२ थेसलोनिकि 3
3
प्राथनाको लागि पावलको बिन्ति
1अन्तिमहाङ, ङाको राप्तो बिस्वासि होयालम, निको लागि प्राथना जाह्ङ्ति बइताङ्सु त दाह्य्ति नि निङकाय बिन्ति जाह्ङ्नाङ्सु। प्रभुको आखर नाःतो भन्दा नाःतो फइलिधय आल्पाना, र इ आखर निङकहाङ वाङ्तोक बेलाहाङ निङइ मान-सम्मान जाह्ङोलेखाले गाउ थाउहाङ दाह्याकायमा जुदा मान्तालमइले मान-सम्मान जाह्ङ्पानानि त दाह्य्ति प्राथना जाह्ङ्नु। 2माहा पेमालो दुस्त मान्तालमकसय दल्तिमुसा खाइपाङ्सु त दाह्य्ति प्राथना जाह्ङ्ति बइताङ्सु, धइतिदाह्य्सा जुदा मान्तालमइ प्रभुको आखरकाय बिस्वास जाह्ङो स्याविलि।
3तर निको प्रभुखे बिस्वास जाह्ङ्सा ज्योतो खेसास्याउना। प्रभुइ निङकाय बल्यो जाह्ङ्सास्याउना र दुस्त सय्तानकसय दल्ताक्सास्याउना। 4अनि निइ निङकाय आग्या जाह्ङो कुरालम निङइ देङेमा जाह्ङ्धय मुतेनय र लोन्हेमा जाह्ङ्लेतेनानि त दाह्यो कुराहाङखे नि प्रभुहाङ पक्का मुनाङ्सु।
5प्रभुइ निङको ल्हुङतुककाय परमेस्वरको रापमय र ख्रिस्तको धइरेताताङ अगुवाय जाह्ङ्तेपनय त दाह्य्ति नि निङको लागि प्राथना जाह्ङ्नाङ्सु।
जुदा बिस्वासिलमइ काम जाह्ङ्साले परना
6ङाको राप्तो बिस्वासि होयालम, निइ स्यानो स्यानरायकाय पालन जाह्ङ्मात अल्सि स्याउति याको बिस्वासिलमकसयखे निङ थे मुन त दाह्य्ति नि निङकाय निको प्रभु येसु ख्रिस्तको मय्ङहाङ आग्या जाह्ङ्नाङ्सु। 7धइतिदाह्य्सा निइ जाह्ङोलेखाले निङइमा जाह्ङ्सा परना त दाह्यो कुरापाय निङइ पेतोकुसि चिःओले मुतेनय। नि निङकुस मुतोक बेलाहाङ निखेपाय अल्सि नाःआक्ङसुलु। 8निइ थेपो बइमात सुको जेःगा-तुङ्गामा सोह जेःङसुलु। निको कारनइ निङ सुकायमा भार परलाम त दाह्य्ति दिन-याह्दिङ त मा दाह्य्मात निइ मेहेनत जाह्ङ्ति काम जाह्ङालाङ्सु। 9निकाय चाहओ सहयोग निङकसय लेःसा निकुस पक्का अधिकार खेलेतो, तर निङकाय पालन जाह्ङ्ताक्साको लागि लयको काम दुवारा उधारन बइसा चाहओझ्यान्ते निइ ओउत जाह्ङो खेङसुतो। 10नि निङकुस मुतोकहाङ, “यदि कुनय मान्ताइ काम जाह्ङुलु त खेया, ओउइ जेःगामा जेःलाम” त दाह्य्ति निइ निङकाय आग्या जाह्ङो खेङसुतो।
11निङ मध्येको केहि मान्तालमखे लयइ जाह्ङ्सा परओ काम जाह्ङ्साताङ अल्सि ताःनय, तर अरुइ जाह्ङो कामलमहाङखे सालाङ्खाले दुख बयो कामताङ जाह्ङ्नानि त दाह्यो कुरा साइति निइ निङकाय इ कुरा तोओ खेनाङ्सु। 12द्याह मधिम त स्याउति लयको काम जाह्ङ्ति जिबिका चलाउपानि त दाह्य्ति ओउतताह्ङो मान्तालमकाय नि प्रभु येसु ख्रिस्तको मय्ङहाङ आग्या र बिन्ति जाह्ङ्सा चाहनाङ्सु।
13तर ङाको राप्तो बिस्वासि होयालम, निङखे पेओ काम जाह्ङ्तोकहाङ जुगाङमा निरास स्याउजेलाम। 14निइ इ चिथिहाङ तोओ कुराकाय कुनय मान्ताइ पालन जाह्ङ्सा इन्कार जाह्ङ्नउ त खेया निङइ ओउकाय तह्य्नु, र ओउकुस मिलति दोह बेबहारमा जाह्ङ्जेलाम। ओउतस्याउतोक बेलाहाङ ओउ लयले रास्सितो स्याउलेना। 15तर दोहले खेयाकायमा ओउकाय बइरिकाय लेखाखे बेबहार जाह्ङ्लाम, बरु लयको बिस्वासि होया सम्झति दर्कति तोनु।
पावलको अन्तिम कुरा
16धोमायो बइसास्यावो प्रभुइले निङकाय जुदा समय र हरेक अबस्थालमहाङमा धोमायो बइतेपनय। अनि प्रभु येसु निङ जुदाकुसले मुसास्याउपाना त दाह्य्ति ङाइ प्राथना जाह्ङ्नाङ।
17ङा पावल, लयको क्रुतइले इ अभिबादन लेखधय मुनाङ। ङा पावलइ लेखओ चिथि त दाह्य्ति चिःसा तरिकाखे इले खेना। दोङ्सिले ङाइ लेखओ चिथि खेना त दाह्य्ति पक्का स्याउसाको लागि, ङाइ ङाको जुदा चिथिको अन्तिमहाङ एतहाइतिले लेखनाङ।
18निको प्रभु येसु ख्रिस्तको अनुग्रह निङ जुदाकुसिले स्याउपाना। आमेन।
© 2024 (Active), Mother Tongue Translators Society and Wycliffe Bible Translators, Inc. All rights reserved.