BAEBURANIYA 7

Ebwami ne'bukuhanyi bwa Merikiseteki

1Oyu Merikiseteki ábaa mwami we'musi we'Salemi, kanji ábaa atúla kuhanyi* wa Ongo ola ulí era luulu sa byoshi. Mango Aburahamu ábaa átenga kwa bita bya áimaa mu bami bauma, Merikiseteki era kuya kumuhuukasa na ámuahanyira. 2Aburahamu era kumweresa echiuma che'kumi cha byoshi bya ábonaa mwa bita.

Rero esina lya Merikiseteki, kukuteta tanga mbu: «Mwami ola wénde wáira bya bìtungenene.» Kanji àli mwami we'Salemi, kukuteta mbu: «Mwami wa bôlo.» 3Kutali ola wìshi eshe nesi nyina, nesi elubuto lwa áshokaa'mo. Ne'lusuku lwe'kubuchibwa ne'lwe'kufa kwai, nalo lùteshibwe. Àli kuhanyi* esuku ne'mango nga kuno eMwana wa Ongo.

4Musene kute oyu mundu ábaa àli mukulu-kulu busese! Anabe na Aburahamu, hokulu wetu munene ánamweresaa echiuma che'kumi che'bindu bya bìkomire busese, bya ányaa mwa bita. 5eMwaso* atúla àanyire eloso kwa bandu bo'mwa lubuto lwa Lawi, ba bêresibwe emulimo we'bukuhanyi* kunde báholosa echi chiuma che'kumi mwa kachi-kachi ka banyakabo Baisiraeli. Bénde báira bacha, chiro àngaba mbu nabo bàli bo'mwa lubuto lwa Aburahamu. 6Oyu Merikiseteki átabaa wo'mwa lubuto lwa Lawi, si Aburahamu ámwêresaa echiuma che'kumi. Chasinda, Merikiseteki era kuáhanyira Abrahamu i'Ongo êresise echiraane. 7Kubinali, ola wáahanyira i'ùli era luulu so'la wáahanyirwa.

8Ebakuhanyi* ba bénde báholosa echiuma che'kumi, nabo banáli bandu ba bénde báfa. Si Merikiseteki iwêresibwaa echiuma che'kumi, yeke anáchiri muuma-uma kukulikana no'kwa Maanjiko Mabuya-buya matúla màtechire. 9Rero, tùngateta mbu mango Aburahamu ânaa echiuma che'kumi che'bikulo byai, Lawi nai ánǎnaa'chi kumurengera'ko. 10Bushi chiro àngaba mbu Lawi ábaa àtasa kubutwa, si ábaa era análi mwa mikira ya hokulu wai Aburahamu, mango Merikiseteki áyaa kumuhuukasa.

Yesu i'Mukulu-kulu we'bakuhanyi ola utwétere mufa

11Mwa Mwaso* we'Baisiraeli, ebandu bo'mwa ngumo ya Lawi bu béndee bálondolibwa mwe'bakuhanyi*. Béndee bába bakuhanyi* nga kuno Haruni. Si obu bukuhanyi* bwabo, bwábaa bùtalumirire. Bushi akaba bùngabere bùlumirire, ekubika eunji kuhanyi* ola ulí nga Merikiseteki, kutangachiachire mufa. 12Mango ebukuhanyi* bwénde bwábindulibwa, eMwaso* nao, énde êma abíndulibwe. 13Bushi Enawetu Yesu ola ei myasi yerékere, ábaa mundu wa chinji chirongo. Kanji kutáli chiro na mundu asibya wo'mwa chirongo chai, ola wéndee wákola emulimo we'bukuhanyi* kwa kahaha ke'mitulo*. 14Kubinali, ebandu boshi banêshi kanangana kwo'yu Enawetu áshokaa mwa chirongo cha Yuta. Ne'ra luulu se'chi chirongo, Musa atátetaa chiro na mwasi asibya ola wèrekere ebukuhanyi*. 15Oyu mwasi alórekanyire'ko changanama bushi kwàulukirire unji kuhanyi* ola uhúhanyisibwe na Merikiseteki. 16Oyola yeke àtairibwe kuba kuhanyi* kukulikana ne'miomba* ye'bandu bo'mwa chirongo cha Lawi. Si áiribwe kuba kuhanyi* kukulikana ne'buashi bwe'kalamo ka katákakumbe. 17Bushi eMaanjiko Mabuya-buya matúla màtechire mbu:

«Woyo, ukánaendekera utúla kuhanyi* esuku ne'mango,

nga Merikiseteki.»#7:17 Somaa Saburi 110:4.

18Rero, emuomba* wo'kwa mira ábindulibwaa bushi ábaa atéte misi, kanji ábaa atéte mufa, 19bushi kutáli kandu ka kalumirire, ke'Mwaso* áretaa. Si twérire twábona unji munyiiro ola ùrenzise ola wo'kwa mira, na kurengera oyu munyiiro, twera tùngachifunda ofu na Ongo.

20Kanji ei myasi yáirwaa kukulikana ne'kulaisa kwa Ongo álaisaa. Si abu banji bakuhanyi* bo'mwa chirongo cha Lawi, mango béndee bábikibwa kwa bukuhanyi*, kutáli ola wéndee wálaisa. 21Si Yesu áiribwe kuba kuhanyi* kurengera ekulaisa kwa Ongo álaisaa mango ámuburaa mbu:

«Enawetu aláisise,

kanji àtangabindula na cha àtechire mbu:

‹Woyo, ukánaendekera utúla kuhanyi* esuku ne'mango.›»#7:21 Somaa Saburi 110:4.

22Mwa bacha, Yesu érire ába chikinja che'chilaano* cha chikomire busese kurenza echilaano* cho'kwa mira.

23Kanji abu banji bakuhanyi* bábaa banene, bushi ekufa kwéndee kwátuma bátaendekera ne'mulimo wabo. 24Si Yesu yeke anátula muuma-uma esuku ne'mango, ne'bukuhanyi* bwai butákawe chiro na hicha. 25Echera chi chitúmire àngaala kununula loshi ba bénjire báchifunda ofu na Ongo mwa kumurengera'ko. Bushi àli muuma-uma esuku ne'mango, chasiya énde émera'bo era mwa Ongo.

26Kubinali! Yesu i'Mukulu-kulu we'bakuhanyi* ola utwêtere mufa. Yeke atúla mubuya-buya, atéte chiro na chibi chisibya, àtatusa ne'singa. Ábikibwe bure ne'bandu be'bibi, na kwérusibwa mwa chanya busese kwa nguba. 27Yeke atáli kuuma ne'banji Bakulu-kulu be'bakuhanyi*. Àtatula àlaire ku kwâna mitulo* chira lusuku ngo'kwa abu banji bénde báira bushi ne'bibi byabo beine ne'bye banji bandu. Si Yesu yeke áchanaa kuba mitulo* euma oshâo, mango yeine êmereraa kufa. 28eMwaso* wa Musa énde ábika ebandu ba batéte misi kuba Bakulu-kulu be'bakuhanyi*. Si kukulikana ne'kulaisa kwa Ongo álaisaa era nyuma se'kubika oyu Mwaso*, eMwana i'utúla ùlumirire esuku ne'mango, érire áiribwa kuba Mukulu-kulu we'bakuhanyi*.

Currently Selected:

BAEBURANIYA 7: tbt

Highlight

Copy

Compare