि ओउमयकुस क्रुस्कायालाङ्सु, र ओहाङ नि यात साता मुआलाङ्सु।
त्रोआस सहरहाङ पावलको अन्तिम यात्रा
7साताको यातम् दिनहाङ राह्मसय नि प्रभु-भोस जेःसाको लागि ओहाङको रइथाने बिस्वासिलमकुसि ब्रक्त हुमालाङ्सु। पावलइ ओउमयको ङ्हा नोःसा फाःङाकान, र स्याह्ङ्लो पल्त ओहाङसय वाह्सा परओझ्यान्ते ल्हाक-याह्दिङसम्मले नोःति मुआ। 8नि क्रुस्कायो त्याःउको चोताहाङ नाःतो बत्तिलम थोङ्तिमुओ खेतो। 9यातचाक युतिकस त मय्ङ्ओ जवान गोय्चो झ्यालहाङ च्युःङ्तिमुओ खेतो। पावल ज्याङ्तोसम्म नोःतिमुओझ्यान्ते ओउ एःन्बुस्सा फाःङाकान, र लोन्हे एःन्तिखायोझ्यान्ते ओउ सुमम् चोतासय साःहाङ ग्लेआ। ओउमय आल्ति ओउ गोय्चोकाय च्योक्तोक बेलाहाङ ओउ सितिखायो खेतो। 10पावल काःम्ताङ ग्ल्युह्ङा, र खुःङाक्तिको ओउकाय ग्रोम्ति एत दाह्या, “निङ लिह्लाम, इ गोय्चो जिउदोले मुना।” 11ओहाङसयको ओउमय द्याह्न्ति त्याःउको चोताहाङ लह्नाक्तिको ब्रकले प्रभु-भोस जेःआकानि। अनि न्याम थोङ्माच्युकसम्म पावल नोःतिले मुआ, ओहाङसयको ओउ ओउमयकसय वेङ्ति पाह्या। 12अनि ओउमयइ ओउ जवान गोय्चोकाय जिउदोले किमताङ लात्ति आःलाकानि र ओउमय जोक्तोले आसआकाय।
पावलको त्रोआसहाङसय मिलेतससम्मको यात्रा
13पावलइ अस्सोसताङ वाह्तिले आल्सा निर्नय जाह्ङाकान। ओउकाय अस्सोससय मात्र तिः जहासहाङ लह्न्ताक्साकाय बन्दोबस्त जाह्ङ्ति, निखे तिः जहासहाङ लह्न्ति ओउसय ङ्हाले अस्सोसताङ आलालाङ्सु। 14जब पावलइ निकाय अस्सोसहाङ क्रुसाताङ्सु, निइ ओउकाय तिः जहासहाङ लह्न्ताकाक्तिको मितिलेनेताङ आलालाङ्सु। 15नि ओहाङसयमा आल्ति स्याह्ङ्लो पल्तखे खियस तापु द्याङ्तो दाहालाङ्सु, र चित्सयलोखे सामोस तापुहाङ दाहालाङ्सु। अनि क्याम्सयलोहाङखे नि मिलेतस सहरहाङ दाहालाङ्सु। 16एसियाको इलाकाहाङ नाःतो समय मुसा चाहमालोझ्यान्ते पावलइ एफिससहाङ आल्मातले पाह्य्सा बिचार जाह्ङाकान। धइतिदाह्य्सा खाइच्युकसम्म पेन्तिकोसको छ्यात मानसाको लागि समयहाङले यरुसलेम दाह्सा ओउइ आन हतार जाह्ङो खेतो।
एफिससको अगुवालमको लागि पावलको खबर
17तर जब नि मिलेतसहाङ दाहालाङ्सु, पावलइ एफिससको मन्दलिको अगुवालमकाय निङ वाङ्ति ङाकाय क्रुस्नाङ्स त दाह्य्ति यातज्यो खबर ल्होकाकान। 18जब ओउमय पावलकाय क्रुस्लाङ वाङाकाय, ओउइ ओउमयकाय एतदाह्य्ति तोआकान, “एसियाको इलाकाहाङ वाङो यातम् दिनहाङसयले ङा निङकुस मुतोक बेलाहाङ गतहाइति ङाइ निङकुस मुति हुतालाङ त दाह्यो कुरापाय निङइ चिःओले मुतेनय। 19केहि यहुदिलमइ ङाको बिरोतहाङ जालसाजि जाह्ङोझ्यान्ते ङाइ आन दुख च्यवालाङ। ओउतोक बेलाहाङमा गतहाइति ङाइ सधय नम्र स्याउति प्रभुको सेवा जाह्ङालाङ, र र्याति हुतालाङ त दाह्यो कुरामा निङइ चिःओले मुतेनय। 20निङइ चिःओले मुतेनय, निङकाय पेतो स्याउपा त दाह्य्ति निङकाय स्यानराय बइसा ङाइ गलमा इन्कार जाह्ङ्ङल, बरु जुदा मान्तालमको ङ्हा अथबा किम-किमहाङ आल्ति ङाइ स्यान्नेआलाङ्स। 21ङाइ यहुदिलम र अरु जातिको जुदा मान्तालमकाय पस्ताप जाह्ङ्ति परमेस्वरकताङ वाङ्न, र निको प्रभु येसुहाङ बिस्वास जाह्ङ्नु त दाह्य्ति तोआलाङ। 22र देङेखे पबित्र ग्वालामइ तोओ कुराकाय ग्याति ङा यरुसलेमताङ आल्धय मुनाङ, र ओहाङ ङाकाय दोह स्याउना त दाह्यो कुरा ङाइ चिःओ नाःङल। 23तर हरेक सहरहाङ आल्तोकहाङ पबित्र ग्वालामइ ङाकाय दर्कसास्यावो मुना, यरुसलेमको झेलकनहाङ ङाकाय कुङ्नाताङ्स र ङाइ दुख दोःलेनाङ त दाह्यो कुरा मात्र ङाइ चिःओ मुनाङ। 24तर ङाइ लयको रुवाङको बारेहाङ लिह्ङल। धइतिदाह्य्सा ङाको लागि महत्वखे ङाको रुवाङ खेल, तर येसुइ ङाकाय बइसास्यावो परमेस्वरको अनुग्रहको पेओ खबर पेतोकुसि प्रचार जाह्ङ्साखे ङाको रुवाङसयमा महत्व खेना।
25देङे ङाइ चिःनाङ, ङाइ परमेस्वरको राज्यको बारेहाङ प्रचार जाह्ङो निङमध्ये सुइमा ङाकाय फेरि च्यउसा दोःतेइलि। 26ओउतझ्यान्ते तेनको दिन ङाइ निङकाय पेतोकुसि तोनेनाङ्स, यदि निङमध्ये सु खेयाकायमा जुगाङको लागि म्हेत्ति वाइतेनय त खेया, ओउखे ङाको गल्ति स्याउलेल। 27धइतिदाह्य्सा निङइ दोह कुरा चिःओ परमेस्वर चाहसास्याउना, ओउ जुदा कुरा निङकाय तोसाको लागि ङाइ गलमा इन्कार जाह्ङ्ङल। 28परमेस्वरइ भेदालम लेखाताह्ङो लयको मान्तालमको गोथालो स्याउसाको लागि निङकाय छ्युह्ङ्सास्यावो मुना। ओउतझ्यान्ते निङ लयइ लयकाय र निङको पासहाङ पबित्र ग्वालामइ गम्सास्यावो जुदा बथानलमकाय वास्ता जाह्ङ्नु। निङखे परमेस्वरइ लयको चोःको वुइसय लयको जाह्ङ्सास्यावो परमेस्वरको मन्दलिको गोथालोलम स्याउन। 29ङाइ चिःनाङ, ङाइ निङकाय फेति पाह्यापछि रइसिओ बन पसु पारकुःइ लेखाताह्ङो स्याताहा गुरुलम वाङ्ति निङकाय आक्रमन जाह्ङ्तेनय। 30निङ लयमयको मान्तालम मध्येसयले केहि मान्तालमइ स्याताहा स्यानराय बइति प्रभुको मान्तालमकाय लयको लोन्हे लात्ति आःल्लेनानि। 31ओउतझ्यान्ते होसियार स्याउन, र ङाइ सुम बर्ससम्म दिन-याह्दिङ त मा दाह्य्मात र्याति-र्याति निङकाय स्यानो कुराकाय निङइ जुगाङमा म्हेःलाम।
32द्याह ङाइ निङकाय परमेस्वरको चरनहाङ र परमेस्वरको अनुग्रहको आखरहाङ सुम्पनेनाङ्स। इ आखरइखे निङकाय बिस्वासहाङ बल्यो जाह्ङ्तेनय र परमेस्वरइ लयको लागि छ्युह्ङ्सास्यावोलम मध्येहाङ लयको मान्ता स्याउसाकाय अधिकार बइतेनय। 33ङाइ कुनय मान्तालमको सुन, चान्दि अथबा पेओ नायलमको गलमा इच्छ्या जाह्ङ्ङल। 34निङइ चिःओले मुतेनय, ङाइ ङाको इ क्रुतइले ङा, लयकाय र ङाको होयालमकाय चाहओ जुदा थोकलम जुर्यावालाङ। 35खान्चोहाङ परओलमकाय गतहाइति माहा जोक्तो मेहेनत जाह्ङ्ति निङइ सहयोग जाह्ङ्सा खाइतेनानि त दाह्यो कुराको उधारन ङाइ निङकाय छ्यान्नेआलाङ्स। निङइखे ‘लेःओ मान्तासयपाय बयो मान्ता नाःतो आसिसित स्याउना’ त दाह्य्ति प्रभु येसुइ तोसास्यावो कुराकाय सम्झसा परतेनय।”
36पावलइ इ कुरालम नोःति भ्याआपछि, ओउइ क्र्योःङ घ्रुस्ति ओउमयकुस ब्रकले प्राथना जाह्ङाकान। 37ओउमय जुदाले आन जोक्तो र्याआकाय, अनि ओउमयइ पावलकाय ग्रोम्ति तुःमाक्तिको बिदाइ जाह्ङाकानि। 38द्याह फेरि निङइ ङाकाय च्यउसा दोःतेइलि त दाह्य्ति पावलइ तोओझ्यान्ते ओउमय जुदाले आन दुखि स्यावो खेइतो। ओउतझ्यान्ते ओउमयइ पावलकाय तिः जहाससम्मले साहाकानि।
Currently Selected:
खबरदुत 20: CHEP
Highlight
Copy
Compare
Share
Want to have your highlights saved across all your devices? Sign up or sign in
© 2024 (Active), Mother Tongue Translators Society and Wycliffe Bible Translators, Inc. All rights reserved.