BAEBURANIYA 8

Echilaano chiyayaya

1Emwasi munene busese mwa bya twáhonda kuteta, iyôno: twéte eMukulu-kulu we'bakuhanyi* ola ulí ngo'yu twàhambere'ko. Oyola, iwěkese kwa nguba kwa lunda lwe'malyo ma Ongo we'buashi boshi. 2Ákola mwa Chisiki Chibuya-buya*, kukuteta mbu mwa hema lye'kanangana. Eri hema, litákomibwaa na mundu, si Enawetu yeine iwákomaa'li.

3Chira Mukulu-kulu we'bakuhanyi* énde ábikwa chasiya akóle emulimo we'kunde âna emitulo*. Bushi no'ku, oyu Mukulu-kulu wetu we'bakuhanyi*, nai ábaa ěmire aáte kandu ka kwâna. 4Akaba Kirisito àngabere muno butala, àtangabere kuhanyi* chiro na hicha. Bushi kùli bakuhanyi* ba bénjire bâna emitulo* kukulikana no'kwa Mwaso* wa Musa atúla àtechire. 5Emulimo ola abu bakuhanyi* bénjire báira, chìri chimbusa kanji kalorero ka kálosa emyasi kanangana era yákolibwa kwa nguba. Ei myasi, ìri nge'ra Musa álosibwaa. Bushi mango Musa ábaa àli ofu kuimba ehema, Ongo era kumuchichika mbu: «Ulólaa kubuya, chasiya ukúnganye chira kandu kukulikana no'kwa nánakulosaa kwa ndulungu.»#8:5 Ei ndulungu ìri endulungu ye'Sinai. Somaa Kutenga 25:40.

6Si rero, Yesu êresibwe emulimo ola ùrenzise busese emulimo wa'bu bakuhanyi*, bushi iwábikire ebandu mwa buuma na Ongo kurengera echilaano* cha chikomire busese kurenza cha chibere-bere. Echi chilaano* cheke, chitúla chemángirire kwa biraane bya bikomire busese.

7Akaba echi chilaano* chibere-bere#8:7 echi chilaano chibere-bere: Chìri echilaano cha Ongo áiraa ne'Baisiraeli mango bábaa bàli ala'uma na Musa, era chibanda se'ndulungu ye'Sinai. Somaa Kutenga 24:3-8. chìngabere chìlumirire, chìtangainganyisibwe ne'cha kabiri. 8Si Ongo era kunde ákaliira ebandu bai mwa kubabura mbu:

«Enawetu àtechire mbu:

Mwa suku sa sěshire, nyingáira chilaano chiyayaya*

ne'lubaa lwe'Baisiraeli,

ala'uma ne'lubaa lwa Yuta.

9Echi chilaano* cheke, chitábe nge'cha náiraa na bahokulu babo,

mango nábaa nyibáachirire kwa mino,

nábakula mwa chio che'Misiri.

Si baténdee báira kwa echi chilaano* chábaa chìtechire.

Bushi no'ku, nera kwire nárekerera'bo.»

Enawetu Ongo íwatechire bacha.

10Kanji Enawetu àtechire mbu: «Echilaano* cha nyingáira ne'lubaa lwe'Baisiraeli era nyuma se'si suku chi chechine:

Nyingábika eMwaso* wanyi mwa mianyisa yabo,

na kuanjika'o mwa michima yabo.

Nyingába Ongo wabo,

nabo bánaba bandu banyi.

11Kutáchibe mundu ola wákangirisa mulikabo,

nesi ola wábura munyakabo mbu:

‹Kwěmire uménye Enawetu!›

Bushi ebandu boshi bangányimenya,

kutengera kwa mutoto, kuikira kwa mukulu.

12Bushi nyingábabalira emabi mabo,

kanji ndáchikengere ne'bibi byabo.»#8:8-12 Somaa Yeremiya 31:31-34.

13Mango Ongo áteta era luulu se'chi chilaano chiyayaya*, kuli kuteta mbu àbindwire echilaano* chibere-bere, kuba cho'kwa mira. Na chira kandu koshi ka kàli ko'kwa mira, kàtachete na mutoloke, kénde káikirira kwa chihangi káwekerera.

Currently Selected:

BAEBURANIYA 8: tbt

Highlight

Copy

Compare