२ थेसलोनिकि 2
2
प्रभु येसु द्याह्न्ति वाङ्सासय ङ्हा दुस्त मान्ता वाङ्ना
1 #
१थेस ४:१५-१७
ङाको राप्तो बिस्वासि होयालम, जब निको प्रभु येसु ख्रिस्त द्याह्न्ति वाङ्सास्याउना, ओउबेलाहाङ प्रभुकाय क्रुस्साको लागि नि जुदा यातथाउहाङ ब्रक्त हुम्नातहि। ओउतझ्यान्ते ङा निङकाय सल्लाहको रुपहाङ इ कुरालम तोसा चाहनाङ— 2यदि प्रभु वाङ्साखेओ दिन दाह्तिभ्याओ मुना त दाह्य्ति अरुइ तोतेनय त खेयाकायमा, निङ रइलाम र लिह्मालाम। यदि ओउमयइ इ कुराको बारेहाङ पबित्र ग्वालामकसय दर्सन दोःओ, अथबा कुनय मान्तालमकसय खबर दोःओ, अथबा निको चिथिलम मध्येको कुनय यातज्यो चिथि पह्रति चिःओ त दाह्य्ति तोतेनय त खेयाकायमा, निङइ ओउमयको कुराहाङ जुगाङमा बिस्वास जाह्ङ्लाम। 3ओउमयको कुरा साइति निङ धोकाहाङ परजेलाम। धइतिदाह्य्सा परमेस्वरको बिरोतहाङ ताह्ङो अन्तिम आतङ्क स्याउमाच्युकसम्म र बिनास वानो दुस्त मान्ता#२:३ दुस्त मान्ता कुनय-कुनय सङ्सकरनलमहाङखे “पापको मान्ता” अथबा “नेम-कानुन बिनास जाह्ङो मान्ता” त दाह्य्ति तोओ मुना। थामाच्युकसम्म ओउ दिनखे वाङ्लेल। 4#दान ११:३६; इज २८:२ओउ मान्ताइ परमेस्वरको र मान्तालमइ परमेस्वरको रुपहाङ पुजा-आराधना जाह्ङो जुदा थोकलमकोले बिरोध जाह्ङ्नउ। ओहाङसयको ओउइ, ङा परमेस्वर खेनाङ त दाह्य्ति लयइ लयकायले घोसना जाह्ङाक्तिको परमेस्वरको मन्दिरहाङ आल्ति मुलेना।
5ङा निङकुस ब्रक मुतोक बेलाहाङ ङाइ निङकाय इ जुदा कुरालमको बारेहाङ तोनेआलाङ्स, दोह निङइ सम्झओ नाःतेइलि र? 6ओउ दुस्त मान्ताकाय वाङ्साको लागि दोह कुराइ रोकओ मुना त दाह्यो कुरापाय निङइ चिःओले मुतेनय, धइतिदाह्य्सा ओउको सहि समय वाङापछि मात्र ओउ थालाङ वाङ्ना। 7ओउ दुस्त मान्ताको गोप्पे जिःङइ परमेस्वरकाय इन्कार जाह्ङ्ताक्साको लागि मान्तालमकहाङ काम जाह्ङ्ति खायो मुना। तर ओउ दुस्त मान्ताकाय पेतोकुसि काम जाह्ङ्साको लागि असम्भब जाह्ङ्ताको यातज्यो केहि कुरा मुना। परमेस्वरइ ओउ कुराकाय वाइमाच्युकसम्म, ओउ कुराइखे ओउ दुस्त मान्ताकाय काम जाह्ङ्ताक्सा बइलेउलु।#२:६-७ इ ६-७ पदको मानेखे एतदाह्य्तिमा चिःसा खाइना— (६) दुस्त मान्ता थालाङ वाङ्साखेओ समयसम्म इ सङ्सारकाय सुइ रोकति गमो मुना त दाह्यो कुरापाय निङइ चिःओले मुतेनय। (७) ओउ बिनास वानो दुस्त मान्ताखे देङेसम्म थाओ नाःल, तर ओउको कामखे गोप्पे रुपहाङ स्याउतिले मुओ मुना। ओउको इ कामखे मान्तालमको माझहाङ ओउ थालाङ वाङ्माच्युकसम्म ओउतहाइति स्याउतिले मुना। 8#यस ११:४ओहाङसयको लोन्हे ओउ दुस्त मान्ता थालाङ वाङ्ना, अनि प्रभु येसुइ ओउकाय लयको म्होतोङसय ग्ल्युह्ङो सब्दलम दुवारा सात्सास्याउना र जब येसु ताह्ङो महिमाहाङ वाङ्सास्याउना ओउ दुस्त मान्ताखे जुगाङको लागि म्हेत्ति वाइलेना। 9#मति २४:२४ओउ दुस्त मान्ताखे सय्तानको जिःङ लात्ति वाङ्ना, र ओउइ मान्तालमकाय धोका बइसाको लागि जुदा खालको ग्याह्ङ्सिओ स्याताहा चिनोलम जाह्ङ्नउ। 10बिनासको ल्यामहाङ लागओ मान्तालमकाय मुर्ख जाह्ङ्साको लागि ओउइ हरेक खालको पेमालो स्याताहा कुरालम जाह्ङ्लेनउ। ओउ मान्तालमइ लयकाय दल्ताक्साखेओ सत्य कुराकाय राप्सा र सुइकार जाह्ङ्सा इन्कार जाह्ङाकानि। 11ओउतझ्यान्ते परमेस्वरइ ओउमयकाय स्याताहा कुराहाङ बिस्वास जाह्ङ्तो जाह्ङ्सास्याउना, अनि ओउमयइ ओउ दुस्त मान्ताको जुदा स्याताहा कुराकाय सुइकार जाह्ङ्लेनानि। 12ओहाङसयको लोन्हे परमेस्वरइ ओउ स्याताहा कुराहाङ बिस्वास जाह्ङो जुदा मान्तालमकाय दन्द बइसास्याउलेना, धइतिदाह्य्सा ओउमयइखे सत्य कुराहाङ बिस्वास जाह्ङो भन्दा पेमालो कुरालम जाह्ङ्ति रमाइलो जाह्ङ्सा झाक्नय।
निङखे मुक्ति दोःसाको लागि छ्युह्ङो मान्तालम खेतेनय
13ङाको राप्तो बिस्वासि होयालम, प्रभुइ राप्सास्यावो निङको लागि निइखे परमेस्वरकाय सधयले धन्नेबाद बइसा परनाङ्सु। धइतिदाह्य्सा परमेस्वरइ निङकाय लयको पबित्र मान्ता जाह्ङ्सा र सत्यताहाङ बिस्वास जाह्ङ्ति ग्वालामको जिःङ दुवारा मुक्ति दोःसाको लागि ङ्हाहाङसयले छ्युह्ङ्सास्यावो मुना। 14निइ निङकाय पेओ खबर प्रचार जाह्ङ्तोकहाङ परमेस्वरइ निङकाय मुक्तिको लागि गोत्सास्यावा, अनि द्याहखे निङइ ओउ पेओ खबरहाङ बिस्वास जाह्ङ्ति निको प्रभु येसु ख्रिस्तको महिमाको भाक दोःसा खाइतेनानि। 15ओउतझ्यान्ते ङाको राप्तो बिस्वासि होयालम, निइ निङकाय क्रुस्ति र चिथि दुवारा दोह-दोह कुरा स्यान्नेआलाङ्स, ओउ कुराकाय ङ्हाम्ति बिस्वासहाङ ज्योतो स्याउति मुन।
16निको प्रभु येसु ख्रिस्त लयइले अनि निकाय राप्सास्यावो र लयको अनुग्रहहाङ निकाय गलमा द्युम्मालो साहस र पेओ आसा बइसास्यावो निको परमेस्वर आपाइ, 17पेओ कुरा जाह्ङ्सा र तोसाको लागि निङकाय साहस र जिःङ बइतेपनय।
Currently Selected:
२ थेसलोनिकि 2: CHEP
Highlight
Copy
Compare
Share
Want to have your highlights saved across all your devices? Sign up or sign in
© 2024 (Active), Mother Tongue Translators Society and Wycliffe Bible Translators, Inc. All rights reserved.